19°C , Showers | Kigali-Rwanda
Mugisha Emmy ari mu myitozo ku kibuga cya IPRC Kigali

Tennis: Mugisha arishimira aho uyu mukino umaze kumugeza

Yanditswe na BUGINGO FIDELE               

Ku ya 12-05-2019 saa 11:32:41

Mugisha Emmy watangiye gukina umukino wa Tennis afite imyaka 9 y’amavuko ubu akaba akinira ikipe ya IPRC Kigali atangaza ko yishimira aho uyu mukino umugejeje kuko wamufashije kwiga.

Mu kiganiro kirambuye yagiranye n’Imvaho Nshya, Mugisha Emmy   yavuze  uko yatangiye gukina umukino wa Tennis ndetse n’intego afite mu minsi iri imbere.

MUGISHA NI MUNTU KI?

Yavukiye i Kanombe mu Karere ka Kicukiro muri Gicurasi 2002. Ni mwene Twagira Wilson na Ngamije Mary. Yize amashuri abanza muri Remera Academy I. Akomeza amashuri yisumbuye mu kiciro rusange muri GS St Joseph.  Yakomeje muri   EFOTEC asoreza mu ishami ry’Imibare, Ubugenge n’Ubumenyi bw’Isi muri Star Secondary school i Masaka.

Kuri ubu yiga mu mwaka wa mbere mu ishuri ry’ubumenyi ngiro “IPRC Kigali” mu bijyanye na gukora imashini “Mechanical Engineering”.

Mugisha Emmy ari mu myitozo ku kibuga cya IPRC Kigali

UKO YATANGIYE GUKINA TENNIS

Mugisha avuga ko yatangiye gukina Tennis afite imyaka 9 muri 2011. Ati: Ubundi nikiniraga umupira w’amaguru rimwe  njya mu Ngoro y’Ubugeni n’Ubuhanzi ahazwi nko kwa Habyarimana i Kanombe mbona abandi bakina ni uko ntangira nange kuyikina icyo gihe nari nambaye inkweto zisanzwe.”

Gusa ni umukino wanshimishije cyane ndetse uranamfasha kuko kuwukina bigusaba gutekereza cyane. Ati: “Byatumye mfunguka mu mutwe mba n’umuhanga cyane mu ishuri.”

Akomeza avuga ko gukina umukino wa Tennis bisaba kubitangira uri muto kuko ubanza kwiga gusoma uwo muhanganye  kugira ngo ubashe kumutsinda.

Ikipe yatangiriyemo akaba ari Kanombe Tennis Club n’ubu akibarizwamo. Mugisha Emmy avuga ko umuntu  watumye akunda gukina Tennis ari Nyakwigendera Gasigwa Jean Claude  wari umukinnyi wabigize umwuga mu Rwanda akaza gupfa muri 2015.

Mugisha ati: “Ni we nsa n’uwo nakinaga ndeberaho kuko yari umukinnyi mwiza. Mbese byose ni we nabyigiyeho kuko yari iki ikitegererezo cyange.”

GUHUZA UMUKINO WA TENNIS NO KWIGA

Mugisha avuga ko byari bigoye kuko hari igihe yajyaga mu mikino nko hanze y’igihugu abandi bigaga yagaruka bikamusaba gukoresha ingufu cyane asubiramo amasomo. Gusa anishimira ko kubera ubuhanga umuntu yiga mu gukina byatumye afunguka mu mutwe anaba umuhanga mu ishuri bikamufasha gutsinda amasomo ye.

Mu muryango we naho nta bwo babanje kubyumva neza kuko uyu ari umukino usaba ibikoresha byinshi kandi bihenze. Ati: “Byari bigoye kubyumva kuko Tennis isaba  ibikoresha bya buri kanya kandi bihenze, ikindi iyo umaze kugera mu myaka 18 bisaba ko kwitabira irushanwa   wiyishyurira.”

Mugisha ubwo yigaga mu kiciro rusange muri GS St Joseph byabaye nk’ibimugora kuko nta bibuga byari bihari bigatuma akora imyitozo mu kiruhuko. Ati: “Nakinaga Table Tennis kugira ngo nkomeze niyibutse ubundi ngakina Tennis naje mu kiruhuko.”

