2017-12-11 11:57:22 clouds 27o High | Kigali Rwanda

Dukurikire:
 
 

RCA: Abarenga 5 000 barishyuza indishyi muri ICC

Yanditswe na IMVAHO NSHYA

Kuya 2017-11-22 09:49:27

 
Share on:
 
Yasuwe:68
 
Yavuzweho:200
 
10
 
10

Abaturage bo muri Repubulika ya Centrafrique (RCA) barishyuza Urukiko Mpuzamahanga mpanabyaha rw’i La Haye mu Buholandi ICC (International Criminal Court), indishyi y’akababaro ku byaha by’ihohoterwa bakorewe n’abarwanyi ba Jean-Pierre Bemba mu Kwakira 2002 no muri Werurwe 2003. Ibyo byaha ni na byo byatumye Bemba wahoze ari Visi Perezida wa Kongo-Kinshasa akatirwa n’urwo rukiko muri Kamena 2016. Abasaba izo ndishyi ngo barenga ibihumbi bitanu.

JPEG - 176.9 kb
Jean Pierre Bemba wahoze ari Visi Perezida wa Kongo ni we uryozwa ibyaha inyeshyamba yari ayoboye zakoze muri Centrafrique muri 2002-2003

Muri raporo yashyizwe ahagaragara ku wa Mbere w’iki cyumweru na FIDH, umuryango Mpuzamahanga uharanira uburenganzira bwa muntu, umwe mu bagore bahohotewe yatanze ubuhamya ati «Icyo nkeneye ni indishyi y’akababaro nta kindi. Mfite umwana nabyariwe n’abasirikare ba Jean-Pierre Bemba bamfashe ku ngufu. Ubu mbana n’uwo mwana nta bushobozi mfite bwo kumubeshaho».

Ibitangazamakuru Jeune Afrique na AFP (ibiro ntaramakuru by’Abafaransa), bitangaza ko muri ubwo buhamya uwo mugore avuga ko icyo ategereje ari indishyi z’akababaro ngo atitaye ku nzira yabonerwamo.

Jeune Afrique na AFP biti «Jean Pierre Bemba yahamwe n’ibyo byaha nk’umuntu wari umuyobozi mukuru wa MLC, umutwe w’inyeshyamba zarwanyaga Leta ya Repubulika iharanira demokarasi ya Kongo ». Abasirikare be bambutse muri Centrafrique atabajwe na Ange Félix Patassé wari Perezida w’icyo gihugu ubwo abatavuga rumwe na we bahiritse ubutegetsi bwe ku ngufu. Izo nyeshyamba za MLC (Mouvement de libération du Congo) zimaze kwambuka muri RCA ngo zahohoteye abaturage ngo zinasahura umutungo wo mu bice zari zigaruriye.

AFP iti «ICC itegerejweho gutanga uburenganzira bwo kwishyura indishyi z’akababaro abanyasantrafurika 5229 bahohotewe n’abarwanyi ba Jean-Pierre Bemba hagati y’Ukwakira 2002 na Werurwe 2003». Umuryango FIDH usanga ICC itagomba kurangarana abo benegihugu ba Centrafrique b’inzirakarengane bahemukiwe n’izo nyeshyamba zo mu gihugu cya DRC, kandi ngo ikita kuri buri cyaha n’uburemere bwacyo.

FIDH iti «Turimo kuvugana na ICC tuyisaba ko yateganya uburyo abo bahohotewe bazacungirwa umutekano mbere na nyuma yo guhabwa izo ndishyi z’akababaro, cyane cyane kubera ko mu gihugu cya Centrafrique hakiri imitwe y’inyeshyamba ihohotera ikanica abenegihugu b’inzirakarengane no kugeza magingo aya». Uyu muryango uharanira uburenganzira bwa muntu usaba ko hagenwa uburyo bwihariye bwo kwita ku bafashwe ku ngufu bakananduzwa agakoko ka virusi itera Sida.

Uti «Mu byo FIDH isabira abo bandujwe Sida harimo: kuvuza abanduye virusi kandi bagomba kujya basuzumwa bakanahabwa imiti batishyuye kugeza bakize neza».

Bemba yahamwe n’ibyaha 5 birimo ibyaha byo mu ntambara n’ibyaha byibasiye inyoko muntu byakozwe n’abarwanyi be yohereje gutabara Ange-Félix Patassé wari Perezida wa Centrafrique, wahiritswe ku butegetsi na François Bozizé ku itariki 15 Werurwe 2003.

Jean-Pierre Bemba yakatiwe gufungwa imyaka 18. Yongeye gukatirwa umwaka umwe n’ihazabu y’amayero 300 000, ku cyaha cyo koshya abatangabuhamya kubeshya afatanyije n’uwamuburaniraga, nk’uko byemejwe n’abacamanza ba ICC muri Werurwe 2017.

Kuva ICC itangijwe hashize imyaka 15, imaze gusaba indishyi z’akababaro inshuro 3. Ubwa mbere hari mu manza za Ahmad Al-Mahdi w’Umunyemali na Germain Katanga wo muri DRC. Mahdi agomba gutanga indishyi z’amayero akabakaba miliyoni 3 kubera gusenya inzu ndangamurage zo muri Tombouctou mu mwaka wa 2012.

Katanga yasabwe gutanga indishyi z’amadolari 250 kuri buri muturage wahemukiwe n’inyeshyamba Germain yayoboraga. Abaturage bose bazishyurwa ni 297.

KAYIRA ETIENNE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE