2017-10-18 07:03:30 clouds 27o High | Kigali Rwanda

Dukurikire:
 
 

Ibintu 5 Perezida Trump yakora agatsinda Koreya ya Ruguru hatabayeho intambara

Yanditswe na IMVAHO NSHYA

Kuya 2017-07-06 10:31:32

 
Share on:
 
Yasuwe:1203
 
Yavuzweho:200
 
10
 
10

Koreya ya Ruguru yatangaje ku wa Kabiri ko yagerageje igisasu cya Kirimbuzi cya ICBM, gishobora kwambukiranya imigabane. Byatumye Leta Zunze Ubumwe za Amerika ikaza umurego isaba amahanga gufatanya guhangana nayo.

Icyo gisasu Koreya ya Ruguru yagerageje gishobora kugera muri Leta ya Alaska mu majyaruguru y’uburengerazuba bwa Amerika.

Usa Today ivuga ko Perezida Donald Trump, uri mu ruzinduko muri Pologne, yasabye ibihugu bitandukanye kugira icyo bikora ku myitwarire ‘mibi cyane’ ya Koreya ya Ruguru

Ati “Koreya ya Ruguru imaze iminsi yitwara mu buryo buteye inkeke. Ndasaba ibihugu byose guhangana n’iki kibazo gikomereye Isi kandi, mbivugire mu ruhame, hari ingaruka zikomeye iki gihugu kizahura nazo kubera ibyo gikora. Hari ibintu bikarishye turi gutekerezaho. Ariko ntibivuze ko tuzabikora.”

JPEG - 26.1 kb
Igisasu Koreya ya Ruguru yagerageje gishobra kurwa muri Alaska, USA

USA imaze igihe yiga ku bihano yafatira Koreya ya Ruguru. Perezida Trump aherutse kuvuga ko ababazwa cyane n’uko u Bushinwa bukomeje gukorana na Koreya ya Ruguru.

Ibi ni bimwe mu bihano bishobora gufatwa, Koreya ya Ruguru igacika intege, hatabayeho intambara ku bw’umusesenguzi wa politiki, Oren Dorell.

1. Gukaza ibihano bisanzweho

Loni yafatiye ibihano Koreya ya Ruguru mu Gushyingo 2016, nibyo bya mbere bikarishye byabayeho kuri icyo gihugu ariko USA ivuga ko bikeneye kuvugururwa bakarushaho kubikanyaga.

Ibyo bihano bibuza Koreya ya Ruguru kugurisha intwaro, nyiramugengeri, ubutare n’ibindi kugira ngo amafaranga avuyemo adakoreshwa ibisasu bya kirimbuzi.

U Bushinwa n’ibindi bihugu bimwe bya Afurika byamaze gushyira mu bikorwa ibyo bihano ariko hari ibindi bihugu bitabyitayeho kubera inyungu bikura kuri Koreya ya Ruguru, cyane ko intwaro zayo zihendutse.

2. Guhagarika inganda z’Abashinwa zikorera Koreya ya Ruguru

Hari inganda zo mu Bushinwa zikora intwaro zimwe za Koreya ya Ruguru, urugero ni nk’ebyiri zikora amakamyo manini Koreya ikoresha itwara cyangwa igatera misile.

Richard Fisher umushakashatsi kuri politiki yo muri Aziya, avuga ko Uruganda rw’Ubushinwa rw’Ubumenyi bw’isanzure, CASIC, n’Urukora Amakamyo, Sinotruk zikora izo modoka zikunze kugaragara mu myiyerekano no mu kugerageza ibisasu.

JPEG - 42.4 kb
Ubutasi bwa USA buvuga ko ikamyo zitwara ibisasu bya Koreya ya Ruguru bikorerwa mu Bushinwa

3. Gushyira ku karubanda inkunga u Bushinwa butera Koreya ya Ruguru

Ibiro by’ubutasi bya USA bishobora gushyira ahagaragara inganda z’Abashinwa zifasha Koreya ya Ruguru gukora lithium-6, kimwe mu byifashishwa mu gukora ibisasu bya kirimbuzi.

Izi nzego muri Werurwe zatangaje ko Leta ya Kim Jong Un yaguze mu Bushinwa ibikoresho byo mu nganda n’ibinyabutabire bya Mercury na lithium hydroxide byo kwifashishwa mu gukora lithium 6.

Ibi byerekana ko Leta y’u Bushinwa ifite uburyo ifasha Koreya ya Ruguru rwihishwa mu gukora ibisasu byarimbura imbaga.

4. USA n’inshuti zayo bashobora kwishyiriraho ibihano byihariye

Nubwo Loni yafatiye Koreya ya Ruguru ibihano, bigaragara ko nta kintu kinini biyitwara. USA ishobora gukoresha ibihugu by’inshuti igashyiraho ibihano byihariye nk’uko Obama yabikoze ahangana n’ikorwa ry’ibisasu bya kirimbuzi muri Iran.

USA ishobora gusohora inyandiko zita muri yombi abayobozi b’ibigo bikomeye byo mu Bushinwa no mu bindi bihugu bifasha Koreya ya Ruguru, ikanafatira imitungo yabo.

Abo ni nk’abayobozi b’uruganada rwa Dandong Hongxiang mu Bushinwa, n’izindi zo mu Burusiya, Vietnam, na Cuba basohotse mu cyegeranyo cyasohowe na USA ku ya 31 Werurwe kivuga abashobora gufatirwa ibihano kubera gutera ikunga ibikorwa bya Koreya ya Ruguru.

5. Gukumira abakorana na Koreya ya Ruguru ku mabanki ya USA

USA ishobora gukumira ibigo, amabanki n’abantu bakorana na Koreya ya Ruguru ku mabanki yayo.

Ibi bishobora kugabanya cyane ubucuruzi bw’intwaro bw’icyo gihugu kandi bwinjiza 40% mu bukungu bwacyo.

JPEG - 20.9 kb
Igisasu giherutse guterwa cyahangayikishije bikomeye USA n’inshuti zayo
atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE