26°C , Partly sunny | Kigali-Rwanda

Turibuka tuzirikana Politiki mbi yahekuye igihugu-Makuza

Yanditswe na KAYITARE JEAN PAUL

Ku ya 14-04-2018 saa 10:41:57

Perezida wa Sena Hon. Makuza Bernard yatangaje ko Abanyarwanda bibuka bazirikana Politiki y’ubuyobozi bubi yahekuye igihugu.

Yabigarutseho ejo hashize tariki 13 Mata 2018 ubwo hasozwaga icyumweru k’icyunamo mu muhango wo kwibuka Abanyapolitiki bishwe muri Jenoside yakorewe Abatutsi bazizwa ibitekerezo byabo bashyinguye mu Rwibutso rwa Rebero.

Hagati ni Perezida wa Sena Hon Makuza Bernard, ibumoso ni Minisitiri w’Umuco na Siporo Uwacu Julienne na Prof Dusingizemungu Jean Pierre Perezida wa Ibuka bashyira indabo ku rwibutso (Foto James R)

Hon Makuza avuga ko abanyapolitiki kubibuka ari ukuzirikana uko politiki y’ubuyobozi bubi yahekuye igihugu.

Ati: “Turazirikana uko politiki y’ubuyobozi bubi yahekuye igihugu cyacu, twunamira ibitambo by’abanyapolitiki nyabyo bazize guhagaragara ku bitekerezo byubaka bizima. Iyo abanyapolitiki nk’aba twibuka bashyinguye hano baba benshi, Jenoside yakorewe abatutsi ntiba yarabayeho cyangwa se ngo igire ubukana ku rwego yakozwemo igahitana abarenga miliyoni nkuko tubizi.”

Avuga ko isomo Abanyarwanda bavana mu mateka ya Jenoside yakorewe abatutsi ari uko yateguwe kandi igashoboka bitewe nuko yabanje kwigishwa mu banyarwanda bose.

Abahagarariye imitwe ya politiki mu Rwanda na bo bibutse abanyapolitiki bishwe muri Jenoside yakorewe Abatutsi (Foto James R)

Urwibutso rwa Rebero rushyinguwemo abazize Jenoside bagera ku bihumbi 14 n’abanyapolitiki 12 biciwe mu bice bitandukanye byo mu mujyi wa Kigali.

Hon Makuza yibukije abo mu miryango y’abanyapolitiki bashyinguye ku i Rebero ko batari bonyine.

Asobanura ko mu minsi 100 yo kwibuka, ari umwanya wihariye wo gusubiza icyubahiro gikwiye abatutsi bishwe muri Jenoside ndetse bakicwa urw’agashinyaguro.

Ati: “Buri gihe bikwiye kutubera umwanya nyawo wo kwibaza, kwibukiranya cyangwa gusubiramo impamvu yatumye bibaho, bigenda uko byagenze. Kwibuka abazize Jenoside ni uburyo budasanzwe, bituruka mu mateka ya vuba y’igihugu cyacu kandi yabaye mabi bishingiye kuri politiki mbi y’ivanguramoko yimakajwe byatugejeje kuri Jenoside yakorewe abatutsi.”

Umuvugizi w’Ihuriro ry’Igihugu Nyunguranabitekerezo ry’Imitwe ya Politiki, Depite Mukamana Elisabeth yavuze ko iri huriro ryifatanyije n’Abanyarwanda bose kwibuka abazize Jenoside yakorewe abatutsi mu 1994.

Ati: “Turibuka by’umwihariko abanyapolitiki bishwe muri Jenoside yakorewe abatutsi bakazira ibitekerezo byabo bya politiki. Nkuko insanganyamatsiko y’uyu mwaka ibivuga Twibuke Twiyubaka, ni ngombwa ko natwe twibuka abanyapolitiki dukomeza kubaka igihugu cyacu, duteza imbere imiyoborere myiza.”

Kanyange Phoebe Perezida w’Ishyaka ry’Ubwisungane bugamije Iterambere aributsa bagenzi be kwimakaza umuco wo kurwanya ingengabitekerezo ya Jenoside.

Ati “Turashishikariza abandi banyapolitiki kwibuka biyubaka bibuka amateka yaranze iki gihugu, turebe aho tuvuye n’aho tujya turwanya ingengabitekerezo ya Jenoside.”

Abanyapolitiki 12 bibutswe harimo Joseph Kavaruganda, Landouard Ndasingwa, Kabageni Venantie, Charles Kayiranga,  Jean de la Croix Rutaremara, Augustin Rwayitare, Aloys Niyoyita, André Kameya, Frederic Nzamurambaho, Felicien Ngango, Faustin Rucogoza na Jean Baptiste Mushimiyimana.

 

TANGA IGITEKEREZO

Leave a Reply

Be the First to Comment!

avatar