19°C , Partly cloudy | Kigali-Rwanda
Mu bahanzi Stewart yakoranye na bo indirimbo harimo na Mani Martin

Stewart yavuze agahinda aterwa no gukorera umuziki aho akomoka

Yanditswe na NDAMYIROKOYE FRANÇOIS

Ku ya 03-10-2018 saa 07:42:22

Umuhanzi Lain Stewart ukomoka muri Ecosse akaba yarashakanye n’umunyarwandakazi yavuze ko uburyo aho ukomoka hari amaradiyo adacuranga indirimbo z’abahanzi baba bageze mu kigero k’imyaka 40 bimubabaza.

Mu bahanzi Stewart yakoranye na bo indirimbo harimo na Mani Martin

Stewart yatanze urugero rwa radiyo  iwabo yitwa Radio 1 ikunzwe cyane itajya icuranga indirimbo z’abahanzi bakuru akaba yishimira ko mu Rwanda ubuhanzi butagendera ku myaka.

Ati «Nishimira ko aha batagendera  ku myaka umuhanzi  afite kugira ngo bacurange indirimbo ze.»

Ibi abishimangira avuga ko mu Rwanda mu bitangazamakuru ajyamo kumwakira batagendera ku myaka nk’uko iwabo bimeze.

Yavuze kandi ko  iwabo kubonana  n’abahanzi nka Edsheeran,  Sam Smith n’abandi  kugira ngo umuhanzi abashe gukorana na bo indirimbo bitoroshye na mba.

Ati «Guhura na bariya bahanzi kugira ngo  umuntu akorane na bo indirimbo nta bwo byoroshye rwose.»

Ku rundi ruhande uyu muhanzi aherutse gusohora indirimbo iri mu kinyarwanda yose  yitwa «Ndagukunda» avuga ko yayandikiwe n’uwitwa Princess Hausina akaba ari Umunyarwandakazi.

Uzwi nka Madebeat urimo gukora indirimbo zitandukanye zigakundwa cyane, Stewart  yavuze ko ari we wayimukoreye mu buryo bw’amajwi.

Nyuma y’uko yasohoye iyo ndirimbo  mu buryo bw’amajwi n’amashusho  Stewart yavuze ko abantu batandukanye bayishimiye bamwe batungurwa n’uburyo aririmba mu kinyarwanda.

Yavuze  ko  abantu  benshi  bakomeje kumusaba gukomeza gukora izindi ndirimbo ziri mu kinyarwanda.

Mu 2013 avuga ko  ari bwo yatangiye umushinga wo kuzajya akorana indirimbo  n’abahanzi nyarwanda.

Abahanzi b’Abanyarwanda yabashije gukorana indirimbo na bo  harimo Mani  Martin ndetse na Jean Paul  Samputu.

Indirimbo yakoranye na Mani Martin yitwa «Love again» naho Jean Paul Samputu we bakoranye iyitwa «Rwandan dream” ijyanye no kwibuka abazize Jenoside yakorewe Abatutsi mu 1994.

Umushinga afite wa vuba yavuze ko ari uwo  gusohora indirimbo arimo gukorana na Bruce Melody izaba yitwa  «No matter» akaba avuga ko na yo irimo gukorwa  n’uzwi nka Madebeat.

Iyo ndirimbo avuga ko izasohoka mu minsi  ya vuba

Mu gihe kitarambiranye   yavuze ko azagaruka mu Rwanda gukora igitaramo  abarimo gukunda umuziki  we bakazamubona amaso ku maso abataramira.

 Aho akomora ubuhanzi bwe

Lain Stewart avuga ko  se yajyaga aririmba mu tubyiniro dutandukanye aho yajyaga aririmba  asubiramo indirimbo z’abandi bahanzi.

Kubera iyi mpamvu avuga ko  ubuhanzi ari ikintu cyo mu muryango we. Afite imyaka 5 avuga ko ari bwo we yatangiye kuririmba.

Mu buhanzi bwe avuga ko yagiye asubiramo indirimbo z’abahanzi batandukanye ngo gusa yaje gufata umwanzuro wo kwibanda ku ndirimbo ze bwite.

 

 

 

 

TANGA IGITEKEREZO

Leave a Reply

Your email address will not be published. Required fields are marked *