2017-10-18 07:03:30 clouds 27o High | Kigali Rwanda

Dukurikire:
 
 

Sisi yizeje Perezida Kagame umubano mwiza, amusaba kuzagenderera Misiri

Yanditswe na IMVAHO NSHYA

Kuya 2017-08-16 06:58:52

 
Share on:
 
Yasuwe:407
 
Yavuzweho:200
 
10
 
10

Perezida wa Repubulika y’u Rwanda, Paul Kagame, n’uwa Misiri, Abdel Fattah el Sisi bemeranyije kurushaho gutsura umubano mu nzego zitandukanye ku bw’inyungu z’abaturage b’ibihugu byabo.

Perezida ari mu ruzinduko rw’akazi mu Rwanda n’ibindi bihugu bitatu bya Afurika, Tanzania, Chad na Gabon.

Ejo hashize, aba baperezida bombi bagiranye ibiganiro muri Village Urugwiro, nyuma yaho babwira itangazamakuru ko guverinoma z’ibihugu byabo ziyemeje ubufatanye mu bucuruzi, ishoramari no kugirana umubano ushingiye ku rwego rw’abikorera.

JPEG - 132.3 kb
Perezida Kagame, Sisi n’abayobozi bo ku mpande zombi mu biganiro muri Village Urugwiro

Perezida Kagame yavuze ko hari amahirwe menshi u Rwanda ruzungukira kuri Misiri mu bijyanye n’ubucuruzi. Ati “Misiri ifite byinshi twayungukiraho mu gihe ibaye umufatanyabikorwa w’u Rwanda na Afurika y’Uburasirazuba mu bucuruzi.”

Yongeyeho ko Abanyamisiri batakwa Viza igihe baje mu Rwanda, bigatuma bahatana ku isoko ry’igihugu ku buryo buboroheye.

Ati “Abanyamisiri ntibakeneye gusaba viza ngo basure u Rwanda kandi twizeye kwakira abakerarugendo n’abacuruzi bo mu Misiri mu gihugu cyacu ku mubare munini.”
Umukuru w’igihugu cy’u Rwanda yagarutse ku mubano na Misiri mu gihe gishize , asanga waratanze umusaruro ushimishije ariko bakaba biteze ko wiyongera mu gihe kizaza.

Perezida wa Misiri yavuze ko we na Kagame bemeranyije gushyira ingufu mu mishinga itandukanye y’ubucuruzi, izatuma ibihugu byabo bitera imbere.

Ati “Twaganiriye uburyo twateza imbere ubucuruzi tukongera imishinga y’ishoramari duhuriyeho, tukazamura ubufatanye bw’inzego z’abikorera cyane cyane mu itumanaho, ubukerarugendo, ubuhinzi n’ingufu.”

Bemeje kandi gushyiraho komite ihuriweho n’ibihugu byombi kugira ngo yihutishe imishinga bemeranyijeho.

Sisi ati “Nemeranyije n’umuvandimwe wanjye Kagame ku kamaro ko gushyiraho komite ihuriweho n’ibihugu bibiri mu gihe gito gishoboka, ikaziga ku buryo imishinga y’ingenzi yakwihutishwa.”

Aba bakuru b’ibihugu kandi baganiriye ku mpinduka mu Muryango w’Ubumwe bwa Afurika, bemeranya gufatanya mu rugamba rwo kurwanya iterabwoba no gusaranganya ubumenyi.

Perezida Kagame kandi yakiriye mugenzi we wa Misiri mu isangira ryabereye muri Kigali Convention Centre ku mugoroba w’ejo hashize.

Kagame ageza ijambo ku bari muri ibyo birori, yavuze ko nubwo Misiri n’u Rwanda bidasangiye umupaka, bifite byinshi bihuriyeho bituma ubucuti bwabyo buzakomeza kwiyongera mu myaka iri imbere.

Perezida Sisi nawe yavuze ko Abanyamisiri biteguye gukorana n’Abanyarwanda mu nzego zitandukanye, asaba Perezida Kagame kuzasura igihugu cye kugira ngo umubano ukomeze gushinga imizi.

JPEG - 139.8 kb
Mu isangira basusurukijwe n’ababyinyi gakondo

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE