2017-11-22 08:52:40 clouds 27o High | Kigali Rwanda

Dukurikire:
 
 

Minisiteri 3 zitabye inteko zisobanura imiterere y’ibyaha byambukiranya imipaka

Yanditswe na IMVAHO NSHYA

Kuya 2017-11-14 08:34:16

 
Share on:
 
Yasuwe:112
 
Yavuzweho:200
 
10
 
10

Minisiteri eshatu zifite aho zihurira n’ikumirwa ry’ibyaha byambukiranya imipaka nk’ikoreshwa ry’ibiyobyabwenge ndetse n’icuruzwa ry’abantu zatumijwe n’abadepite bo muri komisiyo y’ububanyi n’amahanga, ubutwererane n’umutekano kugira ngo zibagaragarize imiterere y’ibyo byaha mbere y’uko batangira ingendo bazakorera mu Rwanda hose baganira n’abaturage kuri ibyo byaha.

JPEG - 212.5 kb
Abadepite bagize Komisiyo y’ububanyi n’amahanga, ubutwererane n’umutekano mu biganiro n’abayobozi ba za Minisiteri (Foto; Niyonsenga S)

Izo minisiteri ni Minisiteri y’Ubutegetsi bw’Igihugu, Minisiteri y’Ubutabera na Minisiteri muri Perezidansi ya Repubulika.

Ubwo batumizwaga, Depite Mutimura Zenu yagize ati “Turagira ngo muduhe amakuru y’ibanze, mutubwire uko ibyo bibazo byo gucuruza abantu no kwambutsa ibiyobyabwenge biteye. Ikindi kibazo k’ingorabahizi gihari ni imikoranire n’abaturanyi kuko hari aho batabona ibi bintu nk’ikibazo.”

Abadepite basobanuriye izi minisiteri ko batewe impungenge no kuba hari Abanyarwanda bitwaza ko kujya mu bihugu bituranye n’u Rwanda byemewe bityo bakajyayo bakagarukana ibiyobyabwenge.

Abayobozi muri izo minisiteri eshatu bose bavuze ko ikibazo k’ibiyobyabwenge ndetse n’icuruzwa ry’abantu bikomeza kugenda byiyongera mu Rwanda, ibintu ngo biterwa n’impamvu zirimo imiterere y’imipaka y’u Rwanda, ibihugu bihana imbibi n’u Rwanda bitabona ibiyobyabwenge nk’icyaha cyo gukumirwa, imyumvire ya bamwe mu banyarwanda, ubukene kuri bamwe mu bajyanwa gucuruzwa, ikoranabuhanga rikomeza gufata intera mu gukurura ibibi, ababyeyi batita ku bana babo n’ibindi.

Minisitiri muri Perezidanse, Uwizeye Judith, yabwiye abadepite ko hakorwa ibishoboka byose kugira ngo ibi byaha byose bicike burundu mu Rwanda. Ati “Nk’ibintu bijyanye n’icuruzwa ry’abantu inzego zose zimaze kubisobanukirwa, abantu bose bamaze kubyumva, abacamanza barabyumva ku buryo ari ikintu abantu bose bashyizemo ingufu zifatika.”

Asobanura impamvu ibi bibazo bikigorana gukumirwa mu Rwanda, Minisitiri w’Ubutegetsi bw’Igihugu, Kaboneka Francis ati “Mpereye ku kibazo k’ibiyobyabyenge, navuga ko ahanini ari ibyago biterwa n’aho igihugu cyacu giherereye, gihana imbibi n’ibihugu bitandukanye bose bagenda bafite imyumvire n’amategeko bidahuye n’ibyacu kandi akenshi ibyinjira iwacu binyura muri ibyo bihugu, bikagenda bitugiraho ingaruka zitandukanye.

Nka Uganda hari ibyo dufata nk’ibiyobyabwenge bo batabifata gutyo, ufashe nka kanyanga iwabo usanga atari ikibazo kandi twebwe tuyifata nk’ikiyobyabwenge. Ikindi kibazo ni imbibi zacu, aho usanga utamenya ngo wageze mu gihugu runaka ndetse n’abaturage batuye kuri iyo mipaka kubatandukanya ugasanga bitoroshye ngo umenye buri wese igihugu akomokamo.”

Mu bugenzuzi bw’ubushinjacyaha bw’u Rwanda ngo byagaragaye ko icyaha k’icuruzwa ry’abantu gifite umwihariko wo guterwa ahanini n’ikoranabuhanga rikomeza gutera imbere aho abantu bahurira ku mbuga nkoranyambaga bakamenyana barangiza bakohererezanya amafaranga mu buryo bw’ikoranabuhanga butandukanye, bityo umuntu akaba yabeshywe ko abamuhaye ayo mafaranga bashaka kumuha akazi mu mahanga hanyuma yagerayo agasanga arimo gucuruzwa.

Nk’uko kandi byasobanuwe n’Umushinjacya mukuru wa Leta, Mutangana Jean Bosco, yavuze ko bigoye gukurikirana bene ibi byaha kuko akenshi abacuruzwa baba ari abantu bagiye ku bushake bwabo bitewe n’ubukene, kuba bamwe bagerayo ntibongere kubona uburyo batanga amakuru y’uko babayeho, kuba mu gihugu hakiri abafite imyumvire yo kumva ko kuba mu mahanga ari byo byiza bityo n’izindi mpamvu zitandukanye ngo zishobora gukemukira gusa mu bufatanye bw’inzego zose, abaturage ndetse n’ibihugu.

NIYONSENGA SCHADRACK

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE