26°C , Partly sunny | Kigali-Rwanda
Abakinnyi b'ikipe ya Dream Taekwodo Club ubwo bari basoje imyitozo

Taekwondo: Muri Dream TC barishimira ibyo bamaze kugeraho

Yanditswe na BUGINGO FIDELE

Ku ya 20-05-2018 saa 07:50:13

Taekwondo ni umwe mu mikino njyarugamba ufite inkomoko muri Korea. Mu  Rwanda uyu mukino watangiye gukinwa muri 2003, nyuma muri 2010  ni bwo hashinzwe ishyirahamwe ryawo mu Rwanda.  Kugeza ubu uyu mukino umaze   gukwira henshi mu gihugu  ndetse n’abakinnyi  basigaye basusurukira u Rwanda mu marushanwa mpuzamahanga atandukanye bakitwara neza.

Abakinnyi b’ikipe ya Dream Taekwodo Club ubwo bari basoje imyitozo

Imvaho Nshya yasuye ikipe ya Dream Taekwondo Club ibariwa mu kigo cy’urubyiruko cya Gatenga ahazwi nko kwa Carlos maze bagira byinshi batangaza n’intambwe bamaze gutera mu guteza imbere uyu mukino.

Dusi Blaise umubitsi muri iyi kipe akaba n’umujyanama mu ishyirahamwe ry’umukino wa Taekwondo mu Rwanda “RTF” yatangaje ko  Taekwondo ari umukino njyarugamba wifashishwa mu kwirinda ariko abawukina bakaba banatozwa kugira imyitwarire myiza muri rusange.

Dusi Blaise, umwe mu bayobozi ba Dream Teakwondo Club

Ikipe ya Dream TC yashinzwe muri 2011 ishingwa na Ntawangundi Eugene wakiniraga mu ikipe yabarizwaga muri UNILAK. Dusi yagize ati: “We n’abakinnyi bakinanaga bahisemo kuza gushinga ikipe hano mu Gatenga  kuko ari ikigo cy’urubyiruko.”

Ntawangundi Eugene, washinze ikipe ya Dream TC

Ntawangundi Eugene ufite Dani ya 4  ubu ni we Perezida w’iyi kipe akaba umutoza mukuru wayo ndetse n’umutoza wungirije w’ikipe y’igihugu.

Hari ibyo bishimira bamaze kugeraho

Kuva iyi kipe yashingwa imaze kwegukana ibikombe 14. Dusi ati: “ Ikipe yacu muri 2017 yabaye iya mbere muri aka karere k’Afurika y’Iburasirazuba kandi twanitabiriye n’amarushanwa atandukanye imbere mu gihugu no hanze.”

Bimwe mu bikombe ikipe ya Dream TC yegukanye umwaka ushize wa 2017

Ikipe ya Dream TC ubu ifite abakinnyi basaga 90  mu byiciro bitandukanye harimo abakiri bato, abahungu n’abakobwa ndetse n’ikiciro cy’abakinnyi bafite ubumuga.

Ibanga ryo kwitwara neza

Dusi ashimangira ko aba bakinnyi bose babaha imyitozo ya ngombwa hanyuma abitwaye neza bagahamagarwa mu ikipe y’igihugu. Ati “Hano tubatoza bimwe  abitwaye neza   akaba ari bo bahamagarwa mu ikipe y’igihugu. Kugeza ubu  dufite abakinnyi bagera kuri 30 bari ku rwego rwo hejuru kandi mu ikipe y’igihugu tuba dufitemo nka 60%.”

Aho amikoro ava

Dusi Blaise avuga ko amikoro ava mu banyamuryango kuko n’ibikoresho bafite byavuye mu kwitanga kwabo. Ati: “Iyo ugeze mu ikipe uhita uba umunyamuryango, dufite abasaga  50.”

Yakomeje avuga ko hari umusanzu abakinnyi  batanga bitewe n’ubushobozi ariko ko ntawe bategeka  amafaraga runaka byose bikorwa mu rwego rwo kwitanga.

Bamwe mu bakinira iyi kipe  bishimira intambwe bagezeho  

Ndacyayisenga Aline ukinira Dream TC ndetse n’ikipe y’igihugu  yatangaje ko  iyi kipe yamufashije kuzamura impano ye. Ati :“ Imana itegura ikintu  n’imigambi yacyo n’uburyo kizabaho  ni impano umuntu  aba afite, iyo ayikoresheje ntayicaze  ivamo ikintu kizima ni bwo buryo nakinnyemo Taekwondo,  nkina  ndi umukobwa ukiri hasi  ariko aka kanya bavuga ko ndi hejuru ariko sindagera aho nifuza”.

Iradukunda Mucyo Yvan na Ndacyayisenga Aline

Ndacyayisenga  atangaza ko yatangiye gukina uyu mukino muri 2013, iyi kipe iramufasha mu myitozo kandi yishimira aho ageze. Ati: “ Nagiye gukina ahantu henshi hari aho natwaye umudari  wa gatatu muri shampiyona y’Afurika mu Misiri”. Akomeza avuga ko  ari kwitegura cyane kugira ngo azabashe kwitabira imikino yindi mpuzamahanga irimo imikino Olempike ndetse n’imikino y’Afurika.

Hari ubutumwa atanga

Ndacyayisenga  atanga ubutubwa ku bakobwa bitinya  ntibakine umukino wa Taekwondo cyangwa indi mikino njyarugamba. Ati: “Nabasaba kwitinyuka bakumva ko bashoboye”. Akomeza avuga ko azakomeza kubashishikariza gukunda no gukina uyu mukino  ndetse ko   yanabigisha kuko ageze ku rwego rwo kwigisha abandi.

Ku ruhande rwa  Iradukunda Mucyo Yvan  ufite imyaka 14 y’amavuko avuga ko  yatangiye gukina uyu mukino wa Taekwondo afite imyaka 7  ubu amaze kwitabira amarushanwa y’abakiri bato ku rwego mpuzamahanga kandi arifuza gukomeza kwitwara neza.

 

TANGA IGITEKEREZO

Leave a Reply

1 Comment on "Taekwondo: Muri Dream TC barishimira ibyo bamaze kugeraho"

avatar
Sort by:   newest | oldest | most voted
Gali
Guest

Wouww go go Dream Taekwondo Club, mukomereze aho mugiteza imbere Taekwondo mu Rwanda no muri Africa, esprit ba Master! Congz