18°C , Intermittent clouds | Kigali-Rwanda

Tennis: RTF  ikomeje gushyira ingufu muri uyu mukino mu bafite ubumuga

Yanditswe na BUGINGO FIDELE

Ku ya 21-10-2019 saa 18:22:46
Umunyamabanga mukuru wa RTF, Habimana ashyikiriza ibikoresho umuyobozi wa CJSM, Ntamagiro John Bosco

Ishyirahamwe ry’umukino wa Tennis mu Rwanda “RTF” ryihaye intego yo kuzamura uyu mukino mu byiciro bitandukanye  birimo n’ikiciro cy’abafite ubumuga.

Nyuma yo gutangiza uyu mukino bakina bicaye mu tugare “Wheelchair Tennis” kuri ubu hatangijwe umukino wa Tennis mu bafite ubumuga bwo kutumva no kutavuga “Deaf Tennis”.

Umuhango wo gutangiza uyu mukino wabareye i Huye mu ishuri rya  ishuri School for the Deaf and Hearing Impaired (CJSM) tariki 11 Ukwakira 2019  ahari hateranyiye abanyeshuri barererwa muri iri shuri bagera kuri 80 bafite hagati y’imyaka 10 na 20.

Nk’uko bitangwa n’umunyamabanga mukuru wa RTF, Habimana  Valens wari uhagarariye Perezida wa RTF muri uyu muhango ni uko iyi gahunda izakomereza no mu bindi bigo  byigisha abana bafite ubumuga bwo kutumva no kutavuga. Muri uyu muhango kandi hari n’umuyobozi wa Tekinike muri RTF, Ndugu Philbert.

Ubuyobozi bw’iri shuri bwishimiye iki gikorwa ndetse bwiyemeza gukomeza gushyiramo igufu ku buryo mu minsi iri imbere  banitabira amarushanwa ndetse bakanitwara neza.

Ntamagiro John Bosco, umuyobozi wa  CJSM yavuze ko abana bishimiye uyu mukino kandi  mu minsi iri imbere bazitabira amarushanwa ku rwego rw’igihugu ndetse no ku rwego mpuzamahanga bakitwara neza.

Ishyirahamwe ry’umukino wa Tennis mu Rwanda  ryijeje gukomeza  gushyikigira iri shuri aho babahaye ibikoresho bitandukanye byifashishwa birimo udupira n’ibindi ndetse ko babemereye n’umutoza uhoraho uzajya atoza aba bana.

Muri RTF bishimira kandi urwego umukino wa Tennis bakina bicaye mu tugare  “Wheelchair Tennis”  ugezeho nyuma y’imyaka ibiri utangijwe. Kuri ubu uyu mukino ukinwa mu bigo bitatu  birimo Gatagara (Nyanza), Gatagara (Huye) na St Vicent Muhoza i Musanze.

Muri iki kiciro  biragaragara umukino urimo gutera imbere  ku buryo u Rwanda rushobora kuzahagararirwa mu marushanwa akomeye atandukanye arimo “Rwanda Open 2019”, “Kenya Open 2019” na BNP Paribas World Team Cup 2019 izabera muri Israel.

Abana bagerageza gukina umukino wa Tennis

Umuyobozi wa Tekinike muri RTF, Ndugu yereka abana uko bakina Tennis

Abakinnyi ba Tennis bakina bicaye mu kagare

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.