2017-11-22 08:52:40 clouds 27o High | Kigali Rwanda

Dukurikire:
 
 

Abanyeshuri barateganyirizwa ibikorwa n’ibiganiro mu gihe k’ibiruhuko

Yanditswe na IMVAHO NSHYA

Kuya 2017-11-10 08:31:39

 
Share on:
 
Yasuwe:118
 
Yavuzweho:200
 
10
 
10

Mu gihe ibiruhuko bikuru by’abanyeshuri bisigaje igihe gito ngo bitangire, Minisiteri y’Uburezi iratangaza ko hateganyijwe ibikorwa n’ibiganiro bizahabwa abanyeshuri muri icyo gihe ku bufatanye n’Inzego z’ibanze n’ibigo by’urubyiruko mu turere.

JPEG - 126.4 kb
Munyakazi Isaac, Umunyamabanga wa Leta muri Minisiteri y’uburezi ushinzwe amashuri y’inshuke, abanza n’ayisumbuye

Ibi ni ibitangazwa na Munyakazi Isaac, Umunyamabanga wa Leta ushinzwe amashuri y’inshuke, abanza n’ayisumbuye mu kiganiro kigufi yagiranye n’Imvaho Nshya.

Yagize ati “Turimo turategura ku bufatanye n’Inzego z’ibanze uburyo abanyeshuri bakurikiranwa mu gihe k’ibiruhuko kugira ngo barindwe ibikorwa bibi n’ubuzererezi ndetse n’ababyeyi babigizemo uruhare.”

Yavuze ko harimo gutegurwa ikimeze nk’urugerero gikubiyemo ibikorwa byoroheje byahabwa abanyeshuri mu gihe k’ibiruhuko ndetse bikanaherekezwa n’ibiganiro bijyanye n’umuco nyarwanda ukwiye kuranga urubyiruko rwa none.

Ati “Ibikorwa byarateganyijwe ndetse n’ibiganiro birahari bikenewe ku banyeshuri n’urubyiruko muri rusange, nka Minisiteri y’uburezi twatanze aho bizabera nk’amashuri n’ibibuga, bityo Inzego z’ibanze na zo zikazareba ibikorwa bibereye urubyiruko n’abanyeshuri akaba ari byo bikorwa, hakanatangwa n’ibiganiro ku bufatanye n’ibigo by’urubyiruko mu turere.”

Ku bijyanye n’iyi gahunda yatekerejwe na Minisiteri y’Uburezi ku bufatanye n’Inzego z’uturere, ababyeyi bemeza ko iyi gahunda ari inyamibwa kandi bayishimiye cyane, kuko hari ubwo abana bajyaga bananirana mu gihe k’ibiruhuko bagahora bazerera, ababyeyi bagashoberwa.

Mukandekezi Paulina ni umubyeyi, utuye mu Murenge wa Kigarama, Akarere ka Kicukiro, agira ati “Iki gitekerezo ni kiza nanjye ndagishimye nk’umubyeyi. Hari ubwo abana batunanira mu biruhuko bakirirwa bazerera bagacyurwa n’isaa sita cyangwa n’ijoro, ariko kuba bagiye kujya babashakira imirimo bakorera igihugu kandi itavunanye, ni byiza cyane, bizagabanya ubuzererezi bw’urubyiruko mu gihe k’ibiruhuko.”

Karasira Adeodatus na we ni umubyeyi, atuye mu Murenge wa Gatsata, Akarere ka Gasabo, avuga ko abanyeshuri mu biruhuko bari bakeneye koko ikibahuza, ariko ngo na none ni na cyo gihe cyo gukorera igihugu imirimo y’urugerero.

Ati “Ni byo, n’ubwo atari bose bazerera mu gihe k’ibiruhuko, ariko na none abana bagomba kugira aho bahurizwa bakagira imirimo bahabwa ijyanye n’imyaka yabo, bakaganirizwa kuri gahunda za Leta, bakaganirizwa ku muco nyarwanda n’amateka yaranze Abanyarwanda mu murimo.”

Yongeyeho ko ababyeyi bakwiye kugira uruhare muri ibi bikorwa, abanyeshuri bakagira ibyo bakorera igihugu ariko kandi bakagira n’imirimo bafasha ababyeyi, ibyo bizagabanya ubuzererezi bugaragara mu banyeshuri mu gihe k’ibiruhuko.

Abarezi na bo basanga ari ngombwa ko abana bakurikiranwa mu gihe k’ibiruhuko bidakozwe n’ababyeyi gusa kuko hari ubwo babacika bakigira mu bindi bintu bitari byiza bishobora no kubateza akaga gakomeye.

Bazubagira Annonciata ni umurezi mu Rwunge rw’amashuri rwa Gatenga ya I, ati “Ni byiza ko abanyeshuri mu biruhuko bashakirwa imirimo kugira ngo barindwe ibikorwa bibi bashobora kwishoramo cyangwa gushorwamo n’abantu bakuru, nk’ubusambanyi, ibiyobyabwenge, kwiyandarika, ubusinzi n’ibindi.”

Atanga urugero rw’igihugu yizemo, aho abanyeshuri bashyirirwaho ibikorwa by’ibiruhuko bizwi nka ‘Camp de vacances’, aho inzego zinyuranye za Leta zabigiragamo uruhare rukomeye, abanyeshuri bagahurizwa hamwe, hakaba hari n’imirimo yateganyijwe mu bice binyuranye by’igihugu.

Ati “Byatangaga umusaruro mu buryo bunyuranye, umusaruro uturuka mu maboko y’urubyiruko nk’ibikorwa bifatika byo kubaka amavomo, kubumba amatafari yo kubaka amashuri, amavuriro n’ibindi. Undi musaruro wabonekaga ni uko abanyeshuri bamenyaga gukora ndetse bikanabarinda ubuzererezi n’ubwomanzi mu gihe k’ibiruhuko.”

Abanyeshuri na bo bemera ko ari ngombwa kubonerwa icyo bakora kandi bahuriyeho ndetse bakanahabwa n’ibiganiro bijyanye na gahunda zimwe na zimwe za Leta badasobanukiwe, ibiganiro ku muco nyarwanda no ku mateka y’u Rwanda.

MUGISHA BENIGNE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE