21°C , Partly sunny | Kigali-Rwanda

Tanzaniya: Perezida Magufuli yaciye amarenga kuri COVID-19 mu gihugu

Yanditswe na TUMUKUNDE GEORGINE

Ku ya 22-02-2021 saa 10:43:47
Perezida wa Tanzaniya John Pombe Magufuli

Perezida wa Tanzaniya John Pombe Magufuli, nubwo ateruye ngo avuge ko icyorezo cya COVID-19 kiri mu gihugu cye, imvugo ye yaciye amarenga, aho yavuze ko Guverinoma ye nta muturage yabujije kwambara agapfukamunwa.

Yanavuze ko bamwe mu bantu bo hafi ye banduye kiriya cyorezo ariko bakize, yizeye ko bazagitsinda nkuko bagitsinze ubushize.

Mu ijambo yavugiye muri Kiliziya Gatolika i Dar es Salaam, mu muhango wabaye ejo, wo gusoza amasengesho y’iminsi 3 yo gusaba Imana ngo ibakize COVID-19, yagize ati: “Bamwe mu bo dukorana, na bamwe bo mu muryango wanjye baranduye ariko barakize”.

Yongeyeho ati: “ Guverinoma ntabwo yigeze ibuza kwambara agapfukamunwa, gusa muhitemo neza ako mwambara, udutumizwa mu mahanga dushobora kutwanduza COVID. Mukoreshe udupfukamunwa twakozwe na Minisiteri y’Ubuzima cyangwa utwo mwikoreye mwebwe ubwanyu”.

Mu muhango wabaye ku wa kane ushize wo guherekeza uwari Umuyobozi Mukuru ushinzwe imirimo rusange   John Kijazi, uherutse kwitaba Imana, Perezida Magufuli, nabwa yaciye amarenga.

Yagize ati: “Igihe iyi ndwara y’ibihaha yagaragaraga umwaka ushize twarayitsinze kuko twashyize Imana imbere ya byose tunafata izindi ngamba. Nizeye ntashidikanya ko n’ubu nidukora ibyo tuzatsinda. Nta Guma mu rugo tuzajyamo, dukomeze dushyire Imana imbere, dukoreshe n’ubundi buryo”.

Imibare y’ubwandu bwa COVID-19 iheruka gutangazwa n’iki gihugu ni iyo muri Mata 2020, igaragaza ko abanduye ari 509, abakize ari 183, abahitanywe n’icyorezo ni 21. Nyuma yaho ahagana muri Nyakanga 2020, Perezida Magufuli yatangaje ko nta cyorezo kikiri mu gihugu.

Niba koko cyari cyarashize, iriya mvugo igaragaza ko cyongeye kubura umutwe.

Tanzaniya ni igihugu kitigeze gifata ingamba zo kwirinda ikwirakwira ry’iki cyorezo nkuko bikorwa mu bindi bihugu; nko gushyiraho guma mu rugo, guhana intera hagati y’umuntu n’undi, kwambara agapfukamunwa,…Cyashyize imbere amasengesho, n’ubu ntikemera n’inkigo.

OMS yaburiye Tanzaniya

Ishami ry’Umuryango w’Abibumbye ryita ku Buzima ( OMS/ WHO) ryahamagariye abayobozi ba Tanzaniya kudakerensa icyorezo cya COVID-19, bagafata ingamba zo kurinda abaturage.

Ni mu gihe muri iki gihugu harimo kuvugwa imfu nyinshi biturutse ku burwayi bw’ibihaha. Mu minsi ishize iki cyorezo cyahitanye Maalim Seif Sharif Hamad wari Visi Perezida wa Zanzibar, nkuko byatangajwe  n’ishyaka rye ACT-Wazalendo.

Umunyamabanga Mukuru wa OMS  Dr.Tedros Adhanom Ghebreyesus, nkuko  yari yabigarutseho mu ntangiriro z’uyu mwaka wa 2021, yongeye kwibutsa abayobozi ba Tanzaniya gufata ingamba zo kwirinda no kwemera urukingo. Yanabasabye  kujya batanga raporo igaragaza imibare y’abanduye.

Urugaga rw’Abavoka muri Tanzaniya (Tanzania Law Society – TLS) na rwo rwasabye Leta y’iki gihugu kudakomeza guhishira ko COVID-19 ihari, igafata ingamba zo kwirinda.

Nkuko bigaragara mu nkuru y’urubuga https://information.tv5monde.com, rwagize ruti: “Icyorezo cya  COVID-19 kirahari mu gihugu, abapfa bariyongereye mu mezi ashize. Imiryango n’ inzego zinyuranye  bimaze gutakaza abakozi benshi, abanyamuryango, ababyeyi,  inshuti, abaturanyi,…” Rushimangira ko abenshi muri abo bigaragara ko bazize kiriya cyorezo.

Igihangano cy’abanyabugeni bo muri Tanzania gihamagarira abantu kwirinda COVID-19 cyashushanyijwe ku wa 26 Gicurasi 2020

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.