23°C , Partly cloudy | Kigali-Rwanda

Turahirwa Moses muri 5 bazahugurirwa muri Nigeria ku bucuruzi mu mideri

Yanditswe na Ndamyirokoye François

Ku ya 13-02-2020 saa 09:49:13
Turahirwa Moses nyiri Moshions

Utunganya imideli Turahirwa Moses washinze inzu y’imideri ya ‘Moshions’ yabonetse muri batanu bazahabwa amahugurwa ajyanye n’ibyo bakora bashobora no kuboneka mu bazamurika imideri muri ‘Lagos Fashion Week’ yo muri Nigeria.

Abategura iki gikorwa bavuze ko aya mahugurwa azafasha aba batanu batoranyijwe mu bijyanye no kwaguka mu bucuruzi bw’imideri.

Abahatanaga bose biyandikishije bavuye mu bice bitandukanye byo muri Afurika.

Ku rundi ruhande batanu batowe hashingiye ku ngufu zabo mu guhanga udushya n’ibijyanye n’iyamamaza bikorwa byose bisuzumwa n’ikipe y’Abakemurampaka, kandi hanabayeho n’uburyo bwo kubazwa muri Heineken Lagos Fashion week 2019.

Iyi gahunda imara umwaka umwe yashizweho mu gufasha abakora imideri kugira ngo bakorere mu murongo uhamye byose biganisha mu kwaguka k’ubu bushabitsi.

Batanu bageze mu kiciro cya nyuma ni Taju Ibrahim Umuyobozi w’inzu yitwa ‘TJWho’ ikorera muri Nigeria, Kadiata Diallo washinze inzu y’imideri  ‘Niuku’ yo Mauritania, David Dodoo w’inzu y’imideli ‘Chiip O’Neal’ yo muri Ghana, Elfreda Fakoya washinze inzu y’imideri  ‘Elfreda’ yo muri Nigeria ndetse na Moise Turahirwa washinze  inzu y’imideri ya ‘Moshions’.

Turahirwa yanditse kuri konti ye ya Twitter, avuga ko yishimiye kuba ari umwe mu bagiye guhabwa aya mahugurwa azabafasha kunoza ibyo bakora.

Yashimye bane bagereranye mu kiciro cya nyuma agira ati “Nshimiye n’abandi bane twageranye mu kiciro cya nyuma. Twese dufatanye guteza imbere uruganda rw’ubugeni”.

Aya mahugurwa azajya ayakora ari mu Rwanda rimwe na rimwe age muri Nigeria.

Mu 2019 mu banyarwanda bitabiriye kumurika imideri muri Lagos Fashion Week harimo n’inzu y’imideri ya Haute Baso.

Moshions ni inzu y’imideri iri mu zikomeye mu Rwanda ikaba yarashinzwe na Turahirwa Moses ari na we muyobozi wayo kuri ubu. Inzu ya Moshions izwi cyane mu gukora imishanana yambarwa n’abasore mu mihango yo gusaba no gukwa.

Turahirwa Moses  uretse kuba afite iyo nzu ikora imyambaro ijyanye n’imideri yagiye atsindira ibihembo bitandukanye.

Umwanditsi:

Ndamyirokoye François

Tanga Igitekerezo

Email yanyu ntigaragazwa ku rubuga. Amazina na Email ni ngombwa.