22°C , Partly sunny | Kigali-Rwanda

Tunoze ubuhinzi: Uko umuhinzi yakora umuti w’imyaka mu nyabarasanya

Yanditswe na Tumukunde Georgine

Ku ya 09-10-2019 saa 10:44:29
Inyabarasanya ivamo umuti wica udukoko twangiza imyaka

Inyabarasanya (Bindens Pilosa) ni ikimera kimenyerewe mu muco nyarwanda kuko cyakunze gukoreshwa mu buvuzi gakondo mu kwivura ibikomere. Hari n’ibindi bihugu bitandukanye bikoresha iki cyatsi mu buvuzi gakondo bw’indwara zitandukanye.

Iki kimera cyavumbuweho no kurwanya udukoko twangiza imyaka. Ni icyatsi gikura kikareshya nibura na m1, kikagira uturabo duto turabya, tugahunguka hagasigaraho ibyitwa ibishokoro (ibishodeko) usanga bifata ku myenda iyo umuntu abyegereye, ni na byo bihunguka bikongera bikamera.

Gukoresha inyabarasanya nk’umuti wica udukoko biri mu buryo bwiza bwo kugabanya igishoro mu buhinzi kuko ugabanya kugura imiti ya kizungu, ukanirinda ingaruka zishobora guturuka kuri iyo miti,  kwirinda ko udukoko tumenyera iriya miti, ukabungabunga ibidukikije hakaboneka n’umusaruro mwiza utarahuye n’iriya miti yo mu nganda.

Iyo ushaka gukora umuti wifashisha imbuto, amababi cyangwa imizi y’iki cyatsi.  Uburyo bwa mbere ni ugufata imbuto zuzuye itasi y’icyayi, ukuzuza amazi muri iyo tasi ukabivanga hanyuma ugacanira iminota 10 cyangwa ukabitereka ahantu bikamara amasaha 24. Nyuma ukongeramo amazi angana na ritiro 1 ugashyiramo n’agasabune katari omo kuzuye ikiyiko hanyuma ugatera ku gihingwa.

Ushobora kandi gufata igitebo cy’amababi n’amashami y’iki gihingwa akiri mabisi, ukayakatamo uduce dutoya, ukayashyiramo amazi ahwanye n’uko bingana. Ubitogosa mu gihe k’iminota 10 cyangwa bikamara amasaha 24 mu mazi, ukaba wabikoresha nk’umuti wica udukoko. Ritiro 10 zishobora guterwa kuri ari imwe y’umurima.

Ubundi buryo ushobora gukoramo umuti ukoresheje inyabarasanya ni ugukikiza imbuto zayo ku mpande z’igihingwa kugira ngo udukoko duhunge, wanasekura imizi y’iki kimera amazi avuyemo ukayatera ku gihingwa.

Uyu muti uva mu nyabarasanya ugira imbaraga zo kurwanya uduhumyo dutandukanye ku bihingwa nk’utwitwa “Milidiou”.

Minisiteri y’Ubuhinzi n’Ubworozi ivuga ko uretse inyabarasanya, hari  n’ikindi kimera kitwa Umuhengeri (Lantana Camara) kivamo umuti, uretse ko ho hiyongeraho ko kwanika amababi yacyo ukayasya ugakoresha ifu  cyangwa ugatwika amashami yacyo maze ugatera ivu ku gihingwa. Uyu muti wirukana udukoko two mu bwoko bw’inigwahabiri, inzukira, inzige, ibihore, utunyugunyugu n’ibindi.

Umwanditsi:

Tumukunde Georgine

Tanga Igitekerezo

Email yanyu ntigaragazwa ku rubuga. Amazina na Email ni ngombwa.