19°C , Partly cloudy | Kigali-Rwanda

Tour du Rwanda 2019:  Kasperkiewicz  yegukanye intera ya 6 bihurirana  n’umunsi w’amavuko ye

Yanditswe na BUGINGO FIDELE

Ku ya Mar 1, 2019

Musanze-Nyamata (121,1 km)
1. Kasperkiewicz Przemyslaw 02h49’57”
2.Torres Pablo 02h50’00”
3. Reguigui Youcef 02h50’01”
4. Mulueberhan Henok 02h50’01”
5. Trarieux Julien 02h50’01”

Urutonde rusange (807.8 km)
1. Kudus Merhawi 20h24’53”
2. Taaramae Rein 20h25’10”
3. Badilatti Matteo 20h25’38”
4. Aguirre Ricardo 20h25’53”
5. Tesfom Sirak 20h29’07”

Imyanya Abanyarwanda bariho
08. Munyaneza Didier
09. Ndayisenga Valens
11. Areruya Joseph
12. Manizabayo Eric
20. Mugisha Samuel
33. Byukusenge Patrick
36. Nsengimana Jean Bosco
49. Mugisha Moise
52. Ruberwa Jean
56. Uwizeyimana Bonaventure

Tariki 02-03-2019
Nyamata-Kigali (84,1 km)

Kasperkiewicz Przemyslaw ukinira ikipe ya Delko Marseille mu Bufaransa akaba akomoka   muri Pologne ni we wegukanye intera ya  6 ya Tour du Rwanda  2019 yavaga i Musanze  ikagasorezwa i Nyamata mu karere ka Bugesera   bikaba byahuriranye n’isabukuru y’amavuko   kuko yujuje imyaka 25.

Kasperkiewicz Przemyslaw wegukanye intera ya 6 bigahurirana n’isabukuru ye y’amavuko

Iyi ntera  ya 6, abasiganwa bagombaga gusiganwa ibilometero 121.1,  Kasperkiewicz ukinana na Areruya Joseph  muri Delko Marseille yabashije kugera i Nyamata ari uwa mbere aho yakoresheje   amasaha 2, iminota 49 n’amasegonda 57. Yakurikiwe na  Torres  Pablo (02h50’00”), Reguigui Youcef (02h50’01”), Mulueberhan Henok (02h50’01”), Trarieux Julien  (02h50’01”). Muri iyi ntera , umukinnyi w’umunyarwanda waje hafi  ni Mugisha Samuel wegukanye Tour du Rwanda 2018  aho yasoje ari uwa 7 akoresheje amasaha 2, iminota 50 n’isegonda rimwe.

Kasperkiewicz ubwo yari ageze i Nyamata ari uwa mbere

Kasperkiewicz Przemyslaw  yatangiye Tour du Rwanda 2019 yitwara neza dore ko yasoje ku mwanya wa 3 mu ntera ya mbere  aho mugenzi we bakinana, Alessandro yabaye uwa   mbere ndetse anasoza ari uwa kabiri mu ntera ya kabiri yavaga Kigali yerekeza i Huye.

Nyuma yo kwegukana iyi ntera ya 6 yagize ati “ Nyuma yo kuza hafi mu ntera zibanza byari ngombw ako negukana iyi intera. Twatangiranye n’abandi ariko tugiye kugera   aho dusoreza navuze nti reka ngerageze amahirwe yange birankundira”.

Iyi akaba ari intera ya kabiri ikipe ya Delko Marseille yegukanye nyuma  y’iyo Alessandro yegukanye ku munsi wa mbere w’isiganwa.

Kudus akomeje kuyobora isiganwa

Kasperkiewicz Przemyslaw    yegukanye intera 6 ashyiramo ikinyuranyo  cy’umunota umwe n’amasegonda 19 kuri Merhawi Kudus  wari uyoboye isiganwa. Ibi ariko ntabwo byari gutuma amwambura umwanya wa mbere uko Kudus ubu ni we uyoboye  kuko mu bilometero 807.8 amaze gukoresha amasaha 20, iminota 24 n’amasegonda 53. Umukinnyi umukurikiye, Taaramae Rein   amurusha amasegonda 17.

Uyu mukinnyi wegukanye intera ya 6 ku rutonde rusange ari ku mwanya wa 41 aho hagati ye na Kudus harimo ikinyuranyo k’iminota 40 n’amasegonda 35.

Mu bakinnyi  10 b’abanyarwanda basigayemo uza hafi  ku rutonde rusange ni Munyaneza Didier uri ku mwanya wa 8 akaba asigwa na Kudus iminota 5. Abandi baza hafi ni Ndayisenga Valens (9), Areruya Joseph (11) , Manizabayo Eric  (12) na Mugisha Samuel (20).

Mu bihembo byatanzwe, Mugisha Moise ni we uyoboye  urutonde rw’abarusha abandi ahazamuka. Du Plooy Rohan  ukinira  Pro Touch yo muri Afurika y’Epfo ni we watanze abahandi ahari igihembo cya SP. Munyaneza Didier ni we mukinnyi ukiri muto akaba n’umunyarwanda urimo kwitwara neza. Merhawi Kudus uyoboye urutonde rusange ni nawe mukinnyi ukomoka muri Afurika urimo kwitwara neza.

Mu bindi, Torres Muiño Pablo ukinira ikipe ya Interpro Cycling Academy mu Buyapani  ni we wagaraje guhatana cyane mu ntera ya 6 ahabwa igihembo gitangwa na Rwanda Tea. Ikipe ya Eritrea ikaba  iri ku mwanya wa mbere iwambuye Astana yari ifite uyu mwanya kuva ku ntera kabiri.

Torres Muiño Pablo ukinira ikipe ya Interpro Cycling Academy mu Buyapani ni we wagaraje guhatana cyane mu ntera ya 6

Ikipe ya Eritrea ni iyo iyoboye kugeza ubu

Nyuma y’iyi ntera ya 6, abandi bakinnyi 2 barimo  Cheblaoui Oussama (Algerie)  na  Kipkembo (Kenya) bavuye mu irushanwa bivuze ko ubu hasigayemo abakinnyi 65 muri 78 batangiye irushanwa.

Harakinwa intera ibanziriza iya nyuma

Kuri uyu wa Gatandu tariki 02 Werurwe 2019 harakinwa intera ya 7 ari nayo ibanziriza iya nyuma. Abasiganwa bazahagurukira i Nyamata bagere muri Kigali (Kicukiro) banyure mu muhanda wa Gikondo bagere ku irebero bakomeza  Nyamirambo baciye mu  Miduha, Rwarutabura-SP bakomeze mu mujyi bakomeza Kinamba-Gisozi- Kabuga ka Nyarutarama- TV 1- Kinamba-Hotel Okapi basoreze imbere ya MIC. Aha bazasoza bakoze intera ya kilometero 84,1.