21°C , Partly sunny | Kigali-Rwanda
Kayitare Benoit (hagati), ukinira Police Taekwondo Club wahawe igihembo k'itike y'indege yo kujya i Dubai

Taekwondo: Kayitare yahishuye icyamufashije kuba umukinnyi witwaye neza

Yanditswe na NKOMEJE GUILLAUME

Ku ya 12-10-2018 saa 13:20:51

Kayitare Benoit ukinira Police TC ni we wahawe igihembo cy’umukinnyi mwiza mu kiciro cy’abagabo mu irushanwa mpuzamahanga rya “2018 Korean Ambassadors Cup”, ryabereye kuri Sitade Amahoro i Remera, kuva tariki 6-7 Ukwakira 2018.

Uyu mukinnyi usanzwe ari kapiteni w’ikipe y’igihugu, wahatanye mu kiciro cy’abakuru batarengeje ibiro 54, yegukanye umudali wa zahabu atsinze ku mukino wa nyuma, Ahmed Mohamed ukinira Sudan Taekwondo club.

Ibi byamuhesheje igihembo gikuru k’iri rushanwa ryabaga ku nshuro ya 6, ari cyo itike y’indege yo kujya i Dubai, yatanzwe na Kompanyi y’Indege ya Ethiopian Airlines.

Nyuma yo guhabwa iki gihembo, Kayitare yatangaje ko kwitwara neza muri iri rushanwa abikesha kwitoza cyane no kwigirira ikizere. Ati “Tukimara kumva ibihembo bizatangwa, nahise nkora imyitozo, mu by’ukuri nakoze imyitozo yo ku rwego rwo hejuru ntegura iri rushanwa, rero gutsinda, ni ibintu byanshimishije kandi bitantunguye cyane ko nari mfite n’ikizere.”

Kayitare Benoit (hagati), ukinira Police Taekwondo Club wahawe igihembo k’itike y’indege yo kujya i Dubai

Kayitare avuga ko afite intego yo kuzaba umunyabigwi muri Taekwondo, yemeza ko guhabwa iki gihembo cyo kujya Dubai, bizamubera intangiriro yo kubona ibyiza. Ati “Guhabwa igihembo k’itike y’indege, ubu ndatangiye, ejo bundi wenda hari ahandi nzajya harenze Dubai, wasanga nzabona kujya kwiga, ubu ni intangiriro ryo kugira ngo ndebe kure cyane ku by’ejo hazaza”.

TANGA IGITEKEREZO

Leave a Reply

Your email address will not be published. Required fields are marked *