2017-12-11 11:57:22 clouds 27o High | Kigali Rwanda

Dukurikire:
 
 

Inkingo zitwara Leta asaga miliyari 12,75 buri mwaka

Yanditswe na IMVAHO NSHYA

Kuya 2017-11-20 05:39:20

 
Share on:
 
Yasuwe:152
 
Yavuzweho:200
 
10
 
10

Umuyobozi w’agateganyo wa gahunda y’igihugu y’ikingira, Sibomana Hassan, yatangarije Imvaho Nshya ko nubwo inkingo zikoreshwa muri gahunda yo gukingira indwara zitandukanye zitangwa ku buntu zitwara Leta miliyoni zigera kuri 15 z’amadolari y’Amerika buri mwaka, ni ukuvuga asaga miliyari 12,75 z’amafaranga y’u Rwanda.

JPEG - 301.8 kb
Inkingo z’abana Leta izitangira ubuntu kubera kurinda ubuzima bw’Abanyarwanda, ariko zirahenda cyane (Foto RBC)

Mu kiganiro kihariye Imvaho Nshya yagiranye na Sibomana Hassan, yifuje kumenya igiciro k’inkingo Leta itanga, dore ko zitangwa ku buntu. Yagize ati “Mu by’ukuri inkingo zirahenda; kuko iyo urebye inkingo dukoresha muri gahunda yo gukingira zigera kuri miliyoni 15 z’amadolari y’Amerika buri mwaka.”

Akomeza avuga ko abantu bakwiye kumenya ko inkingo zihenda leta nubwo kuzigura hajyamo n’uruhare rw’abaterankunga nyamara izo ndwara zikingirwa harimo izagombye kuba zirindwa.

Ati “Kugira ngo mu by’ukuri dukoreshe ayo mafaranga turimo kurinda abantu indwara mu by’ukuri zimwe na zimwe zagombye kuba zirindwa mu bundi bushobozi buhari nko kugira isuku, inyinshi cyane ziterwa n’ibibazo by’isuku nke.

Indwara nyinshi zandurira mu kanwa, mu myanya y’ubuhumekero, kandi mu by’ukuri aho hantu hagombye kuba hari isuku ibyo bibazo byakemuka […] Niba abaturage bazibonera ubuntu, ntibivuze ko zitagurwa; zigera mu gihugu zaguzwe kandi ziranaduhenda cyane, ndetse unarebye amafaranga azigendaho mu by’ukuri biragoye kuvuga ngo Leta yonyine ishyiremo amafaranga ku buryo usanga tugifite na none ubushobozi tuvana ku baterankunga.”

Sibomana asobanura ko kugira ngo umwana umwe ahabwe inkingo zose uko zateganyijwe 11 ku bahungu, na 12 ku bakobwa, bisaba amadolari y’Amerika arenga 90, ni ukuvuga asaga ibihumbi 76 by’Amafaranga y’u Rwanda ku mwana.

Inkingo z’abana zirimo urukingo rw’igituntu, imbasa, tetanusi, akaniga, iseru, umusonga, lubeole, impiswi n’izindi zibasira abana.

Kugeza ubu abana bari munsi y’imyaka itanu bakingiwe inkingo zose, naho 7% basigaye bakaba barafashe inkingo zimwe bakazicikiriza.

Inkingo zitangwa muri gahunda y’ikingira zibanziriza ku babyeyi mu gihe batwite, aho bakingirwa ku buntu indwara zitandukanye zo kubarinda kubyara umwana ufite ibibazo, hakaba n’izihabwa abana kuva bakivuka kugeza ku myaka itanu; naho izihabwa abantu bakuru bakazigura ku giciro kizwi mu rwego rwo kurinda abantu kuzahura n’ibyorezo bitandukanye no kubahiriza amasezerano ibihugu bigirana mu kwirinda gukwirakwiza ibyorezo.

MUTUNGIREHE SAMUEL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE