2017-11-22 08:52:40 clouds 27o High | Kigali Rwanda

Dukurikire:
 
 

Miliyari 96 mu gusimbuza imiyoboro y’amazi mu migi y’u Rwanda

Yanditswe na IMVAHO NSHYA

Kuya 2017-11-13 07:23:20

 
Share on:
 
Yasuwe:267
 
Yavuzweho:200
 
10
 
10

Umushinga wo gusimbuza imiyoboro y’amazi ishaje n’imito, mu Mujyi wa Kigali no mu migi 6 izunganira Kigali uzarangira utwaye miliyoni 121 z’amadolari y’Amerika, angana na 96 850 000 000 z’amafaranga y’u Rwanda.

JPEG - 307.9 kb
Muzora Aime, Umuyobozi mukuru wa WASAC, yasuye ibikorwa byo gushyiraho imiyoboro y’amazi

Nk’uko bisobanurwa n’Umuyobozi w’Ikigo k’igihugu gikwirakwiza amazi, isuku n’isukura (WASAC) , Muzora Aimé, ngo byagaragaye ko imiyoboro myinshi y’amazi yo mu Mujyi wa Kigali n’imigi 6 izawunganira ishaje, indi ikaba ari mito cyane, ku buryo idashobora guhaza amazi abaturage bayituye bitewe n’uko iyi migi yagiye iturwa birenze uko yari ituwe.

Ati “Ubusanzwe imiyoboro y’amazi ishyirwaho, nta bantu benshi bari batuye imigi ivuzwe haruguru, imiyoboro yari yarashyizweho yabashaga gutanga amazi ahagije ku batuye iyi migi, ariko nyuma y’aho imigi ikomeje guturwa n’abantu benshi, byagaragaye ko imiyoboro yabaye mito indi ikaba ishaje.”

Muzora avuga ko uyu mushinga uzagenda ukorwa mu Mujyi wa Kigali kimwe n’indi 6 yagenywe kuzunganira Umurwa mukuru w’u Rwanda.

Bamwe mu baturage b’imigi imwe n’imwe izunganira Kigali ndetse n’abo mu Mujyi wa Kigali ubwawo barishimira ibi bikorwa by’iterambere kandi birambye bigiye kubahesha amazi meza kandi menshi.

Murinda Augustin, utuye mu Murenge wa Nyamirambo mu Miduha, avuga ko iki ari igikorwa gitanga ikizere mu kubona amazi meza kandi menshi, akaba yifuza ahubwo ko cyakwihutishwa kugira ngo ibice bimwe na bimwe bitagira amazi abashe kugerayo.

Byukusenge Abel ni umuturage w’Umurenge wa Gatenga, mu Karere ka Kicukiro, na we arasanga igikorwa kizafasha abaturage kubona amazi meza ndetse kikazagira ingaruka nziza ku isuku n’isukura mu baturage n’amazi meza akabasha kugera kuri benshi.

Kagoyire Devota we atuye mu Karere ka Muhanga, Umurenge wa Nyamabuye, avuga ko kuba aka karere kari mu turere tugize imigi 6 izunganira Kigali ari ibyishimo n’iterambere ku bagatuye, naho ngo kongera amazi yakabonekagamo, bizafasha mu gikorwa cyo kwimakaza umuco w’isuku mu baturage no kubona amazi meza kuri benshi.

Ati “Abanyamuhanga twarishimye kuva twumvise ko Umugi wacu uri mu migi 6 izunganira Kigali, ni byo koko twari dukeneye amazi menshi arenze ayo dufite, none tumenye ko hagiye kwagurwa imiyoboro yayo ndetse hakanasazurwa n’indi, bizadufasha kurushaho kugira isuku, ku buryo n’abashyitsi bazajya basanga isuku yigaragaza mu mugi wacu ndetse tuzanabona amazi meza kandi menshi.”

MUGISHA BENIGNE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE