22°C , Mostly sunny | Kigali-Rwanda
Sugira Ernest ukinira APR FC utangaza ko atishimiye kuba nta gitego aratsinda mu mikino 3 amaze gukina muri CECAFA 2019

Sugira nta bwo yishimiye umusaruro arimo gutanga muri CECAFA 2019

Yanditswe na NKOMEJE GUILLAUME

Ku ya 13-07-2019 saa 08:18:59

Rutahizamu w’ikipe ya APR FC n’ikipe y’igihugu “Amavubi”, Sugira  Ernest  aratangaza ko atishimiye kuba ataratsinda igitego na kimwe mu mikino 3 y’amatsinda amaze gukina mu irushanwa rya “CECAFA Kagame Cup 2019” ririmo kubera mu Rwanda kuva tariki 06 Nyakanga 2019.

Yabitangaje nyuma y’umukino usoza itsinda rya 3 aho APR FC yari imaze gutsindamo Heegan FC yo muri Somalia ibitego 4-0, umukino wabereye kuri Sitade ya Kigali, tariki 11 Nyakanga 2019.

Sugira wakinnye iminota yose y’umukino, akaba yari yagiriwe ikizere cyo kuba kapiteni w’iyi kipe yatangaje ko nk’umukinnyi ufite inshingano zo gutsinda ibitego atishimiye kuba nta gitego na kimwe aratsinda mu mikino igera kuri 3 amaze gukina muri iri rushanwa.

Yagize ati: Nta bwo nishimye, muri make nicyo navuga bitewe n’uko nka rutahizamu agomba kurangwa no gutsinda ariko imikino itatu irangiye nta gitego nsinze.”

Avuga ko nubwo bwose atari yabasha gutsinda bitamushyiraho igitutu kinini kuko yari amaze kinini adakina kubera imvune yagize mu 2017.

Ati: “Ariko nanone nta bwo nakwishyiraho igitutu bitewe n’uko nari maze hafi imyaka 3 ntakina ngira ngo mwese murankurikirana kuva navunika mu 2017 uyu munsi ni bwo navuga ko ntangiye gukina iminota 90 yuzuye kuba ntaratsinda, kuba ntarongera kubona izamu ni ibintu byumvikana.”

Sugira asobanura ko arimo gukora imyitozo ishoboka kugira ngo abashe kuba yakongera kugaruka mu bihe byiza, by’umwihariko akaba abifashwamo n’umutoza Mulisa Jimmy.

Ati: Natakaje ubukana imbere y’izamu ariko ni byo bintu ndimo kwibandaho ngira ngo murabibona ko mfite n’amahirwe ntozwa n’umutoza nawe wakinnye ku mwanya nkinaho ni yo myitozo yirirwa antoza urabona ndagera imbere y’izamu, ndanatera mu izamu na byo ni byiza nubwo wenda umupira utajya mu izamu ariko niba ubikoze rimwe, kabiri, 3 ubwa kane ndakeka ko bizagenda neza.”

Umutoza wa APR FC, Mulisa Jimmy avuga ko agerageza kumuganiriza muri ibi bihe bitoroshye arimo, kuko nawe yabibayemo.  Ati: “Sugira navuga ko afite amahirwe y’uko mba ndi hafi ye, nkunda kumuganiriza kuko ibyo ari kunyuramo nange nabinyuzemo mu by’ukuri biba bigoye, nk’umuntu umutoza tuba turi kumwe ndamuganiriza nkamusubizamo imbaraga kubera ko ni umukinnyi mwiza, arumva, arakora, ni umuntu ubwira ugasanga yagiye kwikoresha imyitozo ku giti ke, igisigaye natsinda igitego kimwe kizahita kimufungurira ibindi.”

Uyu rutahizamu yemeza ko iyi mikino ya CECAFA Kagame Cup 2019 izamufasha kugira byinshi ayigiramo kugira ngo azatangire shampiyona y’umwaka utaha w’imikino ameze neza.

Sugira Ernest yagarutse muri APR FC mu 2017 avuye muri Vita Club yo muri RDC, yaje guhita agira ikibazo k’imvune ubwo yari mu myitozo y’ikipe y’igihugu Amavubi yiteguraga umukino wo kwishyura wa Uganda mu gushaka itike ya “CHAN 2018” ari nayo yatumye amara igihe kinini adakina.

Sugira Ernest ukinira APR FC utangaza ko atishimiye kuba nta gitego aratsinda mu mikino 3 amaze gukina muri CECAFA 2019

TANGA IGITEKEREZO

Leave a Reply

Your email address will not be published. Required fields are marked *