YAKINNYE AMARUSHANWA ATANDUKANYE

Mugisha Emmy muri 2014 yitabiriye irushanwa ry’abatarengeje imyaka 12 ryabereye i Burundi. Nyuma y’aho muri 2016 yakinnye irushanwa ryo Kwita Izina Ingagi  i Musanze  yitwara neza ari naho abatoza benshi bamuboneye.

Muri uyu mwaka kandi yanitabiriye irushanwa rihuza amashuri yisumbuye muri aka karere k’Afurika y’IBurasirazuba  ryabereye Eldoret muri Kenya maze begukana igikombe aho yari yajyanye n’ikipe ya Lycee de Kigali.

Muri 2017 yitabiriye irushanwa ryo kwibuka maze agera ku mukino wa nyuma  atsindwa n’umukinnyi wo muri RDC.

Mugisha Emmy (ibumoso) ubwo yegukana umwanya wa kabiri mu irushanwa ryo kwibuka

Nyuma yo gusoza  amashuri yisumbuye, umutoza wa IPRC Kigali, Ndejuru Aimable yabonye uko akina  amushakira ishuri  ndetse akaba anishyurirwa.

AHO UMUKINO UMUGEJEJE

Mugisha avuga ko kuba yishyurirwa ishuri  ari kimwe mu bintu uyu mukino wa Tennis wamugejejeho kuko  bitari kuba iyo aba adakina uyu mukino. Akomeza avuga ko iyo bitabiriye amarushanwa babona ibihembo bitandukanye birimo ibikoresho n’ibindi bifashisha mu buzima busanzwe.

Mugisha avuga ko afite intego yo kuzakina amarushanwa akomeye ku rwego rw’Isi ariko byose bizaterwa n’uko yazitwara mu marushanwa atandukanye mu Rwanda n’ahandi muri Afurika .

Aha agaruka ku irushanwa ry’ingimbi n’abangavu  rizabera  mu Rwanda “Kigali Junior International Open” kuva tariki 17 kugeza 22 Kamena 2019 aho azaryitabira akaba afite intego yo kwitwara neza ku buryo byamuhesha amanota   yatuma aza mu bakinnyi bazitabira irindi rushanwa rizabera muri Espagne  muri Kanama 2019.

MUGISHA ASHOBORA KUJYA GUKINA HANZE Y’U RWANDA

Mugisha atangaza ko umwaka ushize wa 2018 hari umutoza witwa  Ian Griffin  ukomoka muri Canada waje mu Rwanda akabatoza  maze agakunda imikinire ye ndetse akanamubwira ko azamushakira Kaminuza  muri Canada  ku buryo yakwiga anakina.

Ati: “Yakunze imikinire yange nyuma asaba  ishyirahamwe ry’umukino wa Tennis mu Rwanda (RTF) amashusho ndimo  gukina ndayibaha ubu ndategerje  ubwo bikunze bambwira.”

Uyu mutoza Ian Griffin akaba yaratoje abakinnyi bakomeye barimo John Robert Isner, umukinnyi wabigize umwuga akaba akomoka muri Amerika ubu ari ku mwanya 9 ku Isi.

Umutoza Ian Griffin ubwo yari mu Rwanda aho ari kumwe na Mugisha Emmy

Mugisha avuga ko akunda cyane umukinnyi, Roger Federer ukomoka mu Busuwisi ubu akaba ari nimero ya 3 ku Isi. Ati: “Nkunda imikinire ye ni umukinnyi w’umuhanga, imikino ye  yose nkunda kuyikurikirana.”

Atangira gukina Tennis, Mugisha avuga ko uwatumye akunda uyu mukino cyane ari Nyakwigendera Gasigwa Jean Claude ariko ubu uwo areberaho mu Rwanda ni Habiyambere Dieudonne.

Mugisha ari mu myitozo

Mugisha ari kumwe na Muhire Josua bakoranye imyitozo

TANGA IGITEKEREZO

Leave a Reply

Your email address will not be published. Required fields are marked *