22°C , Mostly cloudy | Kigali-Rwanda
Tuyisenge Jacques ari kumwe n'umutoza we ubwo Gor Mahia yakinaga umukino ubanza mu mikino y'Afurika

Tuyisenge amaze iminsi adakina kubera imvune

Yanditswe na BUGINGO FIDELE

Ku ya 13-02-2018 saa 06:14:00

Rutahizamu w’ikipe y’u Rwanda “Amavubi” n’ikipe ya Gor Mahia muri Kenya, Tuyisenge Jacques   yari amaze iminsi atagaragara mu kibuga kubera imvune yagize ubwo iyi kipe ya Gor Mahia yatsindaga AFC Leopards.

Tuyisenge Jacques ari kumwe n’umutoza we ubwo Gor Mahia yakinaga umukino ubanza mu mikino y’Afurika

Uyu mukino w’igikombe kiruta ibindi “Super Cup 2018”  wabaye tariki 28 Mutarama 2018  aho ikipe ya Gor Mahia yatsinze  AFC Leopards igitego 1-0 yegukana igikombe. Kuva kuri uyu mukino,  Tuyisenge Jacques yagize ikibazo mu itako.

Iyi mvune yatumye Tuyisenge adatangirana shampiyona  n’ikipe ye ya Gor Mahia ifite  igikombe cya shampiyona giheruka cya 2017.  Umukino wa mbere wa shampiyona ukaba warabaye tariki 03 Gashyantare 2018 aho Gor Mahia yatsinze Nakumatt ibitego 4-0.

Uretse uyu mukino, Tuyisenge ntabwo yagaragaye mu mukino  ubanza w’imikino y’Afurika y’amakipe yatwaye ibikombe iwayo “Total CAF Champions League 2018” aho  tariki 10 Gashynatare 2018, Gor Mahia yatsinze  Leones Vegetarianos yo muri  Guinea Equatorial  ibitego 2-0.

Aganira n’Imvaho Nshya  ejo hashize tariki 11 Gashyantare 2018, Tuyisenge Jacques yavuze ko yari amaze iminsi afite imvune gusa avuga ko ubu yatangiye imyitozo ko yizera ko mu minsi ya vuba agaruka mu kibuga. Ati “Natangiye imyitozo ndumva n’umukino wa shampiyona dufite muri iki cyumweru nshobora kuwukina”.

Uyu mukino wa kabiri wa shampiyona ku ikipe ya Gor Mahia izawukina ku wa Kane tariki 15 Gashyanatare 2018 aho izakina n’ikipe ya Zoo Kericho. Tuyisenge akaba aramutse akinnye uyu mukino yazanajyana n’iyi kipe ya Gor Mahia muri Guinea Equatorial  gukina umukino wo kwishyura n’ikipe ya  Leones Vegetarianos. Gor Mahia niramuka ikomeje izahura n’ikipe izakomeza hagati ya  ASAC Concorde  yo muri Maurtania na  Espérance de Tunis yo muri Tunizia zo zanganyije igitego 1-1 mu mukino ubanza.

 

 

TANGA IGITEKEREZO

Leave a Reply

Be the First to Comment!

avatar