17°C , Partly cloudy | Kigali-Rwanda

Taekwondo: Abanyarwanda ntabwo bahiriwe muri shampiyona y’Isi

Yanditswe na Nkomeje Guillaume

Ku ya 19-05-2019 saa 15:47:19
Ubwo Kayitare Benon w'ikipe y'u Rwanda (ibumoso) yari agiye gukina na Yahya wo muri Arabie Saudite

Abakinnyi ikipe y’igihugu y’umukino wa Taekwondo y’abagabo ntabwo yahiriwe muri shampiyona y’Isi muri Taekwondo “2019 World Taekwondo Championships” irimo kubera mu Mujyi wa Manchester mu Bwongereza kuva tariki 15-19 Gicurasi 2019.

Nk’uko bitangazwa n’Ishyirahamwe ry’umukino wa Taekwondo mu Rwanda “RTF” ni uko iyi kipe y’igihugu igizwe n’abakinnyi 3 itashoboye kurenga ikiciro cy’amajonjora k’iyi shampiyona y’Isi irimo kuba ku nshuro ya 24.

Kayitare Benon, kapiteni w’ikipe y’igihugu wahatanye mu batarengeje ibiro 54, wari wagerageje kwitwara neza kurusha bagenzi be yaje gusezerwa na Yahya A. Asiri wo muri Arabie Saudite.

Sekanyambo Jean Paul wakinnye mu batarengeje ibiro 58, yasezerewe na Omar Lahekal wo muri Maroc naho Munyakazi Vincent wari mu bari munsi y’ibiro 68, yasezerewe na Abdelrahman Wael wo mu Misiri.

U Rwanda rwari rwitabiriye iyi mikino ya shampiyona y’Isi, ku nshuro ya 3, kugeza ubu nta mudari n’umwe rwari rwabasha kwegukana. U Rwanda, ku nshuro ya mbere rwitabiriye shampiyona y’Isi “2013 World Taekwondo Championships” yabereye mu Mujyi wa Puebla muri Mexique kuva tariki 15- 21 Nyakanga 2013.

Rwongeye kwitabira iyabaga ku nshuro ya 22 “2015 World Taekwondo Championships” yabereye mu mujyi wa Chelyabinsk mu Burusiya kuva tariki 12-18 Gicurasi 2015. Shampiyona y’Isi yaherukaga kuba muri 2017 ntabwo u Rwanda rwitabiriye.

Iri shyirahamwe ry’umukino wa Taekwondo mu Rwanda “RTF” ritangaza ko nyuma y’uko iyi kipe y’igihugu isezerewe muri shampiyona y’Isi barateganya ko izahita ikomeza imyitozo mu rwego rwo kwitegura imikino ya “All African Games”, izabera muri Maroc kuva tariki 19 Kanama kugeza 23 Kanama 2019.

Ubwo Kayitare Benon w’ikipe y’u Rwanda (ibumoso) yari agiye gukina na Yahya wo muri Arabie Saudite

TANGA IGITEKEREZO

Leave a Reply

Your email address will not be published. Required fields are marked *