2017-12-11 11:57:22 clouds 27o High | Kigali Rwanda

Dukurikire:
 
 

Abantu ibihumbi 178 bazajya babona akazi kavuye mu buhinzi

Yanditswe na IMVAHO NSHYA

Kuya 2017-11-16 06:25:39

 
Share on:
 
Yasuwe:61
 
Yavuzweho:200
 
10
 
10

Minisitiri w’ubuhinzi n’ubworozi Dr. Mukeshimana Geraldine yatangaje ko gahunda y’ikiciro cya kane ivuguruye y’ubuhinzi n’ubworozi mu gihe k’imyaka irindwi iri imbere (PSTA4) izajya itanga akazi ku bantu bagera ku bihumbi 178 mu kuzamura ubukungu bw’igihugu buri mwaka.

JPEG - 249.4 kb
Dr Mukeshimana Geraldine asobanurira Inteko uko gahunda y’ubuhinzi n’ubworozi imeze mu myaka iri imbere (Foto Gisubizo G.)

Gahunda ya PSTA4 izatangira gushyirwa mu bikorwa umwaka utaha wa 2018 kugeza 2024, nk’uko Dr. Mukeshimana yayimurikiye Inteko Ishinga Amategeko umutwe w’abadepite, izaba yibanda ku nkingi enye ari zo kongera umusaruro ku buso bw’ubutaka no ku matungo, kubaka ubudahangarwa bw’ibihingwa n’ubwoko bw’amatungo bifite ubushobozi bwo kwihanganira ingaruka z’imihindagurikire y’ibihe, kugira abahinzi abanyamwuga no gushyiraho uburyo ibyo byose bikorwa, bigakorwa neza ababikora boroherejwe kubikora neza.

Yagaragaje ko ibikorwa byose bikubiye muri izo ngamba biramutse bikozwe byatanga imirimo ku bantu benshi n’izindi nzego zishamikiye ku buhinzi zikazamuka ari na ko zitanga imirimo.

Ati “Turamutse dukoze uko tubiteganya ubuhinzi bw’ibanze bwatanga imirimo igeze ku bihumbi 22, mu bikorwa byo kongerera agaciro ibikomoka ku musaruro w’ubuhinzi bigatanga akazi hafi ku bantu ibihumbi 38, hanyuma imirimo yo mu mahoteli n’ahandi hose ubuhinzi bugenda bugiramo uruhare haboneka imirimo ingana hafi n’ibihumbi 118.”

Yakomeje agaragaza ko iyi gahunda ya PSTA4 muri rusange iteganya ko umusaruro mbumbe w’ubuhinzi ku gihugu wajya uba 10% buri mwaka.

Mu bijyanye no kugabanya ubukene, Minisitiri Mukeshimana yavuze ko mu mwaka wa 2024 ikigereranyo rusange cyo kugabanya ubukene kizaba kigeze kuri 21.8% kivuye kuri 39.1% mu 2014 ariko nk’uko gahunda ya PSTA4 ibiteganya iramutse ikozwe neza, igipimo cyo kugabanya ubukene cyamanuka kikagera kuri 15%.

Mu bindi iyi gahunda yitezweho kongeramo imbaraga birimo kuzamura imirire myiza, aho ikigero k’intungamubiri umuntu afata kizaba cyarazamutse kikagera kuri kilokalori (Kcal) 2 500 ku munsi muri 2021/2022.

Ikigo k’ibarurishamibare kigaragaza ko kugeza ubu abanyarwanda 70% bakora ubuhinzi mu gihe umusaruro wabwo ungana na 30% ku musaruro mbumbe w’igihugu.

Gahunda ivuguruye ya mbere, PSTA1 yatangiye mu mwaka wa 2004 igera mu mwaka wa 2008 yibanda cyane ku bihingwa biberanye n’akarere muri gahunda yo kongera umusaruro izwi nka ‘Crop Intensification Program’ (CIP), iya kabiri itangira mu 2009 igera mu 2012 yibanda ku kongera umusaruro mu buhinzi n’ubworozi mu buryo bwihuse, iya gatatu ari na yo iri ku musozo kuva mu 2013 kugeza Kamena 2018 yita ku bijyanye no guhingira isoko mu gihe iyi izibanda ku kurema ubukire no gukura abantu mu buhinzi bwa gakondo bajya mu buhinzi bw’umwuga.

MUTUNGIREHE SAMUEL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE