18°C , Mostly cloudy with thunderstorms | Kigali-Rwanda
HABIMANA AUGUSTIN

Tumenye imiterere n’imikoreshereze y’ibendera ry’igihugu cyacu

Yanditswe na HABIMANA AUGUSTIN

Ku ya 19-02-2018 saa 08:41:14

Ibendera ni kimwe mu birango bikomeye by’Igihugu, ni yo mpamvu imiterere n’imikorereshereze yaryo igenwa n’itegeko, ikaba igomba kubahirizwa na buri wese kandi uyirenzeho agahanwa.

HABIMANA AUGUSTIN

Nk’uko biteganywa n’ingingo ya 9 y’Itegeko Nshinga rya Repubulika y’u Rwanda ryo mu 2003 ryavuguruwe mu 2015, Ibiranga Igihugu cy’u Rwanda ni ibendera, intego, ikirango cya Repubulika n’indirimbo y’Igihugu.

Imiterere n’imikoreshereze y’indirimbo y’Igihugu cyacu, tuyisanga mu itegeko n°34/2008 ryo kuwa 08/08/2008 rigena imiterere, ibisobanuro, imikoreshereze n’iyubahirizwa y’Ibendera ry’Igihugu ryasohotse mu Igazeti ya Leta ya Repubulika y’u Rwanda n°16 yo ku wa 20/04/2009 nk’uko ryahinduwe kandi ryujujwe n’Itegeko n°06/2013 ryo ku wa 27/02/2013 rihindura kandi ryuzuza itegeko n°34/2008 ryo ku wa 08/08/2008 rigena imiterere, ibisobanuro, imikoreshereze n’iyubahirizwa by’ibendera ry’igihugu, ryasohotse mu igazeti ya Leta ya Repubulika y’u Rwanda nº 10 yo ku wa 11 Werurwe 2013.

Nk’uko bisobanurwa muri ayo mategeko yombi Ibendera ry’Igihugu cyacu rigizwe n’amabara atatu (3) akurikira: icyatsi kibisi, umuhondo n’ubururu.

Uvuye hasi uzamuka: habanza ibara ry’icyatsi kibisi, rikurikirwa n’ibara ry’umuhondo, kandi ayo mabara yombi yihariye icya kabiri cy’ibendera ryose. Igice cya kabiri cyo hejuru kigizwe n’ibara ry’ubururu rishushanyijwemo izuba n’imirasire yaryo y’ibara ry’umuhondo wa zahabu riri ku ruhande rw’iburyo. Iryo zuba n’imirasire yaryo bitandukanyijwe n’uruziga rw’ibara ry’ubururu.

Amabara y’Ibendera ry’Igihugu afite ibisobanuro bikurikira:

Icyatsi kibisi: Gisobanura ikizere cy’uburumbuke hakoreshejwe neza imbaraga z’Abanyarwanda n’ibiri mu Rwanda.

Umuhondo: Usobanura ubukungu. Abanyarwanda bagomba guhagurukira umurimo kugira ngo bagere ku bukungu burambye.

Ubururu: Busobanura umunezero n’amahoro. Abanyarwanda bagomba guharanira amahoro azabageza ku bukungu burambye n’umunezero

 Izuba n’imirasire by’umuhondo wa zahabu: Bisobanura urumuri rugenda rwiyongera rumurikira bose. Byerekana ubumwe, gukorera mu mucyo no kurwanya ubujiji.

Ibendera rya Repubulika y’u Rwanda rikorwa mu buryo butandukanye bukurikira: Ibendera ry’Igihugu rinini n’Ibendera ry’Igihugu ritoya. Ingero za buri bendera zigenwa n’Iteka rya Minisitiri ufite uburinzi bw’Ibendera ry’Igihugu mu nshingano ze.

