2017-12-11 11:57:22 clouds 27o High | Kigali Rwanda

Dukurikire:
 
 

2018 hazakemurwa ibibazo bikiri mu itumanaho-Maj. Nyirishema

Yanditswe na IMVAHO NSHYA

Kuya 2017-11-20 05:42:58

 
Share on:
 
Yasuwe:228
 
Yavuzweho:200
 
10
 
10

Umuyobozi mukuru w’Ikigo k’igihugu kigenzura imirimo imwe n’imwe ifitiye igihugu akamaro (RURA), Maj. Patrick Nyirishema yijeje Abanyarwanda ko umwaka utaha wa 2018 uzaba ari umwaka wo gukemura ibibazo byose bikiri mu itumanaho iki kigo gishinzwe.

JPEG - 145.4 kb
Ikigo RURA kizakemura ibibazo byose bikiri mu itumanaho mu gihugu mu mwaka wa 2018

Yabigarutseho ubwo Banki Nkuru y’u Rwanda n’Urugaga rw’Abikorera (PSF) batangizaga icyumweru cy’ubukangurambaga cyo gushishikaririza abantu n’abikorera gukoresha ikoranabuhanga muri serivisi zo kwishyurana amafaranga, hadakoreshejwe kuyagendana mu ntoki, “Cashless Payment”.

Mu gutangiza ubwo bukangurambaga, bamwe mu bacuruzi bitabiriye icyo gikorwa bagaragarije ikigo gishinzwe kugenzura iby’itumanaho ari cyo RURA ko mu mirongo y’itumanaho hakirimo ibibazo by’ihuzanzira (Reseau), hari kandi n’uduce tumwe na tumwe sosiyete z’itumanaho zitaragezamo imirongo, bigatuma imashini zifashishwa mu korohereza abakiliya kwishyura hakoreshejwe ikoranabuhanga (POS) bibura imirongo serivisi zikimurirwa mu guhererekanya amafaranga mu ntoki.

Maj. Nyirishema yavuze ko nubwo hakiri ibibazo muri izo mashini za POS ariko akenshi bitaba ari ibishingiye gusa ku ihuzanzira ariko naho biterwa n’iryo huzanzira bizakemuka mu mwaka utaha.

Ati “Rimwe na rimwe hari aho ninjira mfite telefone nkakira ubutumwa bw’itumanaho, amafoto, n’ibindi ku rubuga nkoranyambaga rwa Whats app bigenda, ariko akambwira ngo nta rezo ihari; kandi ubutumwa ndi kwakira kuri whats app n’ibindi bisaba ‘rezo’ nyinshi kurusha izikorwa muri bwa buryo bwa mashine yishyurirwaho.

Ku rundi ruhande hari ahantu usanga koko hari ikibazo cy’ihuzanzira, iyo ari icyo kibazo nta bwo akenshi ari ukuvaho no kujyaho, ahubwo usanga mu gice runaka ihuzanzira ritameze neza.

Aho ngaho nagira ngo mvuge ko RURA ifatanyije na kompanyi z’itumanaho zitanga serivisi, uyu mwaka wa 2018 twawugize umwaka wo gukemura ibibazo byose bya ‘rezo’ mu gihugu.”

Nubwo atatangaje uduce dufite icyo kibazo mu gihugu, Maj Nyirishema yakomeje asobanura ko ku bufatanye n’inzego z’ibanze hakozwe igenzura ku duce twose two mu gihugu hamenyekana ahakiri ibibazo bya ‘rezo’ bityo uwo mwaka ukazaba uwo kuzabikuraho.

Abacuruza utumashini twa POS dufasha abacuruzi n’abakiliya kwishyurana amafaranga nabo basabye amabanki kuborohereza bagahuza imikorere mu buryo bwo gufasha abakiliya kwishyura amafaranga yabo aturutse ku mabanki bidasabye kubanza kuyashyira ku makarita yishyurirwaho amafaranga.

Kugeza ubu mu gihugu hose habarurwa ko hari utwuma twa POS tugera ku 2031 n’utuzu duto 405 turimo ibyuma bikorana n’amakarita ya banki (ATM) bikiyongera ku bantu barenga miliyoni munani biyandikishije mu buryo bw’itumanaho ryo guhererekanya amafaranga binyuze ku matelefone “Mobile money”.

MUTUNGIREHE SAMUEL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE