2017-12-11 11:57:22 clouds 27o High | Kigali Rwanda

Dukurikire:
 
 

Ange Kagame yerekanye igikwiye gukorwa ngo SIDA iranduke burundu

Yanditswe na IMVAHO NSHYA

Kuya 2017-03-08 13:10:43

 
Share on:
 
Yasuwe:907
 
Yavuzweho:200
 
10
 
10

Umukobwa wa Perezida wa Repubulika, Ange Kagame, kuri uyu munsi Mpuzamahanga w’Abagore wa 2017, yatanze ubutumwa bwafasha amahanga kurandura burundu ubwandu bushya bwa SIDA, cyane cyane mu bakobwa n’abagore.

Mu nyandiko ye yanyuze ku rubuga rwa rw’Ikigega Mpuzamahanga cyo kurwanya SIDA, Igituntu na Malaria, The Global Fund, yavuze ko yakuriye muri Afurika mu myaka ya 1990 mu gihe kibi kuri uyu mugabane, kuko wari wugarijwe n’ubukene, intambara, ubwicanyi ndengakamere, n’ibyorezo bihitana imbaga.

Ariko ngo mu ntangiriro z’ikinyagihumbi gishya, Afurika yongeye kwiyubakamo amahoro gake gake, itangira kuzamura ubukungu n’ubuzima bw’abaturage babarirwa mu ma miliyoni.

JPEG - 41.7 kb
Ange Kagame

Gusa nubwo uyu mugabane ufite icyizere, Ange Kagame avuga ko urubyiruko bavukiye rimwe rucyugarijwe cyane n’icyorezo cya SIDA kuko ari yo ihitana benshi mu ngimbi n’abangavu bafite hagati y’imyaka 10 na 19.

Ati “Agakoko gatera SIDA kari gutwara ubuzima rw’urubyiruko rutagira ingano, nk’ubu abakobwa n’abagore babarirwa muri 7500 bazandura HIV muri iki Cyumweru gusa. Mu bihugu bimwe 80% by’abandura ni ab’igitsina gore. Ntibyumvikana kandi iki ari icyorezo dukwiye kwirinda no kuvura.”

Ange Kagame asaba amahanga n’abafatanyabikorwa mu iterambere gufatanya n’urubyiruko mu rugamba rwo kurwanya agakoko gatera SIDA no guharanira ubuzima bwiza mu gihe kizaza.

Yemeza ko urubyiruko rw’igitsina gore rukwiye gufashwa muri gahunda zo kurindwa no kuvurwa SIDA ariko rukanitabwaho mu buzima bwa buri munsi dore ko hari n’abandura iki cyorezo kubera ubuzima bubi babayemo.

Atanga urugero nko kuri gahunda yo guha amahirwe yo kwiga abana b’abakobwa. Ati “Byagaragaraye ko amafaranga umukobwa yinjiza yiyongera cyane iyo agize amahirwe yo kwiga, ntahura n’ingaruka zo gushaka atarageza igihe, kandi akagira amahirwe yo kugira umuryango ufite ubuzima bwiza, akazahitama igihe cyo kubyara abishatse.”

Urubyiruko ni intwaro ikomeye mu kurwanya SIDA

Ange Kagame avuga nbigoye gutsinda urugamba rwo kurwanya SIDA ahantu hatuwe ku bucucike, cyane cyane ku mugabane wa Afurika igihe cyose urubyiruko rudahawe amahirwe yo kurwanya iki cyorezo.

Yerakanye uko mu Rwanda, gahunda z’uburinganire no guteza imbere urubyiruko zatanze umusaruro. Ndetse ubufatanye bw’inzego z’ubuzima n’abaturage bugatuma abana banduzwa SIDA biturutse ku babyeyi bagabanuka bakava ku 10% bakagera kuri 1.8 mu myaka icumi ishize.

Ati “Igihe kirageze ngo urubyiruko, rwumve umuhamagaro, ruhaguruke ruhuze imbaraga na za guverinoma n’abafatanyabikorwa ngo batangire guhashya iki cyorezo bitarenze muri 2020.”

Inkuru y’umwimerere iri mu rurimi rw’Icyongereza mushobora kuyisoma hanohttp://www.theglobalfund.org/en/blo...

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE