22°C , Partly cloudy | Kigali-Rwanda

Turashima ubwitabire bwaranze urubyiruko mu cyunamo-Nzamwita

Yanditswe na SEZIBERA ANSELME

Ku ya 16-04-2018 saa 07:19:08

Umuyobozi w’Akarere ka Gakenke Nzamwita Deogratias arashima uburyo abana n’urubyiruko bitabiriye ibiganiro mu gihe k’icyunamo kuko aribo b’ahazaza heza h’u Rwanda, akanashima ababyeyi bamaze guhindura imyumvire no gufasha abana kumenya amateka y’igihugu cyabo.

Nk’uko Nzamwita abitangariza Imvaho Nshya, avuga ko mu kwibuka ku nshuro ya 24 Jenoside yakorewe Abatutsi, abaturage ba Gakenke baranzwe no kwitabira ibiganiro mu buryo budasanzwe, ariko by’umwihariko hagaragara impinduka kuko abana n’urubyiruko babigaragayemo ku bwinshi.

Umuyobozi w’Akarere ka Gakenke Nzamwita Deogratias mu muhango wo gusoza icyumweru k’icyunamo

Nzamwita asanga ari intambwe nziza imaze kugenda iterwa kuko abana n’urubyiruko aribo bakeneye gusobanukirwa cyane n’amateka y’ukuri ku gihugu cyabo kurusha abakuru kandi bategerejweho umusaruro mwiza.

Asanga ababyeyi bageze ku rwego rwiza mu gushishikariza abana babo kumva amateka igihugu cyanyuzemo bitandukanye n’abajyaga bayagoreka bakabeshya abakiri bato. Ikindi ngo bigaragaza ko abaturage bamaze kumvira ubuyobozi kuko bwagiye bubibakangurira mbere y’uko icyunamo gitangira.

Mu bindi Nzamwita agarukaho n’uburyo abaturage bagenda bahinduka cyane birinda icyabazanamo ingengabitekerezo ya Jenoside kuko muri iyo minsi 7 y’icyunamo hagaragaye icyaha kimwe gifitanye isano n’ingengabitekerezo ya Jenoside nacyo kirimo kugenzurwa n’inzego zibishinzwe ngo harebwe impamvu yacyo n’icyo cyari kigamije.

Agira ati: Urebye nta bindi byaha byerekeranye n’ingengabitekerezo byagaragaye mu cyumweru k’icyunamo usibye kimwe cyabereye mu kagali ka Rutenderi mu murenge wa Mugunga umugore warokotse Jenoside yakorewe Abatutsi yabwiwe na muramu we ngo ibihe byanyu byageze”.

Nzamwita asaba abaturage ba Gakenke gukomeza kwitabira n’ibindi bikorwa biteganyijwe muri iyi minsi 100igikomeza, bakirinda icyakomeretsa abarokotse Jenoside bagezweho n’ingaruka mbi za Jenoside ahubwo bakarangwa no kubaba hafi bakabafasha kwihangana babahumuriza.

Bimwe mu bikorwa biteganywa mu minsi 100 yo kwibuka Jenoside yakorewe Abatutsi mu karere ka Gakenke harimo kwibuka abiciwe mu bitaro bya Nemba, no kwibuka ikiciro cy’abarimu n’abanyeshuri bishwe muri Jenoside.

 

TANGA IGITEKEREZO

Leave a Reply

Be the First to Comment!

avatar