20°C , Mostly clear | Kigali-Rwanda
Ndagijimana Steven ashyikirizwa igihembo na Mutangana Felix umukozi wa BK mu Ishami rishinzwe ubucuruzi ( ibumoso) na Nshuti Tierry ushinze Ubucuruzi muri BK

Tombola y’Ikofi: Abandi bahinzi 2 begukanye ibihembo

Yanditswe na Tumukunde Georgine

Ku ya 14-06-2019 saa 17:38:29

Abahinzi babiri Nsabimana Jotham utuye mu Mudugudu wa Gashehe, Akagari ka Gisovu, Umurenge wa Twumba mu Karere ka Karongi na Ndagijimana Steven wo mu Mudugudu wa Ngarama, Akagari ka Nyarukiye, mu Murenge wa Kabarore, Akarere ka Gatsibo, begukanye ibihembo muri Tombola yiswe Ikofi yateguwe na Banki ya Kigali (BK).

Aba banyamahirwe babiri bariyongera ku bandi babiri baherutse kwegukana ibihembo.

Buri cyumweru haboneka umuhinzi utsindira amafaranga y’u Rwanda miriyoni imwe, abikesheje gukoresha serivisi z’Ikofi ahererekanya amafaranga n’abantu batatu mu cyumweru, akaba afite n’amafaranga 3000 yasigaye kuri konti ye y’Ikofi.

Muri iyi tombola izamara ibyumweru 30 (ubu hashize ibyumweru 4), abasigaje kwegukana ibihembo ni 26, abahinzi bakaba basabwa kuyitabira.

Nsabimana Jotham ubwo yari ku kicaro gikuru cya BK mu Mujyi wa Kigali, ashyikirizwa ibihembo yatsindiye, yagize ati: “Nagiye kumva numva barampamagaye bambwira ko natsindiye igihembo cya miriyoni, nabanje kugira impungenge nkeka ko atari byo, ariko n’abaturanyi bange bari bakurikiye Radiyo Rwanda bampamirije ko natsinze koko babyumvise, naranezerewe cyane!”

Yasobanuye ko guhererekanya amafaranga atageze ku bihumbi 100 akoresheje serivisi z’Ikofi ari byo byamuhesheje amahirwe, konti akoresha yayifunguye muri Werurwe uyu mwaka.

Ati: “Negukanye igihembo nyuma y’ ibyumweru bibiri nyikoresha kuko mbere nyifungura nari nzi ko ari ukuguriraho inyongeramusaruro gusa, ariko umwe mu bacuruza inyongeramusaruro ni we wansobanuriye ko ngomba kuyikoresha nkajya mpererekanya amafaranga n’abandi bahinzi”.

Nsabimana yatangaje ko yishimiye ibyiza byayo kandi agiye kuyishishikariza n’abandi kugira ngo bayitabire.

Ati: “Ikofi iranyorohereza cyane; iyo nkeneye amafaranga mbwira umuhinzi mugenzi wange akayanyoherereza nkayabona bitangoye, ntagombye gukora ingendo no gutakaza igihe. Iyo ngiye kugura ifumbire si ngombwa ko ngendana amafaranga mu ntoki nyatwara ku Ikofi”.

Nsabimana Jotham umuhinzi wegukanye igihembo (ibumoso) na Nshuti Tierry ushinzwe

Nsabimana ufite umugore n’abana batanu, yatangaje ko amafaranga abonye agiye kumufasha kwagura ubuhinzi bwe kuko yahingaga ahantu hato ibigori n’ibishyimbo, bityo we n’umuryango we bagatera imbere.

Ati: “Nizeye kubona umusaruro mwinshi kandi mwiza kuko mbonye igishoro kinini, nzagura ibikoresho byo mu buhinzi. Ikofi ni nziza, abatarayijyamo nibayigemo babe abamiriyoneri nkuko nange nabaye we”.

Ndagijimana Steven ni umuhizi w’ ibigori, na we yegukanye igihembo, yatangaje ibyishimo yagize akimara kumva ko yatomboye.

Ati: “Ubundi nabitsaga nkanabikuza amafaranga ku Ikofi,… nakoreshaga izi serivisi kenshi, amahirwe ni aho yamfatiye ndatombora. Narishimye cyane menye ko natomboye, gusa terefoni yampamagaye nabanje gutinya kuyitaba kuko nabonaga idasanzwe, icyampaye ikizere ko natsinze koko ni uko abaturanyi bambwiye ko banyumvise kuri radiyo”.

Ndagijimana Steven ashyikirizwa igihembo na Mutangana Felix umukozi wa BK mu Ishami rishinzwe ubucuruzi ( ibumoso) na Nshuti Tierry ushinze Ubucuruzi muri BK

Akomeza avuga ko yahise ategura uko agomba gukoresha amafaranga yatomboye. Ati: “Amafaranga natomboye agiye kumfasha kwagura aho nahingaga kuko hari ku gice cya hegitari. Ngiye gusahaka ifumbire y’imborera kuko nakoreshaga ifumbire mvaruganda yonyine bigatuma umusaruro utaboneka nk’uko mbifuza. Ubu ngiye kugura inka kugira ngo mbone ifumbire ubutaka bwange burumbuke”.

Avuga ko Ikofi yayimenye abifashijwemo n’abakozi ba BK bagiye kuyibasobanurira aho batuye akumva kuyikoresha birimo inyungu.

Yongeyeho ati: “Numvise ngize ishyaka ryo kuyijyamo kuko banatubwiye ko umuntu wabikijeho amafaranga, akaguza azajya atanga inyungu iri hasi. Abahinzi bagenzi bange ndabakangurira kujya muri gahunda y’ Ikofi ni nziza, ubu ndayemeye ijana ku ijana, nanayishishikarije abantu batari munsi ya 50”.

Ucuruza inyongeramusaruro yanejejwe n’umuhinzi yanditse akegukana igihembo

Nyirahakizimana Françoise umucuruzi w’inyongeramusaruro mu Murenge wa Kabarore mu Karere ka Gatsibo, ni we wanditse Ndagijimana muri gahunda y’Ikofi. N’ibyishimo byinshi yagize ati: “ Ni ishema kuba umwe mu bahinzi nashishikarije kwitabira Ikofi nkanamwandika yegukanye igihembo, naranezerewe, yitwaye neza kuko ntihashiraga iminsi ibiri ataje kubitsa no kubikuza.

Gutsinda kwe byatumye n’abandi bahinzi bitabira, kandi nkomeje gahunda yo kujya kubashishikariza binyuze mu Nteko z’Abaturage”.

Yakomeje agira ati: “ BK yegereye umuhinzi, yashyizeho gahunda nziza kuko umuhinzi akoresha konti ye atagombye gukora ingendo no gutakaza igihe. Amafaranga yose abonye abasha kwizigamira akazajya gukenera kugura inyongeramusaruro n’ imbuto yaragwiriye, abandi bahinzi na bo ntibakwiye gucikanwa n’ibi byiza ”.

Ibyo wamenya kuri serivisi z’Ikofi

Ikofi yatangijwe na Banki ya Kigali. Umuhinzi agera kuri serivisi z’Ikofi abanje kwiyandikisha agafunguza konti kuri Simukadi y’imwe muri kompanyi z’itumanaho, akayikoresha abitsaho amafaranga, kuyabikuza, akaba yayoherereza undi muhinzi no kugura imbuto cyangwa inyongeramusaruro bitangwa na Leta muri SMART Nkunganire.

Kohererezanya amafaranga bikorwa ku buntu.

Mutangana Felix umukozi wa BK mu Ishami rishinzwe ubucuruzi unakurikirana umushinga w’Ikofi, asobanura ko Ikofi ari uburyo bashyiriyeho Abanyarwanda ngo biteze imbere.

Yagize ati: “Muri iyi gahunda twatangiranye umwihariko w’abahinzi babitsa amafaranga yabo kugira ngo bateganyirize ibihe by’ihinga, bazigama amafaranga yo kugura imbuto n’inyongeramusaruro kugira ngo bakore ubuhinzi bwabo neza.

Abahinzi barenga ibihumbi 90 bamaze kwiyandikisha muri gahunda y’Ikofi, turateganya kuba twarengeje miriyoni imwe mu gihe cy’amezi atandatu”.

Avuga ko mu rwego rwo kumenyekanisha serivisi z’Ikofi no gukangurira abahinzi kuyitabira batangije ubukangurambaga buzamara ibyumweru 30 buherekejwe na tombola, umuhinzi wiyandikishije aba afite amahirwe yo gutsindira miriyoni ariko hari ibintu 3 agomba kuba yujuje.

Mutangana ati: “Ni ukuba ari umuhinzi wiyandikishije mu Ikofi, yarakoze ihererekanya ry’amafaranga (Transaction) inshuro 3: kubitsa, kohererezanya amafaranga n’abandi bahinzi 3 batandukanye, kubikuza no kuba afite mafaranga 3000 kuri konti ye”.

Atanga ubutumwa agira ati: “Ni ukumenya ko iyo ukanze *334*2# ugakurikiza amabwiriza, ubasha kujya muri serivisi z’Ikofi, ariko umuhinzi we asabwa kwegera umucuruzi w’inyongeramusaruro akamuha umubare w’ibanga kugira ngo abashe kwinjira.

Abacuruzi b’imbuto n’inyongeramusaruro baboneka ahantu hatandukanye hirya no hino mu Gihugu kandi buri karere gafite nibura abari hejuru ya 5”.

BK yashyizeho gahunda y’Ikofi kugira ngo ifashe abahinzi kuko abenshi usanga batagira ibigo by’imari babarizwamo; ntaho babitsa bagahura n’imbogamizi yo kutabona inguzanyo zibafasha kwagura ubuhinzi bwabo, bitewe n’uko amakuru ajyanye n’icyo binjiza ntaho aba agaragara.

Iyo umuhinzi ari muri iyi gahunda amakuru ye ajyanye na SMART Nkunganire; ubuso ahingaho, umusaruro abona uko agura inyongeramusaruro… aboneka muri BK, ni na byo bigaragaza uko akoresha Ikofi. Nyuma y’amezi atandatu, ibi bizashingirwaho mu kugena uko abahinzi bajya babona inguzanyo.

BK kandi irateganya kwagura serivisi z’ Ikofi ku buryo zakwifashishwa mu kwishyura Mituweri, kuzigama muri gahunda ya Ejo Heza, kwishyura umuriro n’ibindi.

Abakiriya basanzwe na bo ngo barahishiwe kuko bari hafi gufungurirwa amarembo kuri izi serivisi z’Ikofi ndetse hazajyaho abashinzwe kuzicuruza (Agents) mu bice bitandukanye by’Igihugu.

TANGA IGITEKEREZO

Leave a Reply

Your email address will not be published. Required fields are marked *