2017-12-11 11:57:22 clouds 27o High | Kigali Rwanda

Dukurikire:
 
 

Komisiyo y’Amatora yatangiye kwakira kandidatire

Yanditswe na IMVAHO NSHYA

Kuya 2017-06-12 14:40:25

 
Share on:
 
Yasuwe:415
 
Yavuzweho:200
 
10
 
10

Komisiyo y’igihugu y’Amatora yatangiye kwakira ibyangombwa by’abifuza kwiyamamariza umwanya wa Perezida wa Repuburika y’u Rwanda, mu matora ateganyijwe kuzaba ku ya 4 Kanama 2017.

Ku ikubitiro ejo hashize kuri uyu wa 12 Kamena 2017, NEC yakiriye Dr Habineza Frank Umukandida w’Ishyaka Green Party .

Dr Frank Habineza, ari kumwe n’abandi bayoboke b’Ishyaka rya Green Party, yahaye komisiyo y’amatora amadosiye arimo icyemezo cy’amavuko, icy’ubwenegihugu, ikigaragaza ko nta bundi bwenegihugu afite, icyangombwa cyo gutura n’ibindi biteganywa n’itegeko uretse ikarita y’itora atari yitwaje akaba yasabwe kuzayizana.

Perezida wa Komisiyo y’Igihugu y’Amatora, Prof Kalisa Mbanda, yibukije ko Dr Frank Habineza agomba kuyitanga mbere yo ku wa 23 Kamena.

JPEG - 112.3 kb
Dr. Frank Habineza ashyikiriza Perezida wa NEC kandidatire

Nyuma yo gutanga ibyangombwa bye, Dr Frank Habineza yabwiye itangazamakuru ko kuba yakiriwe na komisiyo y’amatora, ari intambwe ya mbere izatuma kandidatire ye yemerwa, bityo akagera ku yindi ntera yo guhagararira abanyamuryango bamutumye.

Abandi bakandida bigenga baje kuri komisiyo y’amatora bazanye kandidatire zabo ni Mwenedata Gilbert umukandida wigenga, werekanye bimwe mu byangombwa ariko akabura ikigaragaza ko nta bundi bwenegihugu afite, kopi y’indangamuntu n’ikarita y’itora.

Hari kandi Barafinda Sekikubo Fred watanze kandidatire ye avuga ko ahagarariye “Ishyaka Nyarwanda riharanira ubumwe bw’abanyarwanda muri Demokarasi yihuse ku mpamvu nziza nyinshi 200” [Rwanda Revolutionary United Democratic Advisers 200 Good Causes/RUDA].

Nyuma yo gusanga ishyaka rye ritemewe, Komisiyo y’Amatora yamusabye ko yiyamamaza nk’umukandida wigenga nubwo hari bimwe mu byangombwa atujuje.

NEC izatangaza urutonde ntakuka rw’abakandida bemejwe kuzahatana mu matora y’umukuru w’igihugu ku ya 7 Nyakanga 2017, naho kwakira kandidatire bisozwe ku wa 23 Kamena 2017.

TWAGIRA WILSON

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE