2017-11-22 08:52:40 clouds 27o High | Kigali Rwanda

Dukurikire:
 
 

Gisagara:Imiryango 68 y’abatishoboye yahawe inzu

Yanditswe na IMVAHO NSHYA

Kuya 2017-11-09 08:25:38

 
Share on:
 
Yasuwe:39
 
Yavuzweho:200
 
10
 
10

Imiryango 68 y’abatishoboye yo mu karere ka Gisagara, yahawe inzu hagamijwe kuyifasha kubona aho iba heza, bashimira Leta ibakijije guhora basembera, bashaka aho bacumbika.

JPEG - 194 kb
Zimwe mu nzu zubakiwe abatishoboye mu karere ka Gisagara (Foto Umutoni B)

Bamwe mu bagize iyi miryango yashyikirijwe inzu muri aka karere ka Gisagara, bavuga ko bishimira cyane uburyo Leta y’u Rwanda itajya ireka kwita ku baturage bayo.

N’ibyishimo byinshi, Niyonsaba Prisca, umubyeyi w’imyaka 61 wahawe inzu, yavuze ko yari amaze imyaka igera ku 8 acumbika, aho ngo yari amaze gucumbika mu nzu zisaga 10.

Avuga ko atagiraga amahirwe yo kumara kabiri aho bamucumbiye, kuko kubera uburwayi afite bw’igifu bitamworoheraga kubona ubwishyu bw’inzu, abamucumbikiye barambirwa bakamwirukana.

Yagize ati “Nari maze imyaka 8 nshumbika, nari maze gucumbika mu nzu zisaga icumi. Ubusanzwe ngira indwara y’igifu, iyi ndwara ikambuza gushakisha ubuzima, aho bitanyoroheraga kubona ubwishyu bwo kwishyura aba banshumbikiye, bwacya bakanyirukana.

Ariko ubu ntimwakumva uburyo nishimye, nishimiye ko nabonye iwange, nishimiye ko nta we uzongera kumbwira ngo mvira mu nzu, ndashima ubuyobozi bwacu cyane cyane Nyakubahwa Paul Kagame, uhora atekereza ku mibereho myiza yacu nk’abaturage.”

Undi muturage witwa Ndayambaje nawe wahawe inzu, yakomeje agira ati “Sinabona uko mbabwira uko nishimye, reba ubu nashakishaka imibereho y’umuryango wange, ngaca inshuro zo kwishyura icumbi, nkanaca inshuro zo gushaka igitunga umuryango wange.

Kubura ubwishyu bwo kwishyura icumbi byahoraga bituma abanshumbikiye bansohora mu nzu uko bwije n’uko bukeye batananteguje ngo mvira mu nzu nkinge, ibi byatumaga ntatera imbere ariko ubu rwose nijeje ubuyobozi ko imibereho yange igiye guhinduka nkatera imbere kuko ntaho nzongera gutanga ubwishyu.”

Rutaburingoga Jerome, Umuyobozi w’Akarere ka Gisagara, avuga ko ingamba bafite ari uko muri ako karere buri muturage agira aho atura kandi heza. Asaba abahawe izo nzu kuzifata neza.

Yagize ati “Muri gahunda yacu ni uko buri muturage wo mu karere kacu agomba kugira aho atura kandi he, kuko bizabafasha kubaho nabo batekereza kwiteza imbere, ikindi tubasaba rero ni ukumva ko izi nzu ari izabo bwite, bakazifata neza hagira ahangirika bakihutira kuhasana badategereje ubufasha bwava ahandi.”

Akarere ka Gisagara kahize kubaka inzu 1429. Kugeza ubu izigera ku 1078 ni zo ziri kubakwa, aho uku kwezi kuzashira zose zuzuye. Izi zatashywe 68 zikaba zarubatswe ku bufatanye na Minisiteri y’ubutegetsi bw’igihugu, n’ingabo z’igihugu.

UMUTONI BEATHA

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE