Sobanukirwa: Hari abitiranya urushwima n’amarozi

Yanditswe na Mukagahizi Rose

Ku ya 19-11-2019 saa 18:01:29
Inzoga zivugwaho kuba nyirabayazana w'urushwima

Dr.  Kanyamuhunga Aimable, inzobere mu kuvura indwara muri CHUK avuga ko urushwima ari indwara ituma inda ibyimba cyane, bamwe bakayitiranya n’amarozi ndetse bikaba byatuma bativuza uko bikwiye.

Avuga ko iyo ndwara irangwa no kubyimba inda ku buryo budasanzwe.

Yagize ati: “Indwara y’urushwima ni indwara yibasira abantu bose ku buryo abantu bayitiranya n’amarozi. Iyi ndwara kugira ngo imenyekane ni uko hari amazi menshi aza mu nda hanyuma inda ikabyimba ariko ayo mazi nta bwo ari amazi umuntu aba yanyoye. Ni amazi aba ari mu mara noneho amara akamera nk’ayoga muri ayo mazi.”

Ibimenyetso

Avuga ko mbere yuko abyimba mu nda umurwayi ashobora kuba ari umwana cyangwa umuntu mukuru, ashobora kubanza kubyimba amaguru, akaba yabyimba amaboko, akaba yabyimba mu maso. Iyo atavuwe hakiri  kare hari nubwo abyimba mu nda.

Yagize ati: “Uko kubyimba tuba tubona mu maguru aba ari amazi ndetse no mu maso. Hari nubwo bijya ahandi hantu hose harimo no mu nda. Iyo bimaze kurengerana hari ubwo anyunyuka ya maguru akaba matoya ndetse n’amaboko, ugasanga asigaranye inda gusa ibyimbye yuzuyemo amazi.”

Iyi nzobere ivuga ko urushwima rushobora kuvurwa rugakira bitewe n’icyaruteye mu gihe gishobora kuba gito cyangwa gishobora kuba kirekire bitewe n’impamvu zitandukanye.

Yagize ati: “Umwana ashobora kugira urushwima kubera imirire mibi, icyo gihe ashobora kuvurwa mu gihe gito ya mazi akagenda agabanuka mu mubiri umwana akaba yataha ari muzima.”

Mu nama atanga harimo kugira imirire myiza, kwirinda inzoga kuko akenshi usanga inzoga arizo zangiza umwijima ku rugero runini.

Yagize ati: “Abafite urushwima hafi ya bose baba bafite umwijima wangiritse kubera gukoresha ibiyobyabwenge harimo n’inzoga.”

Ashishikariza abantu kwirinda imiti gakondo ahubwo bakagana  ibitaro bibegereye kugira ngo bahabwe inama  z’ubuvuzi.

Iyo basanze badashoboye kumuvura bamurangira aho ashobora kubonera ubuvuzi nyabwo ariko batabanje gufata imiti ibangiriza ubuzima nyuma y’igihe runaka, y’imyaka itanu cyangwa icumi ugasanga ya miti iteje ingaruka ku mwijima itumye ugenda ucika intege aribyo bivamo kugira urushwima.

Mu bindi ngo iyi ndwara ikunze kugenda igaragara nkifata intera ndetse ikaba yahitana umuntu utayivuje hakiri kare.

Umwanditsi:

Mukagahizi Rose

Tanga Igitekerezo

Email yanyu ntigaragazwa ku rubuga. Amazina na Email ni ngombwa.