22°C , Partly sunny | Kigali-Rwanda

Sitting Volleyball: Umutoza w’ikipe y’igihugu agiye guhabwa amasezerano y’umwaka umwe

Yanditswe na BUGINGO FIDELE

Ku ya 08-10-2019 saa 08:48:39
Dr Mossad Rashad Elaiuty ugiye guhabwa amasezerano y'umwaka mu ikipe y'igihugu ya Sitting Volleyball mu bagore n'abagabo

Umutoza w’ikipe y’igihugu mu mukino wa Sitting Volleyball yaba mu bagabo ndetse n’abagore, Dr Mosaad Rashad Elaiuty akaba akomoka mu Misiri agiye guhabwa amasezerano y’umwaka umwe uzarangirana n’imikino Paralempike 2020.

Uyu mutoza  wahoze atoza ikipe y’igihugu ya Misiri yageze mu Rwanda muri Nyakanga 2019  ahabwa amasezerano y’amezi 3  ngo afashe ikipe y’u Rwanda mu bagabo n’abagore kubona itike y’imikino Paralempike 2020.

Perezida wa Komite y’igihugu y’imikino y’abafite ubumuga mu Rwanda “NPC-Rwanda”, Murema Jean Baptiste  yatangarije Imvaho Nshya ko uyu mutoza koko bari bamuhaye amasezerano y’amezi 3 aho bavugaga ko bagiye kureba imikorere ye, ubumenyi, ubunararibonye n’ibindi kugira ngo babashe kumuha amasezerano y’igihe kirekire.

Nyuma Murema avuga ko babonye ari umutoza mwiza ufite ubunararibonye ndetse n’ubushobozi bakaba barimo gushaka uko bamuha amasezerano y’umwaka umwe ushobora kongerwa.

Murema yagize ati : “ Mbere y’uko asubira hanze twaraganiriye tumwereka ubushobozi bwacu nk’igihugu  kandi Minisiteri yacu yatubwiye ko nta bushobozi buhari ku buryo yahita imugira umutoza  ariko turimo gushakisha ku  buryo yageza  nyuma y’imikino Paralempike 2020.”

Nyuma y’imikino Paralempike 2020 izitabirwa n’ikipe y’igihugu mu bagore  kuva tariki 25 Kanama kugeza 06 Nzeri 2020 ni bwo ubuyobozi buzareba  niba hari ubushobozi bwo kumwongerera amasezerano y’umwaka cyangwa ibiri. Yagize ati : “ Tubonye ubundi buryo twamuha andi masezerano y’umwaka cyangwa ibiri .”

Perezida wa NPC-Rwanda, Murema avuga ko icyo bifuza kuri uyu mutoza  ari ugufasha abatoza  b’imbere mu gihugu  kugira no  bazamure urwego bityo azage kuva mu Rwanda hari ubumenyi  abasigiye kugira ngo  bakomerezaho kuzamura umukino wa Sitting Vollyball mu Rwanda.

Uyu mutoza nyuma y’imikino y’Afurika aho ikipe y’abagabo yabaye iya kabiri naho iy’abagore igatwara igikombe yahise asubira iwabo mu Misiri bikaba biteganyijwe ko azagaruka mu Rwanda  tariki 20 Ukwakira 2019 kugira ngo akomeze gutegura ikipe y’abagore izakina imikino Paralempike 2020.

Muri iyi myiteguro ikipe y’u Rwanda tariki 30 Ukwakira 2019 izerekeza mu Buyapani mu ntara ya Okinawa  ifitanye amasezerano y’ubufatanye na NPC-Rwanda ihakorere imyitozo nyuma  kuva tariki 12 kugeza 17 Ugushyingo 2019  iyi kipe ikine irushanwa rizahuza amakipe 6 yabonye itike y’imikino Paralempike 2020.

Nyuma yo kuva mu Buyapani, ikipe izakomeza kwitoza  kuko umutoza Mossad Rashad Elaiuty  yashyizeho gahunda  y’imyitozo aho azanategura amarushanwa yaba imbere mu gihugu no hanze kugira ngo urwego abakinnyi  bariho rukomeze ruzamuke.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.