18°C , Partly sunny | Kigali-Rwanda
Perezida wa FERWACY, Bayingana aratangaza ko muri iyi myaka 4 iri imbere bagiye gufasha amakipe gutera imbere

Tugiye kwita cyane ku makipe y’imbere mu gihugu-Bayingana

Yanditswe na BIZIMANA ERIC

Ku ya 02-04-2018 saa 09:16:17

Nyuma yo kongera gutorererwa kuyobora ishyirahamwe ry’umukino w’amagare “FERWACY”, Bayingana Aimable aravuga ko ingufu ze zose agiye kuzishyira ku makipe y’imbere mu gihugu.

Perezida wa FERWACY, Bayingana aratangaza ko muri iyi myaka 4 iri imbere bagiye gufasha amakipe gutera imbere

Ni mu gihe amakipe 9 ariyo yemewe ari yo Les Amis Sportifs (Rwamagana), Benediction Club (Rubavu), Nyabihu Cycling Club, Huye Cycling Club for All, Karongi Vision sports center, Kigali Cycling Club, Muhazi Cycling Club, Fly Cycling Club na Cine Elmay.

Aya makipe usanga agifite ibibazo by’amikoro byo kutabasha guhemba abakinnyi n’abatoza, kutagira amagare agezweho n’ibindi bitandukanye.

Bayingana aravuga ko imbaraga zigiye gushyirwa cyane mu gukomeza aya makipe. Ati “Tugendeye ku byo dufitemo intege nke, amakipe yacu afite intege nke n’ubwo yadufashije kubona abakinnyi badufashije kubona umwanya mwiza ariko biragaragara ko bagifite intege nke. Baracyakeneye ibikoresho, usanga uturere bakoreramo batabafasha bihagije. Ibyo ni byo dushaka kugira ngo dushyiremo imbaraga maze umukino wacu wandike izina ku buryo abantu bumva ko bakwiye kuwufasha”.

Akomeza agaragaza ko bazakorera ubuvugizi aya makipe banayafashe kugira ikerekezo kizatuma babasha kubona abafatanyabikorwa. Ati “Aya makipe tuzayafasha mu buvugizi, twumvikanishe ijwi ryabo kugira ngo babone ibikoresho, ibyo bikoresho bizadufashe kubona abakinnyi biyongereyeho kuko abakinnyi dufite bakiri bake. Ni cyo cya mbere tugiye gushyiramo imbaraga ku mwanya wa mbere”.

Umuyobozi wa FERWACY yanavuze ko bazakora ubuvugizi kugira ngo bateze imbere uyu mukino mu bagore. Ati “Abakinnyi b’abagore baracyari bake n’urwego rwabo ruracyari hasi nk’uko mwabibonye muri shampiyona y’ubushize tugereranyije n’ibihugu nka Ethiopia na Eritrea, natwe abakobwa turashaka kubazamura”.

 

TANGA IGITEKEREZO

Leave a Reply

Be the First to Comment!

avatar