23°C , Mostly cloudy | Kigali-Rwanda
Abahinzi batandukanye hirya no hino mu gihugu bahamya ko bamaze gusobanukirwa tekiniki yo gusharika ibigori kuko bigira umumaro ukomeye mu kurinda ubumara bwa Aflatoxin

Tekiniki yo gusharika ibigori, igisubizo mu kwirinda ubumara bwa aflatoxin

Yanditswe na Mukagahizi Rose

Ku ya 15-03-2019 saa 13:24:48

Abahinzi bamwe bahamya ko bamaze gusobanukirwa tekiniki yo gusharika ibigori kuko bigira umumaro ukomeye mu kurinda ubumara bwa aflatoxin buterwa no kudafata neza umusaruro bukaba bwateza indwara ziganjemo kanseri y’umwijima.

Umunyamakuru w’Imvaho Nshya yasuye abahinzi bo mu Ntara y’Iburasirazuba bagaragaje uko bahangana n’iki kibazo cyo kudafata neza umusaruro kuri ubu bakaba bishimira aho bageze kuko iyangirika ry’umusaruro wabo ryagabanutse mu buryo bugaragarira buri wese.

Murerwa Epiphania, Umuyobozi wa Koperative KODUIBI, Koperative duteze imbere igihingwa k’ibigori Mugesera/Ngoma avuga ko tekiniki yo gusharika yaje ari igisubizo ku bahinzi b’ibigori.

Yagize ati, “Tekiniki yo gusharika yanzanye impinduka zigaragara ku birebana no gufata neza umusaruro. Mu gihembwe k’ihinga 2018, toni zisaga 500 twari twasaruye, twashoboye kugurisha 61 gusa, kubera ko izindi toni hafi 400 zangiritse ariko kuri ubu, dukurikije inama zo gufata neza umusaruro toni zisaga 500 zose tuzazigurisha zimeze.”

Rwanzegushira Pierre, umuhinzi w’ibigori mu Karere ka Rwamagana avuga ko kera ibigori babihingaga nabi kandi bakabihunika nabi bajya kugurisha ku isoko bakabona abaguzi ariko ubu ngo byarahindutse bamenya uburyo bwo gusharika ibigori bigatuma babasha kubona umusaruro wujuje ubuziranenge.

Banamwana Bernard, ushinzwe imibanire mu ruganda Africa Improved Foods (Rwanda) avuga ko ubuziranenge bwifuzwa ku musaruro ukomoka ku bigori bugenda bugerwaho.

Avuga ko hafashe ingamba mu birebana no gusharika neza kuko bari bafite impungenge zo kutagera kumusaruro wujuje ubuziranenge.

Avuga ko ubu buryo bwo gusharika butanga umusaruro mwiza, ku buryo basigaye bagura ibigori bidahunguye.

Yagize ati, “Inyungu zirimo icya mbere bigabanya akazi ku muhinzi kuko iyo amaze kubisharika gutya akazi k’ibigori kaba karangiye kuruta ku bitwara mu rugo akarambura shitingi hasi akanika, igihe imvura iguye akarwana no kwanura ariko iyo ubisharitse bicuramye uba ubisubije mu mwimerere wabyo kuko iyo ikigori cyumye kiricurika, n’iyo imvura yagwa amazi ntashobora guca mu gishishwa kandi iyo gicuritse amazi yivanaho. Ni ubwirinzi kamere bw’intete z’ikigori, iyo ubimanitse ukabisigaho ibishishwa ikigori kiba gisa nkaho cyakabaye kiri mu murima kandi bituma umuturage yishyurwa vuba.”

Banamwana Bernard, ushinzwe imibanire mu ruganda Africa Improved Foods (Rwanda)

Ibi ngo byagabanyije n’ikibazo cyo guta ishuri ku bana bahugiye mu kazi ko guhungura.

Yagize ati, “Tekiniki yo gusharika tuyibona nk’umuti ukemura ibyo bibazo byose bitari ubuziranenge gusa bw’ibigori ahubwo n’ibindi bibazo byo mu mibereho y’abaturage ndetse no mu bukungu.”

Hari n’abahinzi bavuga ko basobanukiwe ko gufata nabi umusaruro w’ibigori, kubisarura biteze, kubibika ahantu bihura n’ubukonje bwinshi ari nyirabayazana bw’ubumara bwa Aflotoxin buteza ingaruka zo guteza indwara ya kanseri y’umwijima.

Minisitiri w’Ubuhinzi n’Ubworozi Dr. Mukeshimana Geraldine avuga ko Leta y’u Rwanda ku bufatanye n’abafatanyabikorwa batandukanye yiyemeje gukora ibishoboka byose kugira ngo iyangirika ry’umusaruro w’ubuhinzi rikunze kugaragara mu gihe ndetse na nyuma yo gusarura rigabanywe bityo, ibyo kurya ndetse n’inyungu y’amafaranga bihagije byiyongere ku muhinzi w’Umunyarwanda.

Dr Mukeshimana Gerardine, Minisitiri w’ubuhinzi n’Ubworozi

Uretse ibi, avuga ko kuva muri 2011, Leta yashyizeho gahunda yo gufata neza umusaruro (Post Harvest Strategy) y’imyaka 7 yerekana uburyo umusaruro cyane cyane uw’ibinyampeke n’ibinyamisogwe utunganywa uhereye mu gusarura kugeza kuwukoresha bwa nyuma.

Mu bindi avuga ko kuri ubu umusaruro wangirika ugenda ugabanuka aho ku bigori hangirika ubarirwa ku mpuzandengo igera kuri 15%.

Abahinzi batandukanye hirya no hino mu gihugu bahamya ko bamaze gusobanukirwa tekiniki yo gusharika ibigori kuko bigira umumaro ukomeye mu kurinda ubumara bwa Aflatoxin

Hirya no hino mu gihugu hubatswe ubuhunikiro bwujuje ubuziranenge

TANGA IGITEKEREZO

Leave a Reply

Your email address will not be published. Required fields are marked *