Aya mategeko asobanura kandi ko Ibendera ry’Igihugu ni umutungo wa Leta. Umuntu wese, yaba Umunyarwanda cyangwa Umunyamahanga, imiryango itari iya Leta ifite ubuzima gatozi, amasosiyete n’amakoperative bifite ubuzima gatozi byemerewe gutunga no gukoresha Ibendera ry’Igihugu bubahiriza ibiteganywa n’amategeko. Abo kandi bashobora gukora, gutunga no gukoresha ibisa n’Ibendera ry’Igihugu mu buryo budatesha agaciro Ibendera ry’Igihugu.

Ibendera ry’Igihugu rinini rizamurwa imbere y’inzu z’ubutegetsi n’ahantu hagenwe gukorerwa imihango y’Igihugu n’inzego zibifitiye ububasha cyangwa ahandi hateganywa n’amategeko. Icyo rizamuyeho kigaragara mu ruhande ruteganye n’aho izuba rishushanyije.

Ibendera ry’Igihugu rinini rishyirwa kandi mu biro by’abayobozi mu nzego za Leta hubahirizwa amabwiriza ya Minisitiri ufite uburinzi bw’Ibendera ry’Igihugu mu nshingano ze.

Ibendera ry’Igihugu kandi ntabwo ryururutswa keretse iyo: ricitse; rishaje; ryanduye; ricuyutse cyangwa imihango ryakoreshejwemo irangiye.

Ku bijyanye no kurahira, umuntu wese urahira imbere y’Ibendera ry’Igihugu arahira arifatishije ikiganza cy’ibumoso azamuye ukuboko kw’iburyo akarambura ikiganza hejuru. Umuntu ufite ubumuga usabwa kurahira adashobora kubahiriza ibisabwa nk’uko bimaze kuvugwa, muri icyo gihe  araryambikwa.

Ku bemerewe n’Iteka rya Perezida ko bagomba gukoresha Ibendera ry’Igihugu mu gihe cyo gushyingurwa, icyo gihe hakoreshwa Ibendera ry’Igihugu rinini mu gutwikira isanduku irimo umurambo. Icyo gihe Ibendera ry’Igihugu rigomba kugerekwa hejuru y’isanduku ridakora ku butaka kandi ntihagire ikintu kigerekwa hejuru yaryo. Mu gihe cyo kururutsa umurambo mu mva Ibendera ry’Igihugu rikurwaho.

 

Ayo mategeko nk’uko twayavuze haruguru ateganya ko Ibendera ry’Igihugu rigomba gufatwa neza, haba mu bubiko cyangwa mu gihe rikoreshwa mu mihango inyuranye kugira ngo ritangirika. Igihe ibendera ryangiritse, ricitse, ryanduye rishaje cyangwa ricuyutse, rigomba gusimbuzwa irindi vuba.

Birabujijwe kandi gutegura Ibendera ry’Igihugu ku meza y’inama kimwe n’ahandi hantu hose rishobora kurambikwaho ibintu hejuru.

Mu gihe Ibendera ry’Igihugu rizamuye hamwe n’iry’ishyirahamwe, iry’Igihugu rizamurwa mbere kandi rikururutswa nyuma. Naho mu gihe Ibendera ry’Igihugu rizamuwe hamwe n’andi mabendera ahasengerwa, iry’Igihugu rijya iburyo bw’usengesha, andi yose akajya ibumoso bwe. Nanone mu gihe Ibendera ry’Igihugu ritambagijwe hamwe n’irindi bendera, iry’u Rwanda rigomba kuba iburyo muri iryo tambagizwa. Iyo ritambagijwe hamwe n’andi mabendera ari ku murongo utambitse, rishyirwa imbere y’iriri hagati y’uwo murongo.

Buri muntu agomba kubaha Ibendera ry’Igihugu, kuko igitabo cy’amategeko ahana ibyaha giteganya igifungo ndetse n’izahazabu ku muntu wese ukora ibinyuranyije n’ibiteganywa n’aya mategeko twavuze, yaba ukoresheje nabi ibendera ry’Igihugu, utubahiriza Ibendera ry’Igihugu n’ukoresheje nabi uburenganzira bwo gutunga no gukoresha amabara y’ibendera ry’Igihugu.

 

 

TANGA IGITEKEREZO

Leave a Reply

Be the First to Comment!

avatar