17°C , Partly cloudy | Kigali-Rwanda
Sugira yasubukuye imyitozo nyuma y’ukwezi afite imvune

Sugira yasubukuye imyitozo nyuma y’ukwezi afite imvune

Yanditswe na Bugingo Fidèle

Ku ya 14-03-2019 saa 14:52:18

Sugira Ernest usanzwe ari rutahizamu w’ikipe ya APR FC n’ikipe y’igihugu yasubukuye imyitozo nyuma y’ukwezi yari amaze adakina kubera imvune yagize ubwo ikipe ya APR FC yakinaga umukino wa gicuti na Gasogi United.

Uyu rutahizamu yagize ikibazo k’imitsi yo mu itako mu mukino wari wahuje APR FC na Gasogi United wabaye tariki 13 Gashyantare 2019 aho yagiye muri uyu mukino atari yakira neza nyuma y’aho yari yagize imvune ubwo APR FC yakinaga na Etincelles FC mu mikino y’irushanwa ry’intwari tariki 29 Mutarama 2019.

Nyuma y’ukwezi yivuza, Sugira Ernest aratangaza ko ubu ameze neza ndetse ko yatangiye imyitozo yo kongera ingufu. Iyi myitozo yayitangiye ku wa Kabiri tariki 12 Werurwe 2019.

Yagize ati “Ubu meze neza natangiye imyitozo yo kwiruka nta bwo ndatangira gukora ku mupira”.

Mu cyumweru gitaha ni bwo Sugira azatangira gukora ku mupira ndetse anakorana n’abandi.

Sugira avuga ko agiye gukora cyane muri iki gihe nta mikino ya shampiyona iyi kipe ye irimo gukina kubera ikipe y’igihugu maze shampiyona izage gusubukurwa ameze neza ku buryo umutoza yazamuha umwanya wo gukina.

Sugira yasubukuye imyitozo nyuma y’ukwezi afite imvune

Kuva muri Kanama 2017 ubwo Sugira yagarukaga mu Rwanda avuye mu ikipe ya Vita Club muri RDC yagize ibibazo by’imvune aho yamaze hafi umwaka n’amezi 3 adakina.

TANGA IGITEKEREZO

Leave a Reply

Your email address will not be published. Required fields are marked *