20°C , Partly sunny | Kigali-Rwanda

Turiho kugira ngo dukosore amateka yacu-Kayisime

Yanditswe na MUTUNGIREHE SAMUEL

Ku ya 16-04-2018 saa 07:16:34

Umuyobozi w’Akarere ka Nyarugenge, Nzaramba Kayisime yatangaje ko buri wese afite inshingano zo kugira uruhare mu gukosora amateka yagejeje u Rwanda kuri Jenoside yakorewe Abatutsi mu 1994, bityo kwibuka ni inzira iboneye yo gukosora ayo mateka.

Nzaramba Kayisime, Umuyobozi w’Akarere ka Nyarugenge acana urumuri rw’ikizere mu murenge wa Kimisagara mu muhango wo kwibuka ku nshuro ya 24 Jenoside yakorewe Abatutsi mu 1994

Yabitangaje mu mpera z’icyumweru gishize, tariki ya 14 Mata 2018, ubwo yasozaga icyumweru k’icyunamo ku nshuro ya 24 Jenoside yakorewe Abatutsi mu 1994 ku rwego rw’Umurenge wa Kimisagara, muri ako karere.

Yagize ati “Uyu munsi niba turi aha ngaha dufite impamvu yo kwibuka; icya mbere twibuka kugira ngo abacitse ku icumu basubizwemo imbaraga, bumve ko duhari n’ubuyobozi, nk’abaturanyi, twese nk’abanyarwanda, nk’ingobyi iduhetse kugira ngo tumenye ko batazongera ukundi kuvutswa uburenganzira bwabo.

Turi hano twibuka kugira ngo tubasubize agaciro kandi tubabwire ko ikivi basize twebwe tuzacyusa rwose. Turi hano kugira ngo amateka yacu uko ameze kose tumenye nuko yagenze ariko dufite inshingano zo kugira ngo tuyakosore, abadukomokaho bazabyumve nk’amateka ariko bidashobora kugaruka ukundi.”

Yakomeje avuga ko mu gihe cyo kwibuka abantu bose bakwiye kumva ko ari inshingano kugira ngo bamenye amateka y’igihugu neza maze afashe n’abagifite ingengabitekerezo ya Jenoside kuva muri ubwo buzima.

Ati “Birakwiye rero ko ayo mateka tuyamenya kugira ngo nabo tubafashe kubavana muri uko kuzimu barimo, muri urwo rwobo kuko uyu munsi twavuga ko ari bo basigayeyo. Bave ibuzimu bage ibumuntu kuko nta cyo barimo bakora n’ibyo bitekerezo byabo, nta n’icyo bizabagezaho.”

Yagarutse by’umwihariko ku mateka y’Umurenge wa Kimisagara, mu gihe cya Jenosise, aho umugore wayoboraga Segiteri ya Kimisagara yabaye urugero rubi rw’ubuyobozi butifuzwa i Rwanda.

Ati “Uyu munsi aho twaje kwibuka ku nshuro ya 24, mu murenge wa Kimisagara, hari byinshi  twibuka muri uyu murenge byatewe n’ubuyobozi bubi; ni amateka maremare twagiye duhabwa ibiganiro bitandukanye bijyanye n’amateka yacu, n’ubudasa muri Jenoside yakorewe Abatutsi mu 1994, bijyanye n’aho tugeze twiyubaka, ibyo umaze kugeraho byose ariko uyu murenge by’umwihariko habayemo ubwicanyi bw’indengakamere.

Ubundi tumenyereye ko umugore ari umubyeyi, agira impuhwe, ari nyina w’abana barenze abo yavanye mu nda ye. Umugore wari Konsiye w’uyu murenge, Karushaka Rose, hari byinshi yakoze mu by’ukuri nta bwo twavuga ko yari akiri umugore ahubwo yari ‘inyamaswamuntu’ kuko n’inyamaswa zagize impuhwe muri Jenoside yakorerwaga Abatutsi. Kubona ubutegetsi bubi aho kugira ngo burinde abana babwo, aho kugira ngo igihugu kirindwe n’ubuyobozi ahubwo ni bwo bwa mbere bwafashe iya mbere kugira ngo babice, ubundi ntibyari bikwiriye.”

Yashimiye ingabo zabohoye igihugu, zari iza APR, ku mutima wa kimuntu bari bafite ubwo biyemezaga gutabara abana b’u Rwanda ubwo bicwaga.

Mu buhamya bwatanzwe n’umusaza Ntiyamira Frodouard, utuye mu murenge wa Kimisagara ubu na mbere ya Jenoside ari naho yarokokeye, yavuze ko mbere gato ya Jenoside uwo Karushara yagezeho akajya ategeka abibumbiye muri “Hutu Power” kwica Abatutsi ku manywa y’ihangu bitaramenyekana ko ari Jenoside yeruye igiye kuba.

TANGA IGITEKEREZO

Leave a Reply

Your email address will not be published. Required fields are marked *