22°C , Mostly cloudy | Kigali-Rwanda

Tuniziya iratinya kwakira izindi mpunzi za Libiya kubera umutekano muke

Yanditswe na Kayira Etienne

Ku ya 13-01-2020 saa 11:50:15
Kaïs Saïed Perezida wa Tunizia (iburyo) na mugenzi we Erdogan wa Turikiya ku wa 25 Ukuboza 2019 i Tunis

Leta ya Tunizia ifite impungenge ko impunzi ziva mu gihugu cya Libiya zakiyongera kubera umutekano muke wongeye kwiyongera guhera mu byumweru bibiri bishize.

Camille Lafrance, umunyamakuru ukorera Radio Mpuzamahanga y’u Bufaransa muri Tunizia atangaza ko kubera intambara yongeye kubura mu gihugu cya Libiya hagati y’abarwanyi ba Maréchar Haftar, n’ingabo za Guverinoma y’ubumwe bw’Abanyalibiya,  Leta ya Tunis ifatanyije n’imiryango y’imbere mu gihugu n’imiryango mpuzamahanga ngo bashyizeho uburyo bw’ubutabazi bwihuse kugira ngo impunzi ziramutse zisutse ari nyinshi zibone ubutabazi uhereye ku mupaka.

Lafrance ati «Intambara ibera muri Libiya ihangayikishije bikomeye Tunizia kuva Maréchar Haftar abyukije imirwano muri Mata 2019, kubera ko ari igihugu k’igituranyi». RFI itangaza ko ibintu byarushaho kuba bibi cyane, Tunizia iramutse yohereje muri Libiya ingabo zayo kujya gutabara uruhande rwa Guverinoma y’Ubumwe bw’igihugu. Icyakora, Perezidansi ya Tunizia ngo yagaragaje ko ifite ubushake bwo gushakira umuti urambye iyo ntambara bitabaye ngombwa kugira uruhande ibogamiraho.

RFI iti «Intambara ibera muri Libiya iragenda ifata intera yo ku rwego Mpuzamahanga kubera ibihugu bikomeye birimo Turikiya bishaka kuyigiramo uruhare. Nyamara Perezida Kaïs Saïed wa Tunizia we, aherutse gutangaza ko ikimuhangayikishije ari ugushakira Libiya amahoro n’umutekano birambye». Abadepite mu Nteko Ishinga Amategeko ya Tunizia bo ariko bagaragaje impungenge ko Igihugu cyabo cyagira uruhande gitabara, ngo ejo ugasanga bibakururiye ibibazo bikomeye.

Tunizia ngo ifite ishingiro ryo gutinyishwa n’intambara ibera muri Libiya kuko mu 2011 ngo yakiriye impunzi zigera kuri miriyoni imwe mu gihe gito.

Ikigaragaza ko ibihugu by’amahanga birimo byisuganya kugira icyo bikora ku ntambara ibera muri Libiya, nk’uko byemezwa na RFI, ni uko ku wa Kane w’icyumweru gishize ba Minisitiri b’Ububanyi n’Amahanga b’ibihugu by’u Bufaransa na Arabiya Sawudite bahuriye i Tunis mu biganiro kuri kiriya kibazo. Mu Kuboza Perezida Erdogan wa Turikiya nawe yagiye kubonana na mugenzi we wa Tunizia kugira ngo barebere hamwe icyakorwa kuri iriya ntambara. Perezida mushya wa Algérie na mugenzi we wa Misiri hamwe n’u Butaliyani na bo ngo barahuye bavugana ku by’iyo ntambara, bigaragara ko hatabayeho kumvikana Libiya yaba isibaniro ry’ingabo z’amahanga nk’uko bimeze muri Siriya na Irak.

Biriya bihugu byose biriyerurutsa bikavuga ko intambara ihagarara hagakorwa ibiganiro bigamije amahoro arambye, ariko maréchar Haftar we akavuga ko akomeje urugamba kabone n’ubwo yemera no kuganira.

Umwanditsi:

Kayira Etienne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.