23°C , Mostly cloudy | Kigali-Rwanda
Ikipe y'igihugu y'abagore y'umukino wa Sitting Volleyball

Sitting Volleyball: Ikipe y’igihugu  ijyanye intego yo kurenga amatsinda muri shampiyona y’Isi

Yanditswe na BIZIMANA ERIC

Ku ya 11-07-2018 saa 07:11:27

Nyuma y’amezi arenga ane bari mu myitozo, abakinnyi n’abatoza b’ikipe y’igihugu mu kiciro cy’abagabo n’abagore mu mukino wa  Sitting Volleyball basezeranyije Abanyarwanda kuzarenga amatsinda  mu mikino ya  shampiyona y’Isi “World ParaVolley Sitting Volleyball Championships 2018” izabera mu Buholandi kuva tariki 15 kugeza 22 Nyakanga 2018.

Ikipe y’igihugu y’abagore y’umukino wa Sitting Volleyball

Izi kipe zombi zirerekeza mu Buholandi kuri uyu wa Gatatu tariki 11 Nyakanga 2018 ku masaha y’ijoro.

Mukobwankawe Liliane, Kapiteni w’ikipe y’igihugu y’abagore ashingiye ku makipe bari kumwe mu itsinda  asezeranya Abanyarwanda kuzarenga bwa mbere aya matsinda mu nshuro eshatu bitabiriye iyi mikino.

Ati «Croatia ni nkatwe bagiyeyo bwa kabiri twanabatsinze muri Paralempike naho Canada ni ubwa gatatu kandi na bo badutsindiye ku iseti ya 5  muri Paralempike ibi bivuze ko amakipe menshi turi kumwe  mu itsinda twahuye nayo, tuyazi, tuzi aho twari dufite intege».

Vuningabo Emile, kapiteni w’ikipe y’igihugu y’abagabo  avuga ko bagiye guhatanira ishema ry’u Rwanda  Ati «Twiteguye buri mukino tugendeye  ku makipe duhanganye niyo mpamvu nijeje Abanyarwanda kuzagera nibura muri ¼, baduhe ikizere, nta bwo twe tugiye gukina , tugiye guhatana, turashaka guhatana dushaka igikombe duharanira ishema ry’igihugu cyacu».

Nsengiyumva Jean Marie, umutoza w’ikipe y’igihugu y’abagore  yagize ati «Ubundi kuva twajya muri iyi mikino ntiturarenga urwego rwa mbere. Abanyarwanda badufatire iry’iburyo, badusengere, banakomeze gushyigikira iyi mikino y’abafite ubumuga».

Umutoza w’ikipe y’igihugu y’abagabo, Gakwaya Eric  nawe yagize ati «Mu itsinda ryacu u Bushinwa bwazamuye urwego ariko abaholandi na USA bo tuzakina kuko nta kinini baturusha».

Ikipe y’u Rwanda mu kiciro cy’abagore izaba ikina iyi mikino ya shampiyona y’Isi ku nshuro ya kabiri yikurikiranya iherereye mu itsinda rya mbere “A” hamwe n’u Buholandi, Croatia na  Canada.

Ni mu gihe iy’abagabo yaherukaga kwitabira mu 2012 na yo iri mu itsinda rya mbere “A” hamwe n’u Buholandi, Leta zunze Ubumwe z’Amerika n’u Bushinwa.

Abakinnyi 12 berekeje mu Buholandi

Ikipe  y’abagabo igizwe na Bizimana Dominique, Hakizimana Theogene, Gahamanyi Jean Baptiste, Hagenimana Fulgence,  Murema Jean Baptiste,  Ndahiro Jean Claude, Ndayisaba Jean Baptiste,  Semana Jean, Tuyisenge Vincent, Twagirayezu Callixte, Vuningabo Emile (kapiteni) na Niyitegeka Innocent.

Ikipe y’abagore igizwe na Imanishimwe Yvonne, Umutoni Clementine, Kwizera Carine, Mukobwankawe Liliane (kapiteni), Bazubagira Claudine, Nyirambarushimana Sandrine, Murebwayire Claudine, Musabyemariya Alice, Nikuze Zaninka,  Nyiraneza Solange,  Nyirambarushimana Agnes na Nyirantungane Providence.

 

TANGA IGITEKEREZO

Leave a Reply

Your email address will not be published. Required fields are marked *