2017-10-22 09:15:58 clouds 27o High | Kigali Rwanda

Dukurikire:
 
 

Rwamagana:Mpayimama yijeje abaturage ko azaharanira ko ubukungu busaranganywa neza

Yanditswe na IMVAHO NSHYA

Kuya 2017-07-31 05:32:46

 
Share on:
 
Yasuwe:247
 
Yavuzweho:200
 
10
 
10

Mpayimana Philippe, umukandida wigenga wiyamamariza umwanya wa Perezida wa Repubulika mu matora azaba ku wa 4 Kanama 2017, yijeje abaturage bo mu karere ka Rwamagana ko nibamutora azaharanira ko ubukungu bw’igihugu busaranganywa neza.

Mpayimana yiyamamaje agaragaza imigabo n’imigambi ye, ndetse nyuma aha ijambo abaturage bamubaza ibibazo bigendanye n’ibyo yababwiye mu kwiyamamariza umwanya w’Umukuru w’igihugu.

Bamwe mu baturage b’i Rwamagana bumvise imigabo n’imigambi ya Mpayimana, bamubajije ku kibazo cyo gusaranganya ubukungu bw’igihugu yibanzeho mu kwiyamamaza kwe.

JPEG - 193.4 kb
Mpayimana Philippe yiyamamariza mu karere ka Rwamagana (Foto Hakizimana Y)

Uwitwa Bisenge Moise, umwe mu bafashe umwanya wo kubaza ikibazo ubwo Mpayimana yiyamamazaga, yagize ati “Mwavuze ko umukene agomba kungana n’umukire, ubwo ntimwaba mugiye gutuma abaturage biba kuko umuturage azumva ko adakwiye gukura amaboko mu mufuka ngo akore?

Nta bwo umuntu azanga gukora ngo aze acungira ku byo undi yakoze kugira ngo bazanganye, nimudusobanurire neza kugira ngo abantu bataziba ngo bicane.”

Asubiza iki kibazo, Mpayimana yagize ati “Gusaranganya ubukungu nta bwo bivuga gukora mu mufuka w’umukungu ngo ushyire mu mufuka w’umukene, bivuga ko ufite byinshi atanga byinshi mu isanduku ya Leta ufite bike agatanga bike mu isanduku ya Leta ariko ibibazo bya bose bigakemuka kimwe.”

Mpayimana yakomeje avuga ko mu gihe azatorerwa umwanya wa Perezida wa Repubulika azashyiraho ikigega cy’ubufashanye mu mirimo, byose hagamijwe gufasha abaturage kwiteza imbere kandi iterambere rikagera kuri buri wese nta we usigaye inyuma.

Mu bindi bigize imigabo n’imigambi ye, harimo ko ibibazo by’abaturage bizajya bihabwa agaciro kandi bigakemurwa neza, kuko ngo atifuza ko hazagira umuntu upfukiranwa kandi afite ibibazo.

Abakandida Perezida bose uko ari batatu barangije kwiyamamariza mu ntara y’Uburasirazuba, kuri ubu abaturage bakaba basabwa kuzahitamo umukandida ukwiye, bashingiye ku bikorwa bifatika n’ingingo zishimangira iterambere ry’u Rwanda yabagejejeho yiyamamaza.

HAKIZIMANA YUSSUF

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE