2017-12-11 11:57:22 clouds 27o High | Kigali Rwanda

Dukurikire:
 
 

Inganda z’ imyumbati zizohereza mu mahanga ibicuruzwa bya miliyoni 4 z’amadolari

Yanditswe na IMVAHO NSHYA

Kuya 2017-11-16 06:18:50

 
Share on:
 
Yasuwe:225
 
Yavuzweho:200
 
10
 
10

Ishyirahamwe ry’inganda n’abahinzi b’imyumbati mu Rwanda riratangaza ko ryihaye umuhigo wo kongera ingano y’ibyoherezwa mu mahanga bikomoka ku myumbati ku buryo bazoherezayo ibicuruzwa bya miliyoni 4 z’amadolari umwaka utaha.

JPEG - 300.7 kb
Abahinzi b’imyumbari batangiye kubona umusaruro nyuma yo guhabwa imbuto nshya

Ibi ni ibitangazwa na Muhizi Jotham, Umuyobozi w’ishyirahamwe ry’inganda n’abahinzi b’imyumbati mu Rwanda (ACPER) mu rugaga nyarwanda rw’abikorera, nyuma y’inama y’inteko rusange yahuje aba bahinzi n’abanyenganda b’igihingwa k’imyubati imaze iminsi ibiri ibera i Kigali.

Mu kiganiro kigufi yagiranye n’Imvaho Nshya, Muhizi yagaragaje ko ikibazo cy’umusaruro w’imyumbati kigenda gikemuka ku bw’imbaraga Leta yashyize mu kongera kubona imbuto nshya y’imyumbati kuko iyari isanzwe yaje kwibasirwa n’indwara ya kabore.

Ati “N’ubwo habayeho ikibazo cy’umusaruro w’imyumbati ku mpamvu z’indwara ya kabore yibasiye iki gihingwa, umusaruro utangiye kwiyongera kuko Leta yashyize imbaraga mu kongera kubonera abaturage imbuto nshya y’imyumbati ihangana n’uburwayi, kuri ubu umusaruro wa mbere ukaba umaze kuboneka ariko n’imyumbati itari mike mu mirima iri hafi kwera, ari naho dushingira umusaruro tuzabona mu kohereza mu mahanga ibikomoka ku myumbati.”

Umuyobozi w’Uruganda rw’imyumbati rwa Kinazi akaba n’umuyobozi wungirije muri ACPER, Nsanzabaganwa Emile, na we yemeje ko umusaruro w’imyumbati ugenda wiyongera kurusha umwaka ushize, kuko uruganda ayobora rwa Kinazi mu mwaka ushize rwatunganyaga umusaruro w’imyumbati uri hagati ya toni 16-20 ku munsi, ngo n’aho ubu kuva umusaruro watangira kwiyongera, uru ruganda rutunganya toni ziri hagati ya 100 na 135 ku munsi.

Nsanzabaganwa avuga ko bafite ikizere ko umwaka utaha umusaruro w’imyumbati batunganya kuri ubu uzikuba inshuro ebyiri kuko imyumbati igenda yiyongera.

Umuyobozi w’uruganda rutunganya imyumbati rwa Shekina rukorera mu Karere ka Rulindo mu Kagari ka Nyirangarama, Mbatezimana Pierre Damien, na we yemeza ko imyumbati itangiye kuboneka ugereranyije n’umwaka ushize.

Avuga ko mbere ubwo imyumbati yari ikiri myinshi, uru ruganda rwatunganyaga toni 50 z’imyumbati ku mwaka, kuri ubu ruratunganya toni 14 gusa.

Avuga ko ibura ry’imyumbati ryatumye uru ruganda rukorana na Koperative 5 z’abahinzi bagera ku 1500 rwahuye n’igihombo kingana na miliyoni 15.

Mbatezimana avuga ko igihombo kitagarukiye ku ruganda gusa, ko ahubwo cyanageze ku bahinzi, kuko batari bakibona imyumbati bacuruza ku ruganda, bigatuma batabona amafaranga uko byari bisanzwe.

Avuga ko imyubati yatangiye kuboneka bigatuma igiciro cyayo kimanuka, aho umwaka ushize ikilo k’imyubati ivuye mu murima cyaguraga amafaranga 200 naho kuri ubu kikaba kigeze ku mafaranga 120.

Inama y’inteko rusange y’iminsi ibiri yahuje abanyamuryango ba ACPER yatewe inkunga n’Ikigo k’igihugu gishinzwe iterambere ry’ibyoherezwa mu mahanga (NAEB), yasoje ifashe imyanzuro inyuranye ijyanye no kongera umusaruro w’imyumbati no kongera ibyoherezwa mu mahanga bikomoka kuri iki gihingwa.

MUGISHA BENIGNE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE