Sugira yahesheje Amavubi itike ya CHAN 2020

Yanditswe na BUGINGO FIDELE

Ku ya 19-10-2019 saa 22:46:36
Sugira Ernest wahesheje u Rwanda itike ya CHAN 2020

Rwanda 1-1 Ethiopia (2-1)

Rutahizamu Sugira Ernest  yahesheje ikipe y’u Rwanda “Amavubi” itike yo kuzitabira imikino y’Afurika  y’ibihugu mu bakinnyi bakina imbere mu gihugu “CHAN 2020” izabera muri Cameroun.

Kuri Sitade ya Kigali i Nyamirambo tariki 19 Ukwakira ni bwo habaye umukino wo kwishyura hagati y’ikipe y’u Rwanda na Ethiopia. Ethiopia yari yatsindiwe iwayo  yabonye igitego  ku munota 72 gitsinzwe  na   Lemene Tafesse.

Aha byari bikomeye ku ruhande rw’Amavubi kuko byasabaga ko yishyura iki gitego kugira ngo ibashe gukomeza kuko iyo birangira gutya hari kwitabazwa penariti.

Ku munota wa 82, Sugira Ernest wanatsinze igitego rukumbi cyabonetse mu mukino ubanza yishyuye iki gitego  ku mupira mwiza yari ahawe na Fitina Ombalenga.

Nyuma yo kunganya igitego 1-1 mu mukino wo kwishyura ikipe y’u Rwanda yahise ibona itike ku bitego 2-1 mu mikino yombi.

Ikipe y’u Rwanda “Amavubi” iyi ni inshuro ya 4 igiye kwitabira imikino ya CHAN nyuma ya 2011 ku nshuro ya mbere, muri 2016 ubwo iyi mikino yaberaga mu Rwanda ndetse na 2018 ubwo  CHAN yaberaga muri Maroc.

Muri 2016 ni bwo ikipe y’u Rwanda yitwaye neza kuko yaviriyemo muri ¼  mu gihe 2011 na 2018 ikipe y’u Rwanda yaviriyemo mu majonjora. Muri 2018, u Rwanda rwari rwabonye itike nabwo rusezereye Ethiopia ku bitego 3-2 mu mikino yombi.

Ikipe y’u Rwanda, Uganda na Tanzani ni zo zizahagararira akarere k’Afurika y’u Burasirazuba muri CHAN 2020.

Irushanwa rya CHAN ryangiye gukinwa muri 2009 ubwo ryegukanwaga n’ikipe ya RDC.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.