2017-10-21 09:13:02 clouds 27o High | Kigali Rwanda

Dukurikire:
 
 

Imurikagurisha ribanziriza Kwita izina ni ingirakamaro mu bukerarugendo

Yanditswe na IMVAHO NSHYA

Kuya 2017-08-28 06:20:29

 
Share on:
 
Yasuwe:210
 
Yavuzweho:200
 
10
 
10

Minisitiri w’Ubucuruzi, Inganda n’Ibikorwa by’Umuryango w’Afurika y’Iburasirazuba (MINEACOM), Kanimba François yatangije imurikagurisha ry’ibikorwa bishingiye ku bukerarugendo aho yagaragaje akamaro k’icyi gikorwa anasaba ko cyazakomeza.
Iri murikagurisha ribaye ku nshuro ya kabiri rizamara iminsi 2 ritegurwa n’Ikigo cy’Igihugu cy’Iterambere (RDB), Minisitiri Kanimba yavuze ko iki ari igikorwa cy’ingirakamaro ku bakora mu bukerarugendo bo mu bihugu bitandukanye.

JPEG - 55.9 kb
Minisitiri Kanimba François avuga ko Kwita izina ingagi ari ingirakamaro mu iterambere ry’ubukerarugendo

Minisiti Kanimba yagize ati “Kwita izina ni igikorwa gikomeye cyane muri gahunda ya Guverinoma y’u Rwanda igamije kubungabunga ibinyabuzima bituma ubukerarugendo mu gihugu cyacu bukomeza gutera imbere, iri murikagurisha rero ni ukugira ngo abafatanyabikorwa batandukanye bo mu Rwanda no mu karere bashobore guhurira hamwe berekane ibikorwa byabo kuko bituma abantu baganira buri wese akamenya ingorane mugenzi we ahura na zo n’uburyo yafatanya n’abandi kuzikemura.”

Akomeza agira ati “Hari ibihugu byinshi bijya biteza imbere ubukerarugendo ariko ntibite ku bikorwa shingiro bituma ubwo bukerarugendo bubaho noneho ugasanga nyuma y’imyaka byasenyutse, twe rero mu Rwanda abariho ubu ngubu dufite inshingano yo kubungabunga uwo mutungo kamere utubyarira ubukungu kugira ngo n’abana bacu bazashobore kuwubonaho.”

Minisitiri Kanimba yakomeje asaba abaturanye na pariki gukomeza kuzifata neza bazibungabunga cyane ko kuri ubu Leta yanafashe icyemezo cyo kugenera abaturanye na za pariki 5% by’amafaranga ava mu bukerarugendo bwazo mu rwego rwo kubateza imbere.

Clare Akamanzi uyobora Ikigo cy’igihugu cy’Iterambere we avuga ko bene iri murikagurisha rizahora rikorwa mbere yo kwita izina kuko rigamije kwerekana ibyo abantu bafite byose mu bukerarugendo kandi rikaba rinakurura abanyamahanga bakaza mu Rwanda. Ati “Dufite amahoteli, dufite abantu baturutse mu bihugu bitandukanye nka Uganda, Ethiopia, Kenya na Tanzaniya n’abandi benshi, abo bose rero barerekana ibyo bakora iwabo ariko baraninjiriza igihugu cyacu mu bukerarugendo.”

Iri murikagurisha ribaye ku nshuro ya kabiri, ni imurikagurisha ribanziriza umunsi wo kwita izina abana b’ingagi riba rigamije kugaragaza ibikorwa bitandukanye bikorwa n’abantu batandukanye cyane cyane ibishingiye ku bukerarugendo.

Umuhango nyirizina wo kwita izina abana b’ingagi ugiye kuba ku nshuro ya 13 uzaba tariki ya 01 Nzeri 2017 aho abana b’ingagi 19 ari bo bateganyijwe kwitwa amazina mu muhango RDB ihamya ko uzaba urimo udushya twinshi ndetse hakaba harateguwe abatumirwa bakomeye bazita amazina izi ngagi.

NIYONSENGA SCHADRACK

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE