21°C , Partly sunny | Kigali-Rwanda

Triathlon: Gashayija  yegukanye isiganwa i Nyagatare, hanemezwa gushinga ikipe

Yanditswe na BUGINGO FIDELE

Ku ya 15-03-2020 saa 16:07:07
Abitwaye neza mu byiciro byombi nyuma yo guhabwa ibihembo

Abagabo (55 km)
1. Gashayija Jean Claude 2h33’50”
2. Kamanzi Michel 2h47’02”
3. David Martz 2h48’10”

Abagore (55 km)
1. Robbin Martz 2h48’19”
2. Mutimucyeye Saidath 2h54’44”

Tariki 14 Werurwe 2020, ishyirahamwe ry’umukino  wa Triathlon mu Rwanda “RTF” ku bufatanye n’akarere ka Nyagatare  bateguye irushanwa  ku nshuro ya mbere rikomatanya imikino ibiri  ari yo kunyonga igare no kwiruka ku maguru “Nyagatare Duathlon 2020”.

Abakinnyi 8 barimo 6 mu bagabo na 2 mu bagore nibo bitabiriye iri rushanwa aho basiganwe intera ya kirometero 55 aho babanje kwiruka ku maguru  ibirometero 10, banyonga igare ibirometero 40 nyuma  basoza biruka ku maguru ibirometero 5.

Mu bagabo, Gashayija Jean Claude wegukanye irushanwa ryafunguye umwaka w’imikino ryabereye muri Kigali  ni we wegukanye umwanya wa mbere aho yakoresheje amasaha 2, iminota 33 n’amasegonda 55 mu gihe ku mwanya wa 2 haje Kamanzi Michel  wakoresheje amasaha 2, iminota 47 n’amasegonda 2 mu gihe ku mwanya wa 3 haje David Martz ukomoka muri Amerika wakoresheje amasaha 2, iminota 48 n’amasegonda 10.

Mu bagore, Robbin Martz  akaba ari umugore wa David Martz yegukanye umwanya  wa mbere aho yakoresheje amasaha 2, iminota 48 n’amasegonda 19 mu gihe  Mutimucyeye Saidath  yaje ku mwanya wa 2 akoresheje amasaha 2, iminota 54 n’amasegonda 44. Robbin Martz   akaba nawe yari yegukanye irushanwa rya Kigali ryabaye tariki 22 Gashyantare 2020.

Nyuma y’iri siganwa, Perezida  w’ishyirahamwe ry’umukino wa Triathlon mu Rwanda “RTF”, Mbaraga Alexis   yavuze ko muri rusange irushwa ryagenze neza n’ubwo rititabiriwe uko bikwiye  kubera ko i Nyagatare ari kure ya Kigali ndetse n’ikibazo k’icyorezo cya coronavirus.

Yagize ati : “Icyo twifuzaga cya mbere ni ugutangiza uyu mukino i Nyagatare  kandi byagenze neza. Dufite gahunda ndende kuko  turashaka ko irushanwa riba ngarukamwaka kandi hakaboneka abakinnyi benshi.”

Abaturage ba Nyagatare n’ubwo byari ubwa mbere bagaragaye ari bensh baje kwihera ijisho uyu mukino. Mbaraga avuga ko  bakoranye n’akarere    aba ari ko gashishikariza abatuye Nyagatare kuza kureba uyu mukino.

Nyagatare bemeje ko bagiye gushinga ikipe

Umuyobozi w’Akarere ka Nyagatare wungirije ushinzwe  imibereho y’abaturage, Musabyimana Donathe ari kumwe n’umuyobozi muri aka Karere  ushinzwe Siporo, Twahirwa Theoneste  nibo batangije iri siganwa.

Nyuma Twahirwa yavuze ko   mu bikorwa bya siporo bafite bagiye kongeramo umukino wa Triathlon ndetse ko mu minsi ya vuba bagiye gutangiza ikipe y’uyu mukino.

Umuyobozi wungirije w’akarere, Musabyimana Donathe yashimiye ishyirahamwe ry’uyu mukino kuba barahisemo kuza gukorera iri rushanwa muri Nyagatare abizeza ubufatanye mu  iterambere ry’uyu mukino. Uyu muyobozi yanaboneyeho umwanya wo gusaba abatuye Nyagatare  gukomeza kwirinda icyorezo cya coronavirus.

Perezida wa RTF, Mbaraga Alexis  yavuze ko iyo babonye umufatanyabikorwa nk’uyu biba aribyiza kuko aba abagiye kubafasha gusakaza uyu mukino hirya no hino. Ati : “Umuntu rero ufashe iya mbere agakora igikorwa nk’iki  ngira ngo mwabonye ko twabonye ibikoresho twahawe n’u Buyapani  tuzabahaho nyuma babihe abana  kugira ngo bazamure umukino.”

Ishyirahamwe ry’umukino  wa Triathlon mu Rwanda “RTF” bategura ibikorwa bitandukanye ku bufatanye  na Bralirwa binyuze mu kinyobwa cyayo cya Coca Cola ndetse na sosiyete y’ubwishingizi ya Sanlam.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.