2017-12-11 11:57:22 clouds 27o High | Kigali Rwanda

Dukurikire:
 
 

Amagare: Mugisha na Areruya bagiye kwitabira Giro d’Italia 2017

Yanditswe na IMVAHO NSHYA

Kuya 2017-06-07 15:20:51

 
Share on:
 
Yasuwe:107
 
Yavuzweho:200
 
10
 
10

Abakinnyi babiri b’Abanyarwanda mu mukino wo gusiganwa ku magare, Areruya Joseph na Mugisha Samuel bagiye kwitabira isiganwa rikomeye mu Butaliyani “Giro d’Italia 2017” mu batarengeje imyaka 23 .

Aba bakinnyi bakinira ikipe ya kabiri ya Dimension Data for Qhubeka yavukiye muri Afurika y’Epfo ubu ikaba ibarizwa mu Butaliyani mu mujyi wa Lucca. Iri siganwa bazitabira rizatangira ku wa Gatanu tariki 9 risozwe tariki 15 Kamena 2017.

Ubusanzwe “Giro d’Italia” ni isiganwa riri ku rwego rwo hejuru nka Tour de France, uyu mwaka ubwo ryabaga ku nshuro ya 100 mu bakuru ryabaye tariki 05-28 Gicurasi 2017. Ubu iri siganwa mu batarengeje imyaka 23 rigiye kuba ku nshuro ya 40.

JPEG - 37.1 kb
Mugisha Samuel (ibumoso) na Areruya Joseph (iburyo) bagiye kwitabira Giro d’Italia 2017

Rizaba rigizwe n’intera 7, rizitabirwa n’abakinnyi 174 bari mu makipe 29 arimo na Dimension Data for Qhubeka ya Mugisha na Areruya.

Aba bakinnyi batangarije Imvaho Nshya ko bamaze iminsi bitegura kandi bifuza kuzitwara neza. Areruya Joseph yatangaje ko iri siganwa riri mu masiganwa akomeye cyane ariko ko na bo bashaka kwigaragaza.

Mugisha Samuel we ati “Intego dufite ni ukwitwara neza kandi turabishoboye”.

Uko isiganwa rizagenda

Giro d’Italia U-23 izakinwa mu ntera 7, abasiganwa bakazasoza basiganwe ahareshya n’ibilometero 956 na metero 300. Izitabirwa n’abakinnyi 174 barimo 168 bakomoka mu Butaliyani.

Intera ya mbere tariki 09 Kamena 2017, abasiganwa bazakinira ahitwa Imola basiganwe ibilometero 132,2.

Tariki 10 Kamena 2017 bazava ahitwa San Antonino basoreze San Valentino ahareshye n’ibilometero 145,8. Intera ya 3 iva Bagnara Di Romagna kugera Forli izakinwa tariki 11 Kamena 2017 abasiganwa bazasoza bakoze ibilometero 140,5.

Tariki 12 Kamena 2017 hazakinwa intera ya 4 aho abasiganwa bazava Forli basoreze ahitwa Gabicce Mare mu ntera y’ibilometero 155,5.

Tariki 13 Kamena 2017,intera ya 5 izakinwa mu byiciro bibiri aho abasiganwa bazava Senigallia basoreze Osimo aho bazakora ibilometero 87,2. Ubundi hakinwe gusiganwa n’igihe buri mukinnyi ku giti cye “Individual Time Trial” aho bizabera ahitwa Campocavallo mu mujyi wa Osimo, aho buri mukinnyi azasiganwa mu ntera y’ibilometero 14.

Umunsi ubanziriza uwa nyuma w’iri siganwa tariki 14 Kamena 2017 hazaba intera ya 6 iva ahitwa Francavilla Al Mare igere Casalincontrada ahareshya n’ibilometero 132,2 naho intera ya nyuma ya 7 izabe tariki 15 Kamena 2017 aho Francavilla Al Mare basoreze Campo Imperatore ahareshye n’ibilometero 148,9.

Nyuma y’iri siganwa, Areruya Joseph na Mugisha Samuel bazitabira irindi siganwa rizaba mu mpera z’uku kwezi bishobora gutuma batitabira shampiyona y’igihugu izaba tariki 24-25 Kamena 2017.

BUGINGO FIDELE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE