22°C , Partly sunny | Kigali-Rwanda

Tombola y’Ikofi : Abatomboye Miriyoni baganiriye na BK PLC ku kerekezo k’iterambere bafite

Yanditswe na TUMUKUNDE GEORGINE

Ku ya 25-06-2019 saa 17:55:51
Abahinzi batomboye Miriyoni bari kumwe n'abakozi ba BK PLC

Abahinzi batsindiye amafaranga y’u Rwanda Miriyoni muri Tombola y’Ikofi  yatangijwe na Banki ya Kigali (BK  PLC)  bagaragaje ikerekezo bafite cyo kwiteza  imbere bahereye ku mafaranga batomboye na serivisi z’Ikofi begerejwe, banagaragaza ibyo bifuza byanozwa  kugira ngo bakomeze  kunogerwa na serivisi bahabwa.

Ubuyobozi bwa BK PLC bwabijeje gukomeza kubaba hafi muri urwo rugendo rw’iterambere.

Mu kiganiro bagiranye n’itangazamakuru n’abakozi ba BK PLC bari ku kicaro k’iyi banki mu Mujyi wa Kigali, batangaje ko bashima gahunda y’Ikofi kuko yaborohereje kugera kuri serivisi batagombye gukora ingendo no kugendana amafaranga mu ntoki bajya kugura imbuto n’inyongeramusaruro, babasha guhererekanya amafaranga ku buntu, bakanizigamira bateganyiriza ibihe by’ihinga.

“Nitwa Nsabimana Jotham ntuye mu Murenge wa Twumba mu Karere ka Karongi, ndi umuhinzi w’ibirayi, ibigori n’ibishyimbo. Nagize amahirwe yo gutsindira Miriyoni, kuri Radiyo Rwanda bampamagaye bambwira ko natomboye maze igihe kitarenze ibyumweru bibiri nkoresha serivisi z’Ikofi; mbitsa, nkabikuza, nkanohererezanya amafaranga n’abandi. Naranezerewe cyane! Amafaranga natomboye niyemeje kuyakoresha nagura  ubuhinzi bwange kuko nahingaga ahantu hato, aho nezaga toni ebyiri niyemeje kujya mpakura toni nka 10, umusaruro nkazajya nywupakira imodoka nkawugeza ku masoko.”

Nsabimana Jotham

“Nitwa Ndagijimana Steven, ntuye mu Murenge wa Kabarore mu  Karere ka Gatsibo, nkunda guhinga ibigori, ariko umusaruro wabaga muke kubera ikibazo k’ifumbire, nakoreshaga imvaruganda yonyine. Mfite ubutaka bugeze kuri hegitari.

Banki ya Kigali imaze kunshyikiriza amafaranga Miriyoni natsindiye, nahise ntangira gukora imishinga; hari imodoka ebyiri zizanzanira ifumbire y’imborera. Nzafata agafumbire k’imborera mvange n’imvaruganda ikigori cyange kirusheho kugira ubuzima. Kubera ko ifumbire y’imborera ihenze, naravuze ngo reka ngure n’inka ige inyunganira impe ifumbire. Mpinze ibigori umusaruro ukavamo numva nagura na moto.”

Ndagijimana Steven,

“Nitwa Tuyumvire Emmanuel ntuye mu Murenge wa Kabatwa, mu Karere ka Nyabihu ndi umuhinzi w’ibirayi. Nafunguje konti y’Ikofi nkajya mbitsa nkanabikuza, nyuma y’icyumweru numva kuri radiyo barampamagaye bambwira ko natsindiye Miriyoni y’amanyarwanda, ibyishimo biba byinshi n’ubu ndacyabifite! Hari bagenzi bange bageze kuri 20 nashishikarije kwitabira Ikofi.

Ngiye kongera imbaraga mu buhinzi, aho najyaga nsarura toni ebyiri cyangwa eshatu, ubu noneho nzajya mpakura umusaruro utubutse mpakire imodoka nuzuze Fuso.”

Tuyumvire Emmanuel

“Nitwa Ndikubwimana Emmanuel ntuye mu Karere ka Ngoma. Natsindiye miriyoni mu Ikofi ndi uwa kabiri. Nafunguje konti y’Ikofi maze kubikaho amafaranga ibihumbi 24, njya kugura imiti y’amatungo nkoresheje iyo nkonti, nyuma y’iminsi nka 4 numva ndahamagawe bambwira ko natsindiye miriyoni. Nari nsanzwe ndi umuhinzi uciriritse  mpinga ibigori, ibitoki, ikawa mfite n’ibiti  nka 6 bya makadamiya.  Ubu maze gusobanukirwa ibyiza by’Ikofi, ngiye kwagura ubuhinzi bwange, niba nahingaga toni ebyiri nzeza enye.”

Ndikubwimana Emmanuel

“Nitwa Uwizera Devota ntuye mu Murenge wa Nyakabuye, mu Karere ka Rusizi, ntewe ishema n’amafaranga miriyoni negukanye muri Tombola y’Ikofi. Nkimara gutombora narishimye cyane, numvise bindenze, kandi n’ubu ndakishimye cyane! Icyo ngiye kuyakoresha ni ukwagura ubuhinzi bwange kuko nahingaga imboga kuri ari 25 n’ibigori kuri ari 20, ngiye gukodesha indi mirima kugira ngo mpinge ku buso bunini, ngure n’imashini yo kuvomerera. Ndashimira BK yadushyiriyeho gahunda nziza, iranyorohereza cyane ntera intambwe imwe nkabikuza amafaranga, nkanahaha ntagombye kugendana amafaranga mu ntoki.”

Uwizera Devota amaze gushyikirizwa igihembo yatsindiye

Ntuyenabo Daniel ni umucuruzi w’inyongeramusaruro mu Murenge wa Bigogwe, mu Karere ka Nyabihu, yishimiye ko mu bahinzi yashishikarije Ikofi harimo umwe (Tuyumvire Emmanuel) watomboye.

Ati: “Icyanshimishije ni uko namushishikarije kwinjira mu Ikofi akaba atsindiye miriyoni, yansabye no kumuherekeza aje hano i Kigali kuri BK PLC ni muri urwo rwego naje”.

Ashima Ikofi kuko ifasha abahinzi kwizigamira kandi igafasha n’abacuruza inyongeramusaruro kubona abakiriya bagakora ku buryo inyongeramusaruro zitabura, abahinzi bakabona ibyo bashaka kandi ku gihe, ntibakererwe ihinga.

Aba bahinzi bifuza ko abatanga serivisi z’Ikofi (Agents) bakongerwa hirya no hino mu Gihugu kugira ngo birusheho korohereza abazikenera.

Buri cyumweru haboneka umuhinzi utsindira amafaranga y’u Rwanda miriyoni imwe, abikesheje gukoresha Ikofi ahererekanya  amafaranga n’abantu batatu mu cyumweru,  akaba afite n’amafaranga 3000 yasigaye kuri konti ye y’Ikofi.

Muri iyi tombola izamara ibyumweru 30 (ubu hashize ibyumweru 6), hamaze gutombora abanyamahirwe 6, abasigaye ni 24.

Abakoresha neza Ikofi bazajya bahabwa inguzanyo

Rugemanshuro Regis Umuyobozi Mukuru ushinzwe Ikoranabuhanga muri Banki ya Kigali, yasobanuye ko Ikofi  ari serivisi nshya ya BK PLC, akaba ari  umwihariko wo gukorana n’abahinzi kugira ngo  batere imbere. Yatangijwe mu Nama Mpuzamahanga ya Transform Africa yabereye i Kigali muri Gicurasi 2019.

Rugemanshuro Regis Umuyobozi Mukuru ushinzwe Ikoranabuhanga muri Banki ya Kigali

Rugemanshuro yagize ati: “Imibare igaragaza ko nubwo  70% by’Abanyarwanda babeshwaho n’ubuhinzi, bukaba ari 30% by’umusaruro mbube w’Igihugu, 6% gusa by’amabanki y’ubucuruzi ni byo bijya mu buhinzi.

Ubwo rero nka Banki ya Kigali twumvise dufite ubushobozi n’inshingano byo gukemura icyo kibazo  tukazamura inguzanyo n’imari byerekeza mu buhinzi, ariko tukabikora dukoresheje ikoranabuhanga, Ikofi ni cyo gisubizo, imvugo yacu ni inzira y’ubukungu, ni urugendo twatangiranye n’abahinzi kandi tuzarukomezanya. Icyo twifuza ni uko umuhinzi ukoresha Ikofi ubuzima bwe buzagenda buhinduka butera imbere. Ikofi ni agakoni k’urugendo”.

Yakomeje avuga ko kugeza ubu  Ikofi yifashishwa mu kohereza no kwakira amafaranga ku buntu, kwishyura  ifumbire n’imbuto ku mucuruzi w’inyongeramusaruro, kwizigamira mu kigega  Ejo Heza no  kwishyura Mituweli.

Abahinzi barahamagarirwa kwitabira gukoresha Ikofi, kuko amakuru y’uko umuhinzi ayikoresha mu mirimo ye ya buri munsi muri serivisi zavuzwe haruguru, azashingirwaho na BK PLC agahabwa inguzanyo.

Rugemanshuro avuga ko bakomeje gusobanurira abahinzi uko bazajya bakoresha neza  inguzanyo bakabasha kuyishyura.

BK PLC yijeje abahinzi kongera abatanga serivisi z’Ikofi

Hari izindi serivisi nyinshi zitandukanye zizongerwa mu Ikofi; nko kwishyura amafaranga yo guhamagara, ay’ingendo, guhaha… Ibi bikazagendana no kongera abatanga serivisi  z’Ikofi (Agents) ku buryo uzikeneye ababona hafi.

Rugemanshuro ati: “Dufite gahunda yo kongera Agents, uwumva afite uburambe mu kazi, ushaka gukorana na Banki ya Kigali hari ikipe yacu igiye gutanga akazi”.

Abahinzi bamaze kwiyandikisha mu Ikofi bageze ku bihumbi hafi 100, kandi imibare ikomeje kwiyongera buri munsi.

Abadafite terefoni na bo bashyiriweho uburyo bw’ikoranabuhanga bwiswe “Agafunguzo”,  ni bwo bifashisha bakeneye serivisi z’Ikofi bakabifashwamo n’umucuruzi w’inyongeramusaruro.  Buba bukubiyemo amakuru yose y’umuhinzi.

Kwinjira mu Ikofi ni ukwandika muri terefoni *334*2#, ukemeza (ukanda Yes), ugakurikiza amabwiriza, ukabona umubare w’ibanga ushyira umucuruzi w’inyongeramusaruro akakwandika. Abatari abahinzi na bo bari hafi kwagurirwa amarembo kuri serivisi z’Ikofi.

Abahinzi batomboye Miriyoni bari kumwe n’abakozi ba BK PLC

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.