28°C , Sunny | Kigali-Rwanda

Taekwondo: Bishimiye uko irushanwa “Korean Ambassadors Cup 2019” ryagenze

Yanditswe na BUGINGO FIDELE

Ku ya 11-09-2019 saa 09:48:52
Ikipe ya Paradisso yo muri Kenya ni yo yegukanye Korean Ambassadors Cup 2019

Tariki 06 kugeza 08 Nzeri 2019 kuri Sitade Nto Amahoro i Remera habereye irushamwa mpuzamahanga mu mukino wa Taekwondo “Korean Ambassadors Cup 2019”.

Iri rushanwa ryari ryitabiriwe n’amakipe 20 arimo amakipe 3 yo hanze ariyo  ikipe ya Paradisso na Kenya Refugee Team (Kenya) ndetse n’ikipe ya Eagle de Fer (RDC).

Nyuma yo gukina mu byiciro bitandukanye hakurikijwe  ibiro, ikipe ya Paradisso  yo muri Kenya ni yo yegukanye umwanya wa mbere nyuma yo kwegukana imidari 27 irimo 6 ya zahabu, 7 ya Feza n’indi 14 y’umuringa.

Iyi kipe yakurikiwe na Dream TC yo mu Rwanda ari nayo yari yegukanye iri rushanwa mu mwaka wa  2018. Iyi kipe yegukanye imidari 15 irimo 5 ya zahabu, 3 ya Feza n’indi 7 y’umuringa. Ikipe ya  Police TC yegukanye imidari 9 harimo 6 ya zahabu,1 wa Feza n’indi 2 y’umuringa yaje ku mwanya wa 3 naho  ikipe ya Special Line Up TC   na yo mu Rwanda  ni yo iza mwanya wa 4  aho yegukanye imidari 14 harimo 1 wa zahabu, 2 ya Feza n’indi 11 y’umuringa.

Mu gusoza iyi mikino,  Umunyamabanga mukuru w’ishyirahamwe  ry’umukino wa Taekwondo mu Rwanda “RTF”, Mbonigaba Boniface yatangaje ko bishimira uburyo irushanwa ryagenze. Yakomeje avuga ko hajemo abakinnyi bakomeye muri aka karere ari nayo mpamvu habayemo guhangana cyane bigatuma irushanwa riryoha.

Perezida wa Komite Olempike y’u Rwanda, Amb. Munyabagisha Valens wari uhagarariye Minisitiri w’Umuco na Siporo “MINISPOC” yashimiye abateguye iri rushanwa. Akomeza avuga ko abakinnyi bagaragaje urwego rwiza. Yavuze ko kandi  bazakomeza gufatanya na RTF mu gukomeza kuzamura uyu mukino.

Iri rushanwa riterwa inkunga n’Ambasade ya Koreya mu Rwanda   ryari  ribaye  ku nshuro ya 7, Ambasaderi wa Koreya mu Rwanda, Kim Eung-joong yatangaje ko bishimiye cyane uko irushanwa ririmo gutera imbere anavuga ko kuri iyi nshuro ryagenze neza aho n’abakinnyi bitabiriye bagaragaje urwego ruri hejuru mu mikinire.

Victor Otieno wari uyoboye ikipe ya Paradisso muri Kenya ari nayo yegukanye umwanya wa mbere  yavuze ko iri rushanwa ari  ikimenyetso k’iterambere ry’umukino wa Taekwondo mu Karere k’Afurika y’Uburasirazuba. Yakomeje avuga ko hari igihe abakinnyi babura aho biyerekanira ariko ko irushanwa nk’iri rituma bagaragaza urwego bariho.

Yashimiye kandi abateguye irushanwa anashima abakinnyi b’ikipe ye babashije kwitwara neza bagahesha ikipe umwanya wa mbere.

Iri rushanwa ritangira muri 2013 ryitabiriwe gusa n’amakipe yo mu Rwanda. Kuva muri 2014 hatangiye kwitabira amakipe yo mu Karere k’Afurika y’Uburasirazuba ndetse na RDC.

Ikipe ya Paradisso yo muri Kenya ni yo yegukanye Korean Ambassadors Cup 2019

Perezida wa Komite Olempike y’u Rwanda, Amb. Munyabagisha Valens (ibumoso) wari uhagarariye Minisitiri w’Umuco na Siporo “MINISPOC” na Ambasaderi wa Koreya mu Rwanda, Kim Eung-joong nyuma yo guhemba abitwaye nez amu kiciro k’ingimbi (Juniors)

Ambasaderi wa Koreya mu Rwanda, Kim Eung-joong wishimiye uko irushanwa ryagenze

Umunyamabanga mukuru wa RTF, Mbonigaba wishimira ko iri rushanwa ryari ku rwego rwo hejuru

Ikipe ya Rwanda Police TC

Iyi kipe ya Rwanda Police TC yari ifite n’abafana benshi

TANGA IGITEKEREZO

Leave a Reply

Your email address will not be published. Required fields are marked *