2017-11-22 08:52:40 clouds 27o High | Kigali Rwanda

Dukurikire:
 
 

Abacungagereza 36 birukanwe burundu bazira guta akazi

Yanditswe na IMVAHO NSHYA

Kuya 2017-11-10 08:36:01

 
Share on:
 
Yasuwe:215
 
Yavuzweho:200
 
10
 
10

Abacungagereza 36 birukanwe burundu mu kazi ku mpamvu zirimo no guta akazi, akaba ari amakosa yakozwe mu mwaka wa 2016-2017.

JPEG - 210.9 kb
CIP Sengabo Hilary, Umuvugizi w’Urwego rw’igihugu rushinzwe imfungwa n’abagororwa

Nk’uko bisobanurwa na CIP Sengabo Hilary, Umuvugizi w’Urwego rw’igihugu rushinzwe imfungwa n’abagororwa, ngo abacungagereza birukanwe 36 bagizwe n’abagabo 30 n’abagore 6, barimo umwe ufite ipeti rya kaporali n’abandi 35 bafite ipeti rya Warder, ari na ryo rito mu mapeti y’abacungagereza.

Urutonde rw’abirukanwe rwemejwe n’inama y’abaminisitiri yateranye kuri uyu wa Gatatu, tariki ya 08 Ugushyingo 2017, ariko abirukanywe bakaba bari barakoze amakosa mu mwaka wa 2016-2017, nk’uko bisobanurwa na CIP Sengabo.

Ati “Impamvu zo kwirukanwa kw’aba bacungagereza ni ikosa ryo guta akazi mu bihe binyuranye mu mwaka wa 2016-2017, kandi umucungagereza afatwa nk’uwataye akazi mu gihe amaze iminsi 7 atari ku kazi kandi atabimenyesheje nta n’impamvu nyayo izwi, icyo gihe ahanishwa kwirukanwa burundu mu kazi.”

Si ubwa mbere kandi abacungagereza birukanwa ku mpamvu z’amakosa kuko no mu mwaka ushize abacungagereza 52 birukanwe ku mpamvu z’amakosa no kwitwara nabi.

Ati “Abacungagereza birukanwe umwaka ushize bari barimo abo ku rwego rwa Ofisiye 2, abafite ipeti rya Sergent, Kaporali 2 n’abacungagereza bato (Warder) 46, birukanwe bazira imyitwarire mibi.”

Kwirukanwa kw’aba bacungagereza bije bikurikirana n’abagororwa 3 baherutse gucika Gereza ya Nyanza bakoresheje imigozi bamanukiyeho, barimo Ntamuhanga Cassien, Sibomana Kirege na Batambarije Theogene bakaba bagishakishwa n’inzego zinyuranye ku bufatanye n’abaturage.

Abacungagereza bose hamwe b’Urwego rw’igihugu rushinzwe imfungwa n’abagororwa ni abantu 1800, bakorera ku magereza yose aherereye mu gihugu.

MUGISHA BENIGNE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE