28°C , Sunny | Kigali-Rwanda

Sobanukirwa itegeko rigenga ibigo by’ubukerarugendo rinashingirwaho mu gutanga inyenyeri (Igice cya kabiri)

Yanditswe na Tumukunde Georgine

Ku ya 11-09-2019 saa 16:16:40

Ibigo by’ubukerarugendo n’abandi bashaka gutangira ubucuruzi muri uru rwego barasabwa kumenya itegeko ryashyizweho bagomba gukurikiza kugira ngo ibikorwa byabo bigende neza; bibazanire inyungu kandi binateze imbere Igihugu muri rusange.

Umuyobozi w’Ishami rishinzwe ubugenzuzi n’amabwiriza ajyanye n’ibigo by’ubukerarugendo mu Rwego rw’Igihugu rushinze Iterambere (RDB), Nsabimana Emmanuel yasobanuye ibijyanye n’iryo tegeko ryatowe mu mwaka wa 2014, ryasohotse Igazeti ya Leta n° 40 yo ku wa 03/10/2016.

Rikimara gushyirwaho abakorera muri ruriya rwego rw’ubukerarugendo bahawe igihe k’imyaka ibiri cyo kwitagura kugira ngo babashe kuryubahiriza.

Mu nkuru iheruka Imvaho Nshya yabagejejeho impamvu 3 z’ingenzi zatumye rijyaho, abo rireba mu byiciro 5 by’ubucuruzi n’icyo rivuga ku byiciro by’amahoteri n’ibirebana n’inyito abantu baha ibikorwa byabo by’ubucuruzi kandi bidahuye n’uko itegeko ribisobanura.

Yatanze urugero rw’amacumbi (lodges) n’izindi nzu zisanzwe zicumbikira abantu mu migi, usanga byose byiswe “Lodge” kandi itegeko atari ko ribiteganya.

Yagize ati: “Itegeko risobanura ko lodges ari amacumbi ari ku bintu nyaburanga bifite cyane cyane aho ihuriye n’ibidukikije, n’imiterere gakondo y’Isi, ni amacumbi yita cyane ku kubungabunga ibidukikije, ni igisobanuro cyo ku rwego mpuzamahanga. Ni yo mpamvu uzasanga amacumbi menshi dufite muri za Pariki yitwa Lodge.”

Ashobora no kwitwa “Ecolodge” kuko yita ku bidukikije cyane ugasanga n’ibikoresho byifashishijwe mu kuyubaka ari ibintu by’umwimerere bikomoka ku bidukikije; nk’ibyatsi, amakoro,…

Ibindi birebana n’amacumbi

Nsabimana Emmanuel yakomeje asobanura ibyiciro by’amacumbi n’inyito zayo ziteganywa mu itegeko.

Amacumbi azwi ku izina rya “Apartment/ Appartement”

Ni amacumbi yubakwa abantu bakagenda bakayakodesha mu gihe runaka, bakanahabwa serivisi zitandukanye zirimo gukorerwa isuku, bakabatekera ifunguro rito rya mu gitondo, ariko ntabwo aba afite ubushobozi bwo gutanga serivisi zo ku rwego rw’amahoteri ngo agire abakozi benshi, atange ifunguro rikuru (Lunch) cyangwa ngo agire utubari.

Na yo aba agomba gusabirwa ibyangombwa.

Amacumbi ya “Guest House”

Yasobanuye kandi ko hari n’amazu mato acumbikira abantu usanga atarengeje ibyumba 10, abantu baza bakararamo bakabyuka bagenda, ayo ari mu rwego rwa “Guest House”.

Aha umuntu ashobora kwibaza aho atandukaniye na hoteri. Nsabimana yakomeje abisobanura agira ati: “Bamwe bashobora kubitandukanya bakurikije ingano, ariko si byo neza, usanga hoteri ifite ibyumba byinshi bigeze no kuri 40, Guest House ifite 5, 10. Guest House ifasha gusa abantu bayirimo imbere, bayirayemo, hari iziba zifite bare na resitora bifasha gusa abaharaye”.

Yakomeje avuga ko itemerera umuntu uvuye hanze kuza kuhanywera cyangwa kuharira kereka iyo afite uwaharaye aje kureba.

Kuba hari umurongo nk’uwo wo gukoreraho ngo hari ikintu kinini bisobanuye. Ati: “ Nk’iyo utemerera abandi bantu kwinjira muri Guest House cyangwa muri hoteri hari ikintu kinini bivuze; ni ukuvuga ko ingufu za serivisi zose uba wazishyize kuri wa muntu uri imbere, ntabwo ushaka ikindi kintu kimuhungabanya”.

Ugiye gukora ibijyanye n’amacumbi asabwa kubanza gusaba ibyangombwa by’Ubuyobozi bw’Akarere ashaka gukoreramo kugira ngo barebe niba inzu ugiye gukoreramo nta kibazo ifite, ari na byo bigezwa kuri RDB na yo ikanagenzura niba aho umuntu agiye gukorera nta bibazo hateje; niba amashanyarazi ameze neza, ikareba iby’isuku, umutekano, ibirwanya inkongi z’umuriro, niba hari abakozi bashinzwe umutekano bashobora gutabara igihe havutse ikibazo.

Nsabimana yakomeje avuga ko hagenzurwa n’abakozi umuntu akoresha, hakarebwa niba bafite ubushobozi, bakora ibyo bazi neza kugira ngo serivisi zigende neza, niba basuzumwa hagati y’amezi ane n’atandatu harebwa ko badafite indwara zandura kuko hari amabwiriza ya Minisiteri y’Ubuzima ateganya ibijyanye no gusuzumwa.

Yagize ati: “Hari n’ibindi tureba; tureba niba serivisi zawe zitazaba mbi kubera ko hari ibyo udakora, ushobora gusanga utishyura amazi ikigo kibishinzwe kikaza kikagufungira, abo wacumbikiye bakabura serivisi nziza. Aho amazi atari utwereka ingamba z’uburyo uzabona amazi”.

Ku bijyanye n’amacumbi aba ari nko muri za Pariki hiyongeraho kugaragaza niba hari ubwishingizi afite haba ku bijyanye n’inkongi cyangwa ikindi kibazo cyavuka, hari amacumbi y’abahakora cyangwa hari ubundi buryo bwo kubafasha gutaha kuko haba ari mu ishyamba.

Muri rusange amabwiriza areba resitora, amahoteri n’andi macumbi afite aho ahuriye ariko hakagenda habaho umwihariko bitewe n’imiterere y’ubucuruzi.

Icyo itegeko rivuga ku batwara ba mukerarugendo

Nsabimana yasobanuye ko abatwara ba mukerarugendo bafite amabwiriza yihariye. Hari abayobora ba mukeraugendo bikorera ku iti cyabo (Tour Guide); badafite akazi gahoraho ku buryo umushatse wese yamukoresha, basabwa kuba ari abanyamwuga, bafite imyitwarire myiza, bashobora kuvuga indimi,…

Abafite kompanyi zitwara ba mukerarugendo basabwa kuba bafite ishyirahamwe bibumbiyemo kimwe n’abayobora ba mukerarugendo n’abafite amahoteri, bakaba bafite imodoka zitwara ba mukerarugendo n’aho bakorera hazwi kandi bashobora no gukora ubutabazi bwihuse bifashishije kajugujugu igihe havutse ikibazo bageze mu ishyamba.

Ngo ushobora kuba utwaye ba mukerarugendo, mwamara kugera mu ishyamba imodoka ikaba irapfuye, ibiti bikaba byagwa bigafunga umuhanda cyangwa hakavuka ibindi bibazo,… Ni yo mpamvu ushaka gukora buriya bucuruzi yerekana ko afite uburyo bwo gukora ubutabazi bujyanye cyanecyane na kajugujugu.

Avuka ko nubwo abashinzwe ubukerarugendo hari uburyo bafite bakoresha ariko n’abatwara ba mukerarugendo ubwabo bagomba kuba bateganyije ubutabazi.

Yakomeje avuga ko hashyizweho uburyo bworohereza abatwara ba mukerarugendo kubona buriya bwishingizi bwo kuba bakwitabaza kajugujugu; binyuze mu masezerano bagira umusanzu bagenda batanga uturutse ku giciro cy’amafaranga atangwa na buri mukerarugendo.

Ubutaha, Imvaho Nshya izabagezaho inzira zikurikizwa mu guha amacumbi inyenyeri.

TANGA IGITEKEREZO

Leave a Reply

Your email address will not be published. Required fields are marked *