2017-10-18 07:03:30 clouds 27o High | Kigali Rwanda

Dukurikire:
 
 

Gukunda igihugu biza mbere – Min. Nsengimana

Yanditswe na Admin

Kuya 2015-11-09 13:27:16

 
Share on:
 
Yasuwe:50
 
Yavuzweho:200
 
10
 
10


Mu gutangiza ukwezi k’urubyiruko i Muhanga mu Ntara y’amajyepfo, Minisitiri w’Urubyiruko n’ikoranabuhanga mu Isakazabumenyi, Jean Philbert Nsengimana yagaragarije urubyiruko rwibumbiye mu ihuriro ryarwo, ko nubwo ruturuka mu madini atandukanye, gukunda igihugu bifata umwanya wa mbere.

Minisitiri Nsengimana avuga ko n’andi madini ari meza kuko atuma urubyiruko n’abanyagihugu bahuza ibitekerezo byubaka imitima yabo ariko ko gukunda igihugu bihuye neza no gukunda Imana.

Ati “Gukunsa Imana no kwemera Imana nta hantu na hamwe bitandukaniye no gukunda igihugu cyacu cy’u Rwanda.”

Minisitiri Nsengimna avuga ko idini ry’Abanyarwanda ryo gukunda igihugu barivukiramo bakarikuriramo kandi bakariraga abazabakomokaho, kuko Umunyarwanda wese agomba gukunda igihugu.

Urubyiruko rwo mu karere ka Muhanga rusaga 2000 rwitabiriye ibikorwa byo gutangiza ukwezi kw’urubyiruko ruzibanda ku ngingo ebyiri ari zo Itorerero no gutoza urubyiruko ruri mu biruhuko intego zikaba ari ukurushaho kubaka urubyiruko rutanga umusaruro mu bihe byarwo.

Ni muri uwo rwego ubwo hatangizwaga uku kwezi hatewe ibiti 1000 by’imbuto mu Murenge wa Shyogwe mu kurwanya imirire mibi, bamwe mu baterewe ibi bahamya ko urubyiruko rukoreshejwe neza rutanga umusaruro.

Munyejabo Eric waterewe ibiti by’imbuto avuga ko nta giti cy’imbuto yagiraga ariko ubu azabasha kunoza imirire, ati “Mfite abana ndahamya ko izi mbuto zizamfasha mu kunoza imirire.”

Muragijemariya Rose avuga ko kuba Minisitiri yazanye urubyiruko rukamuterera ibiti by’imbuto bigaragaza ko Leta irufasha gutanga umusaruro; “Mbere ya byose nakuyemo urukundo, kandi bangiriye inama yo kuboneza imirire kandi banansabye ko umurima wanjye narushaho kuwubyaza umusaruro nitabira gutera insina zera ibitoki biribwa”.

Musenyeri wa Diyosezi ya Kabgayi Smaragde Mbonyintege asaba urubyiruko gukomeza kurangwa n’ingeso nziza kuko ari zo zizatuma rubasha kubahiriza inshingano zarwo.

Ati, “Nta rubyiruko rudakunda… kugira ngo mwiteze imbere mugomba kwiyubaha mukubaha n’Imana ibaha imbaraga.”

Ukwezi k’urubyiruko kwatangijwe kuzibanda ku bikorwa by’amaboko n’ibiganiro bizajya bitangwa mu matorero n’amahuriro yarwo.

MUHIZI ELISÉE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE