19°C , Partly cloudy | Kigali-Rwanda
Ikipe y'igihugu y'abagabo y'umukino wa Sitting Volleyball yatangiye imyiteguro yo gushaka itike y'imikino Paralempike 2020

Sitting Volleyball: Ikipe y’igihugu yatangiye imyiteguro yo gushaka itike y’imikino Paralempike 2020

Yanditswe na NKOMEJE GUILLAUME

Ku ya 29-09-2018 saa 11:59:10

Ikipe y’u Rwanda y’abafite ubumuga mu mukino wa Sitting Volleyball, mu kiciro cy’abagabo n’abagore yatangiye imyiteguro yo gushaka itike y’imikino Paralempike, “2020 Summer Paralympics Games” izabera i Tokyo mu Buyapani kuva tariki 25 Kanama kugeza 6 Nzeri 2020.

Ikipe y’igihugu y’abagabo y’umukino wa Sitting Volleyball yatangiye imyiteguro yo gushaka itike y’imikino Paralempike 2020

Iyi kipe y’igihugu y’ibyiciro byombi zigizwe n’abakinnyi 18 kuri buri kipe, ikaba irimo gukorera imyitozo mu karere ka Huye yatangiye ejo hashize ku wa Gatanu tariki 28 Nzeri 2018, ikazageza ku Cyumweru tariki 30 Nzeri 2018.

Aganira n’Imvaho Nshya, Nsengiyumva Jean Marie, umutoza w’ikipe y’igihugu ya Sitting Volleyball y’abagore yatangaje ko iyi myitozo izabafasha kwitegura hakiri kare gahunda yo gushaka iyi tike y’imikino Paralempike.

Yagize ati Ni imyitozo isanzwe mu rwego rw’imyitozo ihoraho, kandi turakomeza gutegura gushaka itike ya Tokyo 2020. Kuri twebwe gutegura by’umunota wa nyuma ntitukibishaka.”

Nsengiyumva Jean Marie avuga ko iyi myitozo bayibonye ku nkunga y’Ihuriro nyarwanda ry’imiryango y’abafite ubumuga “NUDOR” bazajya bayikora mu mpera z’icyumweru.

Ngabonziza Mandela, umutoza wungirije w’ikipe y’igihugu y’abagabo na we yatangaje ko iyi myitozo izabafasha kwitegura imikino y’amajonjora hakiri kare. Avuga ko ikindi iyi myitozo izafasha abakinnyi kumenyerana kuko bagerageje guhamagara abakinnyi bashya. Ati Ikindi ni ukugira ngo abakinnyi bakomeze barusheho kumenyerana dore ko kuri ubu hahamagawemo abakinnyi bashya.”

Uretse iyi gahunda y’imyitozo, Murema Jean Baptiste, Perezida wa Komite y’igihugu y’imikino y’abafite ubumuga “NPC-Rwanda”, hamwe na Nsengiyumva Jean Marie ushinzwe tekinike baherutse gusura umujyi wa Okinawa mu Buyapani wazifashishwa n’aya makipe y’igihugu mu myiteguro mu gihe yaba abonye itike yo kuzitabira iyi mikino Paralempike mu rugendo rwabaye kuva tariki 11-16 Nzeri 2018.

Abakinnyi bahamagawe mu myitozo ku mpande zombi

Ikipe y’igihugu y’abagabo itozwa na Gakwaya Eric, igizwe n’abakinnyi 18 ari bo Ndayisaba  J. Baptiste, Twagirayezu Callixte, Gatete Fidèle, Tuyisenge Vincent, Hagenimana Fulgence, Gahamanyi J. Baptiste, Imanirutabyose Patrick, Dusabimana Viator, Semana Jean,  Ndahiro J.Claude, Niyitegeka Innocent, Murema J. Baptiste, Bizimana Dominique, Vuningabo Emile Cadet, Rutagengwa Vitus,  Nkwaya Ismaél, Ngizwenimana Bosco na Habyarimana Emmanuel. Uwera Divine (ushizwe imibereho y’ikipe) na Nkurayija J. Pierre (ushinzwe kunanura imitsi).

Iy’abagore na yo igizwe n’abakinnyi  18 barimo Bazubagira Claudine, Imanishimwe Yvonne, Kwizera Carine, Mukamanzi Jeanine, Mukobwankawe Liliane, Musabyemariya Alice, Nikuze Zaninka, Nyirambarushimana Sandrine, Nyiraneza Solange, Nyiranshimiyimana Agnès, Uwamahoro M. Louise, Umutoni Clementine, Mulisa Hosiana, Niyoyita Faina, Mutuyimana Chantal, Mugirwanake Louise, Nyirantungane Providence na Mukamurenzi Alice. Nyirimanzi Philbert (umutoza wungirije), Niragire Angélique ushizwe imibereho y’ikipe na Nzayisenga Sauda, ushinzwe kunanura imitsi.

 

TANGA IGITEKEREZO

Leave a Reply

Your email address will not be published. Required fields are marked *