2017-10-22 09:15:58 clouds 27o High | Kigali Rwanda

Dukurikire:
 
 

Rusizi: Umuhanda wa kaburimbo bubakiwe watumye umusaruro wikuba gatatu

Yanditswe na IMVAHO NSHYA

Kuya 2017-08-11 14:41:13

 
Share on:
 
Yasuwe:65
 
Yavuzweho:200
 
10
 
10

Umuhanda wa Kaburimbo Bugarama-Muganza-Cimerwa ukomeje kubera igisubizo gikomeye cy’iterambere abaturage b’imirenge ya Bugarama, Muganza, Nyakabuye na Gitambi.

Bamwe mu bawukoresha bavuga ko amafaranga binjizaga mu musaruro wabo yikubye inshuro eshatu.

Abanyonzi bakoresha uyu muhanda bavuga ko bateje imbere imiryango yabo ndetse bamwe bagenda bava no ku magare bajya kuri za moto kuva aho baboneye umuhanda wa kaburimbo bemerewe na Perezida wa Repubulika Paul Kagame mu 2013, mu mwaka wakurikiyeho ugahita wubakwa ntutinde kuzura.

Bamwe banavuga ko mbere nta bagenzi cyangwa imitwaro babonaga batwara babajyana mu Bugarama, n’ahandi kuko habaga hari ivumbi ryinshi mu zuba n’icyondo cyinshi mu mvura bigatuma abagenzi biganyira kujya ku magare abanyonzi bakahahombera, ariko ubu ngo barinjiza bishimishije.

JPEG - 148.2 kb
Abanyonzi bakorera kuri iyi santere y’ubucuruzi ya Muganza barishimira intanbwe bagenda batera mu iterambere (Foto Bahuwiyongera S)

Ngendahayo Emmanuel, umwe muri aba banyonzi, yagize ati “Mbere umuntu yabonaga amafaranga 1000 yabize icyuya kuko abagenzi binubiraga ko tubatera umwanda haba mu mvura cyangwa mu zuba, n’imizigo yabo bakanga ko tuyigira ivumbi. Amagare yacu yarahangirikiraga tugahora dukoresha, ariko ubu umuntu ashobora kwinjiza amafaranga 3000 ku munsi n’igare rye ritagize ikibazo, n’umugenzi cyangwa umutwaro watwaye ugisukuye.”

Yakomeje agira ati “Turashimira Perezida wacu cyane, wadukuye mu buzima bubi, umunyonzi wo muri Muganza na we akaba afite agaciro mu bandi bakozi kuko abasha gutunga umuryango we neza, tukaba dutwara abagenzi mu muhanda mwiza, mu mutekano usesuye nta we uduhagarika, ari yo mpamvu natwe tuzakomeza kumushyigikira mu bihe byose mu gukomeza guteza u Rwanda rwacu imbere.”

Bavuga ko bafite intego yo guhora biteza imbere baharanira kuva aho bari uyu munsi bakigira imbere mu iterambere.

Abanyonzi basaba ubuyobozi bw’umurenge n’akarere ko bwakomeza kubaba hafi bukabagira inama ndetse bukabafasha kurenga aho bari ubu bakagera kure.

Umunyamabanga nshingwabikorwa w’Umurenge wa Muganza, Muganga Alain Emmanuel, na we yishimira impinduka zazanywe n’uyu muhanda wa kaburimbo mu ngeri zose z’ubuzima bw’abaturage harimo n’aba banyonzi, kuko abenshi muri bo ari urubyiruko rwari kuba mu bushomeri rukaba rwateza n’ibindi bibazo iyo uyu muhanda utahagera.

Ati “Turabashyigikiye rwose nibakomeze biteze imbere, ubutaha tujye twumva ubuhamya bw’uwavuye ku igare akajya no kuri moto, ndetse no ku modoka avuye ku bunyonzi.

Ibyo byatuma n’abandi basore bishyiramo icyizere cyo kwiteza imbere batagombye kumva ko batera imbere ari uko bafite ibya mirenge kandi birashoboka cyane muri iyi Leta yacu.” Akabasaba gukomeza kuwubyaza umusaruro mwinshi.

BAHUWIYONGERA SYLVESTRE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE