19°C , Partly cloudy | Kigali-Rwanda

Tour du Rwanda 2019: Debesay yegukanye intera ya 7, Kudus atakaza amasegonda 10

Yanditswe na BUGINGO FIDELE

Ku ya Mar 2, 2019

Nyamata-Kigali (84.1 km)

1. Debesay Yakob 02h12’35”
2. Fedeli Alessandro 02h12’56”
3. Guillonnet Adrien 02h12’56”
4. Tesfom Sirak 02h12’56”
5. Aguirre Ricardo 02h12’59”

Urutonde rusange (891.9 km)
1.Kudus Merhawi 22h38’21”
2. Taaramae Rein 22h38’28”
3. Badilatti Matteo 22h38’39”
4. Aguirre Ricardo 22h38’52”
5. Tesfom Sirak 22h42’03”

Imyanya Abanyarwanda bariho
09. Munyaneza Didier
10. Areruya Joseph
16. Ndayisenga Valens
19. Mugisha Samuel
22. Manizabayo Eric
35. Byukusenge Patrick
36. Nsengimana Jean Bosco
44. Mugisha Moise
53. Ruberwa Jean
55. Uwizeyimana Bonaventure

Tariki 03-03-2019
Kigali-Kigali (61,7 km)

Debesay Yakob ukinira ikipe ya Eritrea ni we wegukanye  intera ibanziriza iya nyuma ari yo ya 7   mu gihe  Merhawi Kudus yatakaje amasegonda 10 ku rutonde rusange bituma umukinnyi umukurikiye  harimo  amasegonda 7 gusa.

Muri iyi ntera 7 abasiganwa bahagurutse i Nyamata mu Karere ka  Bugesera banyura Kicukiro bakomeza kwa Gisimenti, Kimironko, Mu nganda, Nyandungu, Giporoso, Rwandex, Gikondo, Rebero, Nyamirambo, Kimisagara, Nyabugogo, Yamaha, Hotel Okapi, MIC, mu mujyi, Yamaha, Kinamba, Gisozi, Mu Kabuga ka Nyarutar,ama, TV 1-Polisi, Kinamba, Yamaha, Hotel Okapi, MIC aho basoje bakoze kilometero 84,1.

Debesay Yakob  yegukanye iyi ntera akoresheje amasaha abiri, iminota 12 n’amasegonda 35, ku mwanya wa kabiri haje  Fedeli Alessandro wegukanye intera ya mbere ya Tour du Rwanda 2019,   Guillonnet Adrien  na Tesfom Sirak bose bakoresheje amasaha 2, iminota 12 n’amasegonda 56.

Debesay Yakob wegukanye intera ya 7 ibanziriza iya nyuma muri Tour du Rwanda 2019

Mugisha Moise ukinira ikipe y’u Rwanda ni we wabashije kuza hafi mu bakinnyi b’u Rwanda kuko yasoreje ku mwanya wa 9 akoresheje amasaha 2, iminota 13 n’amasegonda 13.

Debesay Yakob  ufite imyaka  19 ni we wegukanye irushanwa ry’Afurika mu batarengeje imyaka 23 ryabereye muri Cameroun muri Gashyantare 2019. Nyuma yo kwegukana iyi ntera ya 7 muri Tour du Rwanda 2019 , Debesay Jakob  yavuze ko yishimiye iyi nsinzi ije yiyongera ku yo muri Cameroun kuko iri ari irushanwa rikomeye. Ati “Gutsinda intera muri Tour du Rwanda iri kuri uru rwego ni ishema rikomeye.”

Mbere yo kwegukana intera, Debesay Yakob yagenze ari wenyine ibilometero 30

Kudus yatakaje amasegonda 10

Nyuma yo kugwa  ubwo hakinwaga intera ya 7, Merhawi Kudus ukinira Astana akaba akomoka muri Eritrea yatakaje amasegonda 10 ku rutonde rusange bituma umukinnyi wa Direct Energie yo mu Bufaransa, Taaramae Rein amusatira cyane  bishobora gutuma atakaza umwanya wa mbere yafashe ku ntera ya kabiri yavaga i Kigali igera i Huye.

Merhawi Kudus ni we ukomeje kuyobora urutonde n’ubwo yatakaje amasegonda 10

Mu ntera ya 7, Kudus yasoje ku mwanya wa 13  aho yakoresheje amasaha 2, iminota 13 n’amasegonda 28 akaba yaraje inyuma ya Taaramae Rein we wakoresheje  amasaha 2, iminota 13 n’amasegonda 18.

Kugeza ubu mu bilometero  891.9, Merhawi Kudus amaze gukoresha amasaha 22, iminota 38 n’amasegonda 21 naho  Taaramae Rein we amaze gukoresha amasaha 22, iminota 38 n’amasegonda 28.  Abandi baza hafi ni  Badilatti Matteo (22h38’39”), Kudus arusha amasegonda 18 na  Aguirre Ricardo (22h38’52”) arusha amasegonda 31.

Ibi bikaba byerekana ko Merhawi Kudus agomba gukoresha imbaraga nyinshi mu ntera ya nyuma kugira ngo aba  bakinnyi  hatagira ukuramo ibi  bihe akaba ari we wegukana Tour du Rwanda 2019.

Umukinnyi w’umunyarwanda uza hafi ni Munyaneza Didier ukinira Benediction Excel Energy uri ku mwanya wa 9 akaba arushwa na Kudus iminota 6 n’amasegonda 47.

Debesay yihariye ibihembo

Nyuma yo kwegukana intera agahembwa na Skol, Debesay Yakob ni we wabaye umukinnyi witwaye neza akiri muto ndetse n’uwahatanye kurusha abandi, igihembo gitangwa na Rwanda Tea.

Debesay Yakob nyuma yo guhembwa nk’uwatanye kurusha abandi

Mu bandi bahawe ibihembo hari Mugisha Moise warushije abandi  gusiganwa ahazamuka, Du Plooy Rohan watanze abandi ahari igihembo cya SP. Munyaneza Didier wahembwe  nk’umunyarwanda urimo kwitwara neza, Merhawi Kudus uyoboye urutonde rusange ahembwa nk’umunyafurika witwaye neza naho ikipe ya Eritrea ikomeza kuba ku mwanya wa mbere.

Isiganwa rirasozwa hakinwa intera izenguruka muri Kigali

Kuri iki cyumweru tariki 03 Werurwe 2019 ni bwo hakinwa intera ya 8 ari nayo  ya nyuma ya Tour du Rwanda 2019 izenguruka muri Kigali aho abasiganwa bazahagurukira i Kanombe bakomereze ku Murindi, kuri 15, kuri 12, Nyandungu, Giporoso, Rwandex,  Gikondo Segem, Rwampara, Kuri 40, Tapi Rouge, Kimisagara, Kwa mutwe, Onatracom, Sky Hotel, College APACOPE, Yamaha, Kinamba, Kanogo, Rugunga, Rwampara, Kuri 40   no kuri Tapi Rouge aho bazasenguruka inshuro 3 basoze bakoze intera ya kilometero 61,